តំណាងរាស្រ្តបក្សប្រឆាំងស្នើឲ្យរដ្ឋសភាបំភ្លឺរឿងទីប្រឹក្សា
តំណាងរាស្រ្តគណបក្ស សម រង្ស៊ី មួយក្រុមបានស្នើឲ្យរដ្ឋសភាជាតិពន្យល់អំពីការចំណាយប្រាក់ទៅលើ ទីប្រឹក្សារបស់លោកងួន ញ៉ឹល អនុប្រធានទី១នៃរដ្ឋសភា។ លោកងួន ញ៉ឹល ដែលតំណាងរាស្រ្តបក្សប្រឆាំងអះអាងថា មានទីប្រឹក្សា រហូតដល់ទៅ៧១នាក់។ លិខិតរបស់អ្នកតំណាងរាស្ត្រគណបក្សសម រង្ស៊ី បានផ្ញើទៅកាន់រដ្ឋសភា នៅថ្ងៃសុក្រចុងសប្តាហ៍នេះដោយបានកត់សម្គាល់អំពីការចំណាយថវិកាដ៏ ច្រើនសន្ធឹកសន្ធាប់ទៅលើទីប្រឹក្សារបស់ថ្នាក់ដឹកនាំរដ្ឋសភា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ប៉ែន បូណាពីទីក្រុងភ្នំពេញ
តំណាងរាស្ត្រគណបក្សសម រង្ស៊ីចំនួន១១រូបបាននាំគ្នាចុះហត្ថលេខាលើលិខិតមួយច្បាប់ផ្ញើទៅកាន់លោកហេង សំរិន ប្រធានរដ្ឋសភាជាតិ នៅថ្ងៃសុក្រចុងសប្តាហ៍នេះ ដើម្បីសុំការបំភ្លឺអំពីថវិកាដ៏ច្រើនលើសលប់ដែលរដ្ឋសភាជាតិបានចំណាយទៅលើទីប្រឹក្សាថ្នាក់ដឹកនាំនៃរដ្ឋសភា។
លោកសុន ឆ័យ ប្រធានក្រុមអ្នកតំណាងរាស្ត្រគណបក្សប្រឆាំងបានអះអាង នៅថ្ងៃនេះថា លោកទទួលបានព័ត៌មានថ្មីៗបំផុតថា លោកងួន ញ៉ឹល អនុប្រធានទី១នៃរដ្ឋសភាជាតិមានទីប្រឹក្សាផ្ទាល់ខ្លួន រហូតដល់ទៅ៧១នាក់ ក្នុងចំណោមនោះក៏មានទាំងអ្នកតំណាងរាស្ត្រ និងប្រធាននាយកដ្ឋានហិរញ្ញវត្ថុនៃរដ្ឋសភាផងដែរ។ បើយោងតាមលោកសុន ឆ័យ បញ្ជីបើកប្រាក់ខែសម្រាប់ខែសីហាបានបង្ហាញពីការចំណាយរហូតដល់ទៅជាង១០០លានរៀល ឬស្មើនឹងជាង២ម៉ឺនដុល្លារក្នុងមួយខែសម្រាប់ទីប្រឹក្សាលោកងួន ញ៉ឹលតែម្នាក់។
ក្រុមអ្នកតំណាងរាស្ត្រគណបក្សសម រង្ស៊ីបានកត់សម្គាល់ក្នុងលិខិតរបស់ខ្លួនថា ចំនួនទីប្រឹក្សាដ៏ច្រើនសន្ធឹកសន្ធាប់បែបនេះបាននាំឲ្យរដ្ឋសភាខាតបង់ថវិកាយ៉ាងច្រើន។ លោកសុន ឆ័យបានអះអាងថា ថ្នាក់ដឹកនាំរដ្ឋសភាផ្សេងៗទៀតក៏ទំនងជាមានទីប្រឹក្សាយ៉ាងច្រើនបែបនេះដែរ។ ម្យ៉ាងទៀត ក្រុមអ្នកតំណាងរាស្ត្រគណបក្សប្រឆាំងបានត្អូញត្អែរអំពីការលាក់លៀមព័ត៌មានរបស់រដ្ឋសភាទាក់ទងនឹងការចំណាយផ្សេងៗ ជាពិសេស ការចំណាយទៅលើបុគ្គលិកតែម្តង។ នេះជាហេតុផលដែលតំណារាស្ត្រទាំងនោះបានលើកឡើង និងស្នើឲ្យប្រធានរដ្ឋសភាបំភ្លឺ។
លោកងួន ញ៉ឹលមិនអាចទាក់ទងសុំការបំភ្លឺបានទេ នៅថ្ងៃនេះដោយអ្នកលើកទូរស័ព្ទអះអាងថា លោកមានរវល់។ លោកជាម យៀប ប្រធានគណៈកម្មការហិរញ្ញវត្ថុនៃរដ្ឋសភាបានអះអាងថា លោកមិនបានឃើញលិខិតរបស់តំណាងរាស្ត្រគណបក្សសម រង្ស៊ីទេ ហើយលោកក៏មិនដឹងថា លោកងួន ញ៉ឹលមានទីប្រឹក្សាប៉ុន្មាននាក់ដែរ។
ភាពមិនប្រក្រតីជុំវិញការចំណាយរបស់រដ្ឋសភាធ្លាប់ត្រូវបានលេចឮជាច្រើនលើករួចមកហើយ ក្នុងរយៈពេលជាង១០ឆ្នាំនៃអាណត្តិរបស់ខ្លួនកន្លងទៅនេះ ជាពិសេសទាក់ទងនឹងការចំណាយទៅលើបុគ្គលិកតែម្តង។ គណបក្សប្រឆាំងតែងលើកឡើងអំពីការលាក់បាំងចំនួនបុគ្គលិកពីសំណាក់អគ្គលេខាធិការដ្ឋានរដ្ឋសភា។
ប៉ុន្តែ លោកជាម យៀបបានបដិសេធព័ត៌មាននេះដោយលោកអះអាងថា រដ្ឋសភាមិនបានលាក់បាំងអ្វីទេ ហើយតំណាងរាស្ត្របក្សប្រឆាំងអាចដឹងព័ត៌មានទាំងនេះ ប្រសិនបើពួកគេពិតជាចង់ដឹងហើយព្យាយាមទាក់ទងទៅអគ្គលេខាធិការដ្ឋានរដ្ឋសភានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ