អង្គភាពប្រឆាំងអំពើពុករលួយ អង្កេតលើការប្រមូលពន្ធផ្លូវ
ដោយមានការលើកឡើងពីភាពមិនប្រក្រតី ក្នុងការបង់ពន្ធផ្លូវនាពេលថ្មីៗនេះ អង្គភាពប្រឆាំងអំពើពុករលួយ របស់រដ្ឋាភិបាល បានបើកការស្រាវជ្រាវ ចុះស៊ើបអង្កេត នៅតាមទីកន្លែងបង់ពន្ធមួយចំនួន។ ជាលទ្ធផល អង្គភាពនេះ រកមិនឃើញការយកថ្លៃលើសកំណត់ប្រាក់ពន្ធទេ។ ក៏ប៉ុន្តែលោកទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ បានព្រមានថា នឹងមិនលើកលែងទេ ចំពោះមន្ត្រីពន្ធដារណា ដែលបានយកលុយលើសតម្លៃកំណត់។ បើសិនជាមានពាក្យបណ្តឹង និងមានភស្តុតាងគ្រប់គ្រាន់នោះ អង្គភាពប្រឆាំងអំពើពុករលួយ នឹងចាត់ការតាមច្បាប់ ដោយគ្មានការអនុគ្រោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លី ម៉េងហួរ
ក្រោយពីទទួលបានដំណឹងពីការបង់ពន្ធផ្លូវលើសចំនួនកំណត់ក្នុងតារាងពន្ធដារ កាលពីសប្តាហ៍មុន អង្គភាពប្រឆាំងអំពើពុករលួយ របស់រដ្ឋាភិបាល ដែលទើបតែបង្កើតថ្មី បានពង្រាយកម្លាំងចុះស៊ើបអង្កេតករណីនេះភ្លាមៗ។
នៅព្រឹកថ្ងៃច័ន្ទទី ២៣សីហា បន្ទាប់ពីចូលរួមក្នុងសន្និសីទរវាងតម្លាភាពអន្តរជាតិ កម្ពុជា និងកូរ៉េ ស្តីពី ការប្រឆាំងអំពើពុករលួយ ដើម្បីសម្រេចបានការអភិវឌ្ឍន៍ លោកទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ បានលើកឡើងថា ពន្ធយានយន្ត លើមធ្យោបាយដឹកជញ្ជូន ក្នុងមួយឆ្នាំៗ រដ្ឋប្រមូលបានប្រហែលជា ១០ លានដុល្លារ ហើយបើត្រូវបាត់បង់ប្រហែលជា ១ លានដុល្លារ ដូចការលើកឡើងរបស់អង្គការសង្គមស៊ីវិលមែននោះ វាជារឿងដ៏ធ្ងន់ធ្ងរមួយ។
តាមសេចក្តីរាយការណ៍ ពន្ធម៉ូតូមួយគ្រឿងតម្លៃ ៤.៥០០ រៀល តែត្រូវមន្ត្រីពន្ធដារតម្រូវឲ្យបង់ដល់ ៦.០០០ រៀល។ ចំណែករថយន្ត ត្រូវបង់លើសតម្លៃពន្ធពី ៥.០០០ រៀល ទៅ ១០.០០០ រៀល។ ការបង់ពន្ធលើសតម្លៃកំណត់នេះ ត្រូវបានអង្គការសង្គមស៊ីវិល ប៉ាន់ស្មានថា ត្រូវខាតបង់ប្រាក់ប្រមាណ ១ លានដុល្លារ ក្នុងមួយឆ្នាំៗ។
ក្រុមអង្គការសង្គមស៊ីវិល បានចាត់ទុកករណីយកលុយពន្ធ លើសចំនួនកំណត់នេះ ជាអំពើពុករលួយ តាមរយៈការប្រើប្រាស់ នូវតួនាទីសិទ្ធិអំណាចរបស់មន្ត្រីសាធារណៈ ដើម្បីផលប្រយោជន៍ផ្ទាល់ខ្លួន។
ចំពោះបញ្ហានេះ លោក ឱម យិនទៀង បានលើកឡើងថា អង្គភាពរបស់លោក នឹងចាត់ការតាមច្បាប់ ហើយរីករាយនឹងសហការ បើមានភស្ថុតាងគ្រប់គ្រាន់ថា មន្ត្រីពន្ធដារ យកលុយលើសតម្លៃពន្ធ ដែលបានកំណត់មែននោះ។
លោក ឱម យិនទៀង បានបញ្ជាក់ថា អង្គភាពប្រឆាំងអំពើពុករលួយ នឹងចាត់ការ ដោយបណ្តេញភ្នាក់ងារពន្ធដារនោះ ចេញពីកន្លែងធ្វើការ ដោយគ្មានការលើកលែងទេ ប្រសិនបើមានភស្តុតាងគ្រប់គ្រាន់ បញ្ជាក់ថា មន្ត្រីពន្ធដារនោះ យកលុយលើសចំនួនកំណត់។
យ៉ាងណាក៏ដោយ លោក ឱម យិនទៀង បានអះអាងថា មន្ត្រីរបស់អង្គភាពប្រឆាំងអំពើពុករលួយ របស់លោក រកមិនឃើញការយកលុយលើសចំនួនកំណត់ទៀតទេ។ លោក បន្ថែមថា នេះក៏ដោយសារតែមានសេចក្តីជូនដំណឹងពីអគ្គនាយកដ្ឋានពន្ធដារ របស់ក្រសួងសេដ្ឋកិច្ច ដែលបានកំណត់ ឲ្យភ្នាក់ងារពន្ធដារ យកតម្លៃពន្ធផ្លូវត្រឹមត្រូវលើតារាងរួចមក។ ប៉ុន្តែលោក ឱម យិនទៀង បានអះអាងថា ភ្នាក់ងារស៊ើបអង្កេតរបស់អង្គភាពប្រឆាំងអំពើពុករលួយ នៅតែចុះឃ្លាំមើលជាប់ជានិច្ច នៅតាមកន្លែងប្រមូលពន្ធផ្លូវ ក្រែងលោមានការយកលុយលើសកើតឡើងវិញ។
សូមរម្លឹកថា ការប្រមូលពន្ធផ្លូវលើយានយន្តគ្រប់ប្រភេទ សម្រាប់ឆ្នាំ ២០១០ ត្រូវធ្វើឡើងចាប់ពីថ្ងៃទី ២០ ខែកក្កដា រហូតដល់ថ្ងៃទី ២០ ខែតុលា ឆ្នាំ ២០១០។
ចំណែកលោក សន ជ័យ អ្នកសម្របសម្រួលក្រុមការងារសង្គមស៊ីវិល ដើម្បីគណនេយ្យភាព និងតម្លាភាពសង្គម ដែលបានបើកយុទ្ធនាការប្រឆាំងការបង់ពន្ធផ្លូវ លើសចំនួនកំណត់ បានអះអាងថា មកដល់ថ្ងៃនេះ មន្ត្រីពន្ធដារ បានបិទព្យួរនូវតារាងតម្លៃពន្ធផ្លូវ នៅតាមកន្លែងបង់ពន្ធ ហើយយកតាមតម្លៃពន្ធនោះត្រឹមត្រូវ។
ក៏ប៉ុន្តែអ្នកបង់ពន្ធមួយចំនួន នៅភ្នំពេញ បានអះអាងថា ពួកគេត្រូវបង់លុយលើសចំនួនកំណត់ដដែល ដើម្បីទិញបានពន្ធម៉ូតូ ហើយឡានត្រូវលើស ៥.០០០ រៀល ដូចពេលមុនៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ