នាយករដ្ឋមន្ត្រីព្រមានដកតំណែងមន្ត្រីដែលធ្វើអន្តរាគមន៍ផ្លាស់ប្តូរតំណែង
ក្រុមមន្ត្រីរដ្ឋាភិបាលកម្ពុជា និងបក្សប្រឆាំងបានថ្លែងគាំទ្រ នៅថ្ងៃនេះ ចំពោះចំណាត់ការរបស់លោកនាយករដ្ឋមន្ត្រីហ៊ុន សែនដែលនឹងចាត់វិធានការដកហូតតំណែងបច្ចុប្បន្នចំពោះមន្ត្រីណាដែលទទួលអន្តរាគមន៍ឲ្យមានការផ្លាស់ប្តូរ ឬតែងតាំងតំណែងមិនប្រក្រតីនានា។ លោកហ៊ុន សែន នៅសបា្តហ៍នេះបានព្រមានដល់គ្រប់ក្រសួងស្ថាប័នរដ្ឋ កងទ័ព និងនគរបាលត្រូវបញ្ឈប់ទាំងស្រុងនូវវប្បធម៌អន្តរាគមន៍សុំឲ្យមានការផ្លាស់ប្តូរ និងតែងតាំងតំណែងខុសដែនសមត្ថកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់នេត្រ ភក្រ្តា
ការព្រមានខ្លាំងៗនេះត្រូវបានប្រមុខរដ្ឋាភិបាលកម្ពុជាថ្លែង នៅក្នុងកិច្ចប្រជុំគណៈរដ្ឋមន្ត្រី កាលពីថ្ងៃសុក្រ។ គឺជាវិធានការបន្ថែមទៀតដើម្បីពង្រឹង និងបង្កើនវប្បធម៌ប្រឆាំងសតិអារម្មណ៍បក្សពួក និងគ្រួសារនិយម។ មិនតែប៉ុណ្ណោះ ចំណាត់ការនេះត្រូវបានធ្វើឡើងក្នុងស្មារតីនៃការងារអភិបាលកិច្ចល្អ និងដើម្បីលើកទឹកចិត្តដល់មន្ត្រីសកម្មដែលបំពេញការងារមានប្រសិទ្ធិភាព ក៏ដូចជាធានាឲ្យការអនុវត្តន៍កំណែទម្រង់របស់រដ្ឋាភិបាលឲ្យបានជោគជ័យ។
ជាមួយគ្នានេះ លោកផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានគូសបញ្ជាក់ថា ប្រសិនបើ មន្ត្រីពាក់ព័ន្ធនានានៅតែបន្តរំលោភអនុសាសន៍របស់ប្រមុខរដ្ឋាភិបាល គឺទាំងមន្ត្រីដែលធ្វើអន្តរាគមន៍ក្នុងការផ្លាស់ប្តូរ និងតែងតាំងតំណែង រួមទាំងមន្ត្រីដែលទទួលបានតំណែងដែលកើតចេញពីកិច្ចអន្តរាគមន៍នោះ នឹងត្រូវដកចេញពីតំណែងទាំងអស់។
លោក ផៃ ស៊ីផាន បានថ្លែងថា អ្វីដែលលោកនាយករដ្ឋមន្ត្រីបានសម្រេច គឺជាការលើកកម្ពស់កំណែទម្រង់រដ្ឋបាល និងការប្រឆាំងនឹងអំពើពុករលួយ នៅក្នុងទិដ្ឋភាពអំណាច និងហិរញ្ញវត្ថុ ដែលមានន័យថា ធ្វើឲ្យមានសណ្តាប់ធ្នាប់ ក្នុងរដ្ឋបាលសាធារណៈ និងបំបាត់អំពើពុករលួយហិរញ្ញវត្ថុ។ ទន្ទឹមនឹងការព្រមានដកតំណែង ប្រមុខរដ្ឋាភិបាលកម្ពុជា ក៏បានប្រកាស នាពេលថ្មីៗនេះថា នៅឆ្នាំ ២០១០នេះ នឹងមិនមានការជ្រើសរើសមន្ត្រីរាជការបន្ថែមជំនួសមន្ត្រីចូលនិវត្តន៍ទេ លើកលែងតែគ្រូពេទ្យ និងគ្រូបង្រៀនដែលត្រូវអនុញ្ញាតឲ្យរើសចូល។
បើតាមការថ្លែងឲ្យដឹងរបស់ប្រមុខរដ្ឋាភិបាល នាពេលថ្មីៗនេះ នៅឆ្នាំ២០១០នេះ មានការស្នើដាក់ឲ្យចូលនិវត្តន៍មន្ត្រីរាជការដោយមិនមានការជ្រើសរើសទេ។ មិនតែប៉ុណ្ណោះ រដ្ឋាភិបាលក៏ប្រកាសផ្អាកដំឡើងឋានន្តរស័ក្តិ ផ្អាកការតែងតាំងនានារាប់ទាំងមន្ត្រីទាហាន នគរបាល។ ការផ្អាកនេះត្រូវបានលោកហ៊ុន សែន ពន្យល់ថា ដោយសារតែការចំណាយលើបុគ្គលិក បានឡើងខ្ពស់ពី ៣,៦% ដល់ ៤,៧% នៃផលិតផលក្នុងស្រុកសរុប GDP ឆ្នាំ ២០០៩ ហើយវាស្មើនឹង ៤៤%នៃចំណាយចរន្តសម្រាប់វិស័យបុគ្គលិក។ វិធានការផ្អាកការជ្រើសមន្ត្រីរាជការឆ្នាំ ២០១០ ត្រូវបានលោកនាយករដ្ឋមន្ត្រីពន្យល់ថា ដើម្បីរក្សាស្ថិរភាពម៉ាក្រូសេដ្ឋកិច្ច។
ជាមួយគ្នានេះដែរ លោកនាយករដ្ឋមន្ត្រី បានអំពាវនាវដល់ក្រសួងស្ថាប័នរដ្ឋ កងទ័ព និងនគរបាលថា កុំឲ្យដាក់ផែនការរើសមន្ត្រីច្រើន ពេកនៅពេលដែលមានការបើកឲ្យរើសមន្ត្រីរាជការឡើងវិញ នៅឆ្នាំ ២០១១ ដែលអាចធ្វើឲ្យប៉ោងក្របខ័ណ្ឌមន្ត្រីរាជ ការ និងចំណាយប្រាក់លើបុគ្គលិកធំជ្រុល។ លោកបានចោទសំណូរថា តើរដ្ឋាភិបាលបានប្រាក់ឯណាទៅជួយប្រជាពលរដ្ឋនៅក្នុងការកសាងហេដ្ឋារចនាសម្ព័ន្ធផ្សេងៗ។ ជាមួយគ្នានេះដែរ លោកថ្លែងថារដ្ឋាភិបាលមិនអនុញ្ញាតឲ្យមន្ត្រីម្នាក់មានក្របខណ្ឌពីរ ទទួលប្រាក់ខែពីរនោះទេ ដែលមនុស្សទូទៅស្គាល់ថា ជាមន្ត្រីខ្មោច។
ចំណោមមន្ត្រីរាជការរបស់រដ្ឋាភិបាលកម្ពុជាក្នុង ២៦ ក្រសួង និងរដ្ឋលេខាធិការដ្ឋានចំនួនពីរ គេបានរកឃើញមានមន្ត្រីខ្មោច ឬមន្ត្រីរាជការមានតែឈ្មោះជាង ២០០០នាក់។ មន្ត្រីរដ្ឋាភិបាលបានលើកឡើងថា ចំនួនមន្ត្រីខ្មោចនេះអាចនឹងធ្វើឲ្យរដ្ឋាភិបាលខាតបង់ប្រាក់យ៉ាងហោចណាស់ប្រមាណ ២ លានដុល្លារអាមេរិក ក្នុងមួយឆ្នាំៗសម្រាប់ការចំណាយទៅលើប្រាក់ខែរបស់ពួកគេ។
ទាំងមន្ត្រីបក្សប្រឆាំង និងសង្គមស៊ីវិល បានស្វាគមន៍ចំពោះចំណាត់ការ និងការព្រមានរបស់លោកនាយក រដ្ឋមន្ត្រីចំពោះមន្ត្រីណាដែលចូលចិត្តធ្វើអន្តរាគមន៍ក្នុងការតែងតាំង និងផ្លាស់ប្តូរតំណែងមន្ត្រីនៅក្នុងក្របខ័ណ្ឌនានា ប៉ុន្តែពួកគេបានថ្លែងថា មានត្រឹមតែអនុសាសន៍ ឬវិធានការនៅលើក្រដាស គឺមិនទាន់គ្រប់គ្រាន់ទេ ត្រូវមានការអនុវត្តន៍ជាក់ស្តែងផងដែរ។ លោកយឹម សុវណ្ណ ជាតំណាងរាស្ត្រ និងអ្នកនាំពាក្យគណបក្សសម រង្ស៊ី បានថ្លែងនៅថ្ងៃនេះ ថា គណបក្សសម រង្ស៊ីគាំទ្រចំណាត់ការនេះ ហើយប្រសិនបើមានប្រសិទ្ធភាព នោះគឺជាការល្អ ព្រោះបញ្ហានេះគណបក្សសម រង្ស៊ីមានការព្រួយបារម្ភជាយូរមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ