ព្រះអង្គម្ចាស់ នរោត្តម រណឬទ្ធិបារម្ភខ្លាចបាត់បង់គណបក្សជាតិនិយម
ព្រះអង្គម្ចាស់ នរោត្តម រណឬទ្ធិ បានចេញព្រះភក្ត្រដ៏កម្ររបស់ព្រះអង្គប្រាប់ទៅថ្នាក់ដឹកនាំគណបក្ស ជាតិនិយមអោយពិចារណាលើផលប៉ះពាល់នៃការធ្វើសម័្ពន្ធភាពជាមួយគណបក្ស ហ៊្វុនស៊ីនប៉ិច។ ព្រះអង្គម្ចាស់ នរោត្តម រណឬទ្ធិដែលបានយាងចូលនិវត្តន៍ពីនយោបាយហើយនោះ បានសម្តែងការព្រួយបារម្ភអំពីការបាត់បង់តំណែងតួនាទីរបស់មន្ត្រី គណបក្សជាតិនិយម បន្ទាប់ពីព្រះអង្គទទួលបានការពន្យល់ពីក្រុមប្រឹក្សាធម្មនុញ្ញថា ក្រសួងមហាផ្ទៃ ត្រូវលុបឈ្មោះគណបក្សនយោបាយ ដែលបានប្រកាសរួមបញ្ចូលគ្នានោះ ចេញពីបញ្ជីគណបក្សនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
នៅថ្ងៃចន្ទទី ២៣សីហានេះ ព្រះអង្គម្ចាស់ នរោត្តម រណឬទ្ធិ បានផ្ញើលិខិតមួយទៅថ្នាក់ដឹកនាំគណបក្សជាតិនិយមដើម្បីអោយថ្នាក់ដឹកនាំគណបក្សនេះពិចារណាអំពីផលប៉ះពាល់ដែលកើតចេញពីការធ្វើសម្ព័ន្ធភាព ឬការរួមបញ្ចូលគ្នាជាមួយគណបក្សហ៊្វុនស៊ីនប៉ិច។ គណបក្សទាំងពីរបានចុះហត្ថលេខាលើពិធីសារនៃការចងសម្ព័ន្ធភាពជាមួយគ្នាកាលពីថ្ងៃទី ៧ខែមិថុនា។
បើតាមព្រះរាជសារលិខិតរបស់ព្រះអង្គម្ចាស់ នរោត្តមរណឬទ្ធិ ព្រះអង្គត្រូវសម្តែងការព្រួយបារម្ភយ៉ាងនេះ ពីព្រោះគណបក្សជាតិនិយមសព្វថ្ងៃនេះ បានកើតចេញពីការធ្វើសមាជផ្លាស់ប្តូរឈ្មោះពីគណបក្ស នរោត្តម រណឬទ្ធិ។
ការព្រួយបារម្ភ បានកើតឡើងបន្ទាប់ពីមានការស្នើអោយក្រុមប្រឹក្សាធម្មនុញ្ញបកស្រាយអំពីអនាគតនៃគណបក្សដែលចង់រួមបញ្ចូលគ្នាដូចគណបក្សហ៊្វុនស៊ីនប៉ិច និងគណបក្សជាតិនិយមនេះ។ ឆ្លើយតបទៅនឹងសំណួររបស់លោក សៅ រ៉ានី តំណាងរាស្ត្រគណបក្សជាតិនិយម ទាក់ទងនឹងការរួមបញ្ចូលគណបក្សនេះ ក្រុមប្រឹក្សាធម្មនុញ្ញ បានបកស្រាយថា ក្រសួងមហាផ្ទៃត្រូវលុបឈ្មោះគណបក្សនយោបាយដែលបានប្រកាសរួមបញ្ចូលគ្នានោះ ចេញពីបញ្ជីគណបក្សនយោបាយបន្ទាប់ពីបានទទួលលិខិតជូនដំណឹងពីការរួមបញ្ចូលគ្នានេះ។
ការបកស្រាយបែបនេះ នឹងធ្វើអោយបាត់បង់តំណែង តួនាទីនៃសមាជិករដ្ឋសភា ក្រុមប្រឹក្សាឃុំ សង្កាត់ ស្រុក ខេត្ត ក្រុង រាជធានី។ គណបក្ស នរោត្តម រណឬទ្ធិ ឬគណបក្សជាតិនិយមធ្លាប់ចូលរួមប្រកួតក្នុងការបោះឆ្នោតក្រុមប្រឹក្សាឃុំ សង្កាត់ ឆ្នាំ ២០០៧ ចូលរូមក្នុងការបោះឆ្នោតតំណាងរាស្ត្រឆ្នាំ ២០០៨ទទួលបាន ២អាសនៈក្នុងរដ្ឋសភា និងបានចូលរួមក្នុងការបោះឆ្នោតក្រុមប្រឹក្សាស្រុក ក្រុង រាជធានី ដោយមានសមាសភាពជាប់ឆ្នោតជាតិ ៤០រូប។
ព្រះអង្គម្ចាស់ នរោត្តម រណឬទ្ធិ បានមានព្រះបន្ទូលថា ព្រះអង្គមិនប្រឆាំងការរួបរូមណាមួយនោះទេ ប៉ុន្តែព្រះអង្គមិនអាចទទួលយកបានការរួបរួមដែលធ្វើអោយគណបក្សជាតិនិយម អតីតគណបក្សនរោត្តម រណឬទ្ធិបាត់បង់នោះឡើយ។
នៅក្នុងលិខិតឆ្លើយតបភ្លាមៗទៅព្រះអង្គម្ចាស់ នរោត្តម រណឬទ្ធិនៅថ្ងៃនេះ ដើម្បីកុំអោយព្រះអង្គព្រួយព្រះទ័យ គណបក្សជាតិនិយម បានទូលបញ្ជាក់ប្រាប់ព្រះអង្គម្ចាស់ នរោត្តម រណឬទ្ធិអំពីខ្លឹមសារនៃពិធីសារដែលមានចែងធានាអធិបតេយ្យនៃគណបក្សទាំងពីររហូតដល់ចប់អាណត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ