ផ្សព្វផ្សាយពីប្រាក់ឈ្នួលអប្បបរមាថ្មីសម្រាប់កម្មករ
ក្រសួងការងារនិងបណ្តុះបណ្តាលវិជ្ជាជីវៈបានប្រកាសផ្សព្វផ្សាយ ដល់សមាគមថៅកែរោងចក្រកាត់ដេរ ព្រមទាំងសហជីពតំណាងកម្មករ អំពីការអនុវត្តប្រាក់ឈ្នួលអប្បបរមាថ្មី សម្រាប់កម្មករនិយោជិត ផ្នែកឧស្សាហកម្មវាយនភ័ណ្ឌ កាត់ដេរ និងផលិតស្បែកជើង។ នោះគឺការតម្លើងប្រាក់ខែកម្មករ ដែលទើបតែបានសម្រេច កាលពីថ្ងៃទី៨កក្កដា នឹងត្រូវអនុវត្តចាប់ពីថ្ងៃទី១ ខែតុលា ឆ្នាំ២០១០ រហូតដល់ឆ្នាំ២០១៤។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ
មន្ត្រីក្រសួងការងារ បានប្រកាសពីការសម្រេចតម្លើងប្រាក់ខែថ្មី ទៅដល់ថៅកែរោងចក្រ និងសហជីពតំណាងកម្មករ ក្នុងកិច្ចប្រជុំមួយ នៅព្រឹកថ្ងៃពុធ។ នោះគឺប្រាក់ឈ្នួលអប្បបរមា (ប្រាក់ខែទាបបំផុត ) សម្រាប់កម្មករ សាកល្បងការងារ ពី ១ ខែ ទៅ ៣ ខែ ដែលបច្ចុប្បន្នមាន ចំនួន ៤៥ ដុល្លារ ត្រូវបានតម្លើងបន្ថែម រហូតដល់ចំនួន ៥៦ ដុល្លារ។
ចំណែកកម្មករពេញសិទ្ធិ ដែលបច្ចុប្បន្ន មានប្រាក់ខែទាបបំផុតចំនួន ៥០ ដុល្លារ ត្រូវតម្លើងដល់ចំនួន ៦១ ដុល្លារ។
ការសម្រេចតម្លើងប្រាក់ឈ្នួលអប្បបរមាថ្មីនេះ ត្រូវបានធ្វើឡើងនៅក្នុងកិច្ចប្រជុំចរចាត្រីភាគី របស់ក្រុមប្រឹក្សាការងារ ដែលមាន ភាគីនិយោជក តំណាងថៅកែរោងចក្រ, ភាគីសហជីពតំណាងកម្មករ និងភាគីរដ្ឋាភិបាល តំណាងដោយក្រសួងការងារ កាលពីថ្ងៃទី៨ ខែកក្កដា ឆ្នាំ២០១០។
សេចក្តីប្រកាសផ្សព្វផ្សាយនៅព្រឹកមិញ ក៏បានកត់សម្គាល់ថា ការអនុវត្តប្រាក់ឈ្នួលអប្បបរមាថ្មីនេះ ត្រូវចាប់ផ្តើមពីថ្ងៃទី១ ខែតុលា ឆ្នាំ២០១០ រហូតដល់ឆ្នាំ២០១៤។ នៅឆ្នាំ២០១៤ ទើបគណៈកម្មការប្រឹក្សាការងារ នឹងធ្វើការពិនិត្យពិភាក្សាឡើងវិញ អំពីបញ្ហាប្រាក់ឈ្នួលអប្បបរមា សម្រាប់កម្មករ ផ្នែកវាយនភ័ណ្ឌ កាត់ដេរ និងផលិតស្បែកជើង។
សេចក្តីប្រកាសពីការអនុវត្ត ចំពោះការតម្លើងប្រាក់ខែកម្មករ នៅថ្ងៃនេះ បានធ្វើឡើង ក្នុងពេលដែលមានសហជីពកម្មករមួយចំនួន មិនសុខចិត្ត និងបន្តការតវ៉ា រហូតដល់ព្រមានធ្វើកូដកម្ម មិនចូលធ្វើការ រយៈពេល ១ សប្តាហ៍ ចាប់ពីថ្ងៃទី១៣ ខែកញ្ញា ខាងមុខ។
លោក អាត់ ធន់ ប្រធានសហភាពការងារកម្ពុជា ដែលដឹកនាំសហជីព តំណាងកម្មករជាង ១១០.០០០ នាក់ ក្នុងវិស័យកាត់ដេរ បានបញ្ជាក់នៅថ្ងៃនេះថា សហជីពរបស់លោក នៅតែប្រកាន់ជំហរ បន្តការទាមទារ ហើយកូដកម្មនឹងផ្ទុះឡើង ដើម្បីជម្រុញឲ្យមានការចរចាតម្លើងប្រាក់ខែកម្មករ និងផលប្រយោជន៍មួយចំនួនដល់កម្មករ។
ក្រោយការប្រកាសសម្រេចតម្លើងប្រាក់ខែកម្មករ កាលពីថ្ងៃទី៨ កក្កដា មានសហជីពមួយចំនួន ដែលដឹកនាំដោយលោក អាត់ ធន់ មិនយល់ស្រប។ ពួកគេទាមទារឲ្យមានការចរចាឡើងវិញ ដោយស្វែងរកការតម្លើងប្រាក់ខែកម្មករ រហូតដល់ចន្លោះពី ៧៥ ដុល្លារ ទៅ ៩៣ ដុល្លារ ព្រោះថា ប្រាក់ខែកម្មករបច្ចុប្បន្ន និងការតម្លើងដល់ ៦១ ដុល្លារនោះ មិនអាចឲ្យកម្មករ ចំណាយគ្រប់គ្រាន់ក្នុងជីវភាពរស់នៅបានទេ។
យ៉ាងណាក៏ដោយ បន្ទាប់ពីថ្លែងបើកកិច្ចប្រជុំផ្សព្វផ្សាយពីការអនុវត្តប្រាក់ឈ្នួលអប្បបរមាថ្មី សម្រាប់កម្មករនិយោជិត ផ្នែកឧស្សាហកម្មវាយនភ័ណ្ឌ កាត់ដេរ និងផលិតស្បែកជើង នៅព្រឹកថ្ងៃទី២៥ ខែសីហា លោក អ៊ំ មាន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានថ្លែងប្រាប់ក្រុមអ្នកកាសែតថា សេចក្តីសម្រេចរបស់ក្រុមប្រឹក្សាការងារ នៅក្នុងការតម្លើងប្រាក់ឈ្នួលអប្បបរមាដល់កម្មករ គឺនៅដដែល ពោលគឺគ្មានការពិចារណាពីរឿងប្រាក់ខែកម្មករឡើងវិញទេ។
ចំណែកមន្ត្រីអធិការកិច្ច របស់ក្រសួងការងារ លោក អ៊ិន ខេមរ៉ា ក៏បានលើកឡើងថា ប្រាក់ឈ្នួលកម្មករ ត្រូវធ្វើយ៉ាងណា ឲ្យកម្មករអាចរស់បាន ហើយសហគ្រាស រោងចក្រកាត់ដេរ ក៏អាចរស់បាន ដូចគ្នា។ មួយវិញទៀត បើសិនជាត្រូវតម្លើងប្រាក់ខែកម្មករ លើសពីសេចក្តីសម្រេច ដូចដែលបានព្រមព្រៀងគ្នា នោះសហគ្រាសរោងចក្រកាត់ដេរ មិនអាចដំណើរការបានទេ។
ក៏ប៉ុន្តែបើតាមអ្នកស្រាវជ្រាវសេដ្ឋកិច្ចវិញ បានរកឃើញថា ភាគីថៅកែរោងចក្រ អាចតម្លើងប្រាក់ខែកម្មករ ចន្លោះពី ៧៥ ទៅ ៩៣ ដុល្លារ ដោយគ្រាន់តែរោងចក្រសហគ្រាស កាត់បន្ថយ ការចំណេញរបស់ខ្លួនប៉ុណ្ណោះ។ ជាធម្យមកម្មករម្នាក់ អាចរកចំណេញដល់រោងចក្រ បានជាង ២០០ ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ