កម្ពុជាបដិសេធដំណឹងពីការដោះលែងបុរសថៃ ៣ នាក់
នៅថ្ងៃអង្គារនេះ អាជ្ញាធរកម្ពុជាបានបដិសេធនូវដំណឹងអំពីការដោះលែងបុរសថៃ ៣ នាក់ ដែលកំពុងជាប់ឃុំឃាំងនៅពន្ធនាគារខេត្តសៀមរាប។ បុរសថៃទាំង៣ នាក់នោះត្រូវបានអាជ្ញាធរខេត្តឧត្តរមានជ័យចាប់ខ្លួននិងចោទប្រកាន់ពីបទឆ្លងដែនខុសច្បាប់ និងប្រើប្រាស់អាវុធខុសច្បាប់កាលពីថ្ងៃទី១៨សីហា។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ
មន្ត្រីជាន់ខ្ពស់រដ្ឋាភិបាលកម្ពុជាព្រះរាជអាជ្ញា ព្រមទាំងអភិបាលខេត្តសៀមរាបបានបដិសេធនូវដំណឹង ដែលផ្សាយក្នុងកាសែតថៃអំពីការដោះលែងបុរសថៃ ៣ នាក់។ បុរសថៃទាំង ៣ នាក់នោះ ជាប់ចោទពីបទប្រើប្រាស់អាវុធខុសច្បាប់និងបទឆ្លងដែនចូលទឹកដីកម្ពុជាដោយខុសច្បាប់។ ជនទាំងបីដែលកំពុងជាប់ឃុំឃាំងក្នុងពន្ធនាគារខេត្តសៀមរាបត្រូវបានចាប់ខ្លួននៅព្រំដែនកម្ពុជា-ថៃ ក្នុងខេត្តឧត្តរមានជ័យ កាលពីថ្ងៃទី១៨ ខែសីហា ឆ្នាំ២០១០។
ព្រះរាជអាជ្ញាតុលាការខេត្តសៀមរាប-ឧត្តរមានជ័យ លោក ទី សុវិនថាល់ បានប្រាប់កាសែតក្នុងស្រុកនៅថ្ងៃនេះថា មិនមានលិខិតអធិបញ្ជា ជាផ្លូវការណាមួយ ដើម្បីបង្គាប់ឲ្យដោះលែងជនជាតិថៃទាំង ៣ នាក់ ចូលមកកាន់តុលាការ នៅឡើយទេ។
បច្ចុប្បន្ន ជនជាតិថៃទាំងបី កំពុងជាប់ឃុំឃាំងនៅក្នុងពន្ធនាគារខេត្តសៀមរាប ដើម្បីរង់ចាំការកាត់ទោស។
ចំណែកលោក ស៊ូ ភិរិន្ទ អភិបាលខេត្តសៀមរាប ក៏បានបដិសេធនូវព័ត៌មានដែលកាសែតថៃ បានចុះផ្សាយនៅថ្ងៃនេះថា លោកនាយករដ្ឋមន្ត្រី ហ៊ុន សែន បានបញ្ជាឲ្យមានការដោះលែងបុរសថៃទាំងបីនាក់នោះ។
ជាមួយគ្នានោះមន្ត្រីជាន់ខ្ពស់រដ្ឋាភិបាលកម្ពុជា លោក ទិត សុធា បានលើកឡើងថា បញ្ហាបុរសជនជាតិថៃទាំងបី ដែលកំពុងជាប់ឃុំឃាំងនៅពន្ធនាគារខេត្តសៀមរាប គឺស្ថិតនៅក្នុងច្បាប់របស់កម្ពុជា។
ការលើកឡើងរបស់មន្ត្រីជាន់ខ្ពស់កម្ពុជាបែបនេះ បានធ្វើឡើងភ្លាមៗ តបទៅនឹងអភិបាលខេត្តសូរិន្ទ របស់ប្រទេសថៃ លោក រ៉ាភី ភុងប៊ូភាគិត ( Raphee Pongbuppakit )ដែលត្រូវកាសែតថៃ The Nation ស្រង់សម្តីមកចុះផ្សាយនៅថ្ងៃទី២៤សីហានេះថា លោកនាយករដ្ឋមន្ត្រី ហ៊ុន សែន បានចេញបញ្ជាទៅកាន់អភិបាលខេត្តសៀមរាប ឲ្យដោះលែងបុរសថៃ បីនាក់នោះ។ បទបញ្ជានៃដោះលែងបុរសថៃទាំងនោះ កើតចេញពីការវិវត្តន៍ថ្មីចុងក្រោយ រវាងទំនាក់ទំនងការទូត ដែលប្រសើរឡើងវិញ របស់កម្ពុជា និងថៃ ក្រោយពីលោក ថាក់ស៊ីន បានលាឈប់ពីតំណែងជាទីប្រឹក្សាផ្នែកសេដ្ឋកិច្ច របស់លោកនាយករដ្ឋមន្ត្រី និងរដ្ឋាភិបាលកម្ពុជា។
ចំណែករដ្ឋមន្ត្រីការបរទេសថៃ លោក កាស៊ីត ភីរម្យ ( Kasit Piromya ) ក៏បានប្រាប់កាសែតថៃនៅថ្ងៃនេះថា បុរសថៃទាំងបីនាក់ ដែលត្រូវចាប់ឃុំខ្លួន នៅខេត្តសៀមរាប នឹងត្រូវដោះលែង ឲ្យវិលត្រឡប់ទៅកាន់ប្រទេសថៃវិញ ក្នុងរយៈពេលយ៉ាងយូរបីថ្ងៃទៀត។ រដ្ឋមន្ត្រីការបរទេសថៃ ក៏មានជំនឿថា ទំនាក់ទំនងរវាងកម្ពុជា និងថៃ នឹងវិលទៅរកសភាពធម្មតាឡើងវិញ ហើយអាចនឹងជួយដោះស្រាយ នូវរាល់ជម្លោះទាំងអស់រវាងប្រទេសកម្ពុជា និងថៃផងដែរ។
អាជ្ញាធរថៃ បានអះអាងថា បុរសថៃទាំងបីនាក់នោះ ត្រូវបានចាប់ខ្លួន ក្នុងពេលពួកគេ ដើររុករកអនុផលព្រៃឈើ ហើយឆ្លងដែន ចូលក្នុងតំបន់ព្រំដែនជម្លោះរវាងប្រទេសទាំងពីរ។
ក៏ប៉ុន្តែកាលពីចុងឆ្នាំមុន យ៉ាងហោចណាស់ មានពលរដ្ឋខ្មែរចំនួន ១៦ នាក់ ត្រូវបានតុលាការថៃ ក្នុងខេត្តអ៊ូប៊ុន ជាប់ព្រំប្រទល់ប្រទេសកម្ពុជា កាត់ទោសឲ្យជាប់ពន្ធនាគារពីជាង ៣ ឆ្នាំ ទៅជិត៥ ឆ្នាំ ដោយហេតុតែការដើររុករកអនុផលព្រៃឈើនៅតំបន់ព្រំដែនកម្ពុជា-ថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ