បក្សប្រឆាំងព្រួយបារម្ភពីការបាត់បង់លទ្ធិប្រជាធិបតេយ្យនៅកម្ពុជា
នៅថ្ងៃសុក្រទី ២០ សីហានេះ ក្រុមអ្នកតំណាងរាស្ត្រគណបក្សសមរង្ស៊ី បានសម្តែងការព្រួយបារម្ភយ៉ាងខ្លាំង ដោយប្រកាសថា កម្ពុជា អាចនឹងបាត់បង់នូវលទ្ធិប្រជាធិបតេយ្យ។ លោកតំណាងរាស្ត្រ សុន ឆ័យ បានលើកឡើងថា រដ្ឋសភានីតិកាលទី ៤នេះ ស្ថិតក្រោមការគ្រប់គ្រងរបស់គណបក្សកាន់អំណាច ហើយតំណាងរាស្ត្រគណបក្សប្រឆាំង ត្រូវបានរើសអើង និងគ្មានតួនាទីអ្វី នៅក្នុងរដ្ឋសភាឡើយ។ ម្យ៉ាងទៀត សមាជិករដ្ឋាភិបាល ពុំបានគោរពឲ្យបានត្រឹមត្រូវតាមគោលការណ៍ច្បាប់ ចំពោះការឆ្លើយតបនឹងសំណួរអ្នកតំណាងរាស្ត្រ ទាំងជាលាយលក្ខណ៍អក្សរ និងដោយផ្ទាល់មាត់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ
ក្តីបារម្ភថា កម្ពុជាអាចនឹងបាត់បង់នូវលទ្ធិប្រជាធិបតេយ្យ ក៏ដោយសារតែក្រុមតំណាងរាស្ត្រគណបក្សសមរង្ស៊ី បានមើលឃើញពីការបាត់បង់នូវតួនាទីរបស់រដ្ឋសភា។ នោះគឺរដ្ឋសភាកម្ពុជាសព្វថ្ងៃ នៅអាណត្តិទី ៤នេះ ចុះខ្សោយកាន់តែខ្លាំង និងបាត់បង់តួនាទីតាមដានការងាររបស់រដ្ឋាភិបាល ដើម្បីជម្រុញឲ្យមានការទទួលខុសត្រូវ ប្រសិទ្ធិភាព និងតម្លាភាព ជាដើម គឺពុំបានអនុវត្តឲ្យបានត្រឹមត្រូវទេ។
ក្នុងសន្និសីទកាសែត នៅព្រឹកមិញ លោក សុន ឆ័យ ប្រធានក្រុមអ្នកតំណាងរាស្ត្រគណបក្សសមរង្ស៊ី បានលើកឡើងថា រដ្ឋសភានីតិកាលទី ៤នេះ ត្រូវបានរៀបចំគ្រប់គ្រង ខុសពីអាណត្តិមុនៗ។ រដ្ឋសភា ស្ថិតក្រោមការចាត់ចែង និងដឹកនាំផ្តាច់មុខពីគណបក្សកាន់អំណាច ខុសពីគោលការណ៍អនុវត្តសម្រាប់សភាក្នុងរបបប្រជាធិបតេយ្យ សេរី ពហុបក្ស។ មួយវិញទៀត តួនាទីអ្នកតំណាងរាស្ត្រគណបក្សប្រឆាំងក្នុងរដ្ឋសភាមិនត្រូវបានគោរព ហើយគណបក្សប្រឆាំង ទទួលរងនូវការរើសអើងផងដែរ។
ក្នុងសេចក្តីថ្លែងការណ៍នៅថ្ងៃនេះ គណបក្សសមរង្ស៊ី បានលើកឡើងថា សមាជិករដ្ឋាភិបាល ពុំបានគោរពឲ្យបានត្រឹមត្រូវតាមគោលការណ៍រដ្ឋធម្មនុញ្ញ មាត្រា ៩៦ ស្តីពី ការឆ្លើយនឹងសំណួរអ្នកតំណាងរាស្ត្រ ទាំងជាលាយលក្ខណ៍អក្សរ និងដោយផ្ទាល់មាត់។ ជាមួយគ្នានោះ រដ្ឋាភិបាល នៅតែបន្តលាក់ទុកនូវឯកសារសាធារណៈ រួមមាន កិច្ចសន្យាជំនួញ ការផ្តល់អាជ្ញាប័ណ្ណ និងសម្បទានគម្រោងអភិវឌ្ឍន៍នានា ហើយធ្វើការសម្រេចចិត្ត ដោយគ្មានតម្លាភាព និងមិនមានការចូលរួមពីតំណាងប្រជាពលរដ្ឋ។
តាមលោកតំណាងរាស្ត្រ សុន ឆ័យ ក្នុងរយៈពេល ១៧ ឆ្នាំ ចាប់តាំងពីឆ្នាំ ១៩៩៣ មកដល់ពេលនេះ មានរដ្ឋមន្ត្រីតែ ៦ រូប ប៉ុណ្ណោះ បានចូលឆ្លើយបំភ្លឺ ដោយផ្ទាល់មាត់ ក្នុងរដ្ឋសភា ខណៈដែលរដ្ឋមន្ត្រីខ្លះ មិនបានអើពើឆ្លើយតបនឹងសំណួររបស់តំណាងរាស្ត្រឡើយ។ នៅឆ្នាំ ២០០៩ សំណួរតំណាងរាស្ត្របក្សប្រឆាំង ដាក់ទៅរដ្ឋាភិបាលមានចំនួន ១៣២ លិខិត តែសមាជិករដ្ឋាភិបាល ឆ្លើយបានតែ ៣៩ លិខិត។ ចំណែកនៅក្នុងរយៈពេល ៨ ខែក្នុងឆ្នាំ២០១០នេះ តំណាងរាស្ត្រគណបក្សសមរង្ស៊ី ដាក់សំណួរទៅរដ្ឋាភិបាលចំនួន ៤៧ លិខិត ហើយរដ្ឋាភិបាល ឆ្លើយបានតែ ១៥ លិខិតប៉ុណ្ណោះ។
យ៉ាងណាក៏ដោយ លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី បានលើកឡើងថា កន្លងមក មន្ត្រីរដ្ឋាភិបាលតែងតែធ្វើលិខិតឆ្លើយតបនឹងសំណួរតំណាងរាស្ត្រ ត្រឹមត្រូវតាមច្បាប់ ហើយពេលខ្លះ ចូលឆ្លើយ ដោយផ្ទាល់មាត់ នៅក្នុងសភាផងដែរ។
លោក ទិត សុធា បានបន្ថែមថា រដ្ឋាភិបាលរបស់គណបក្សប្រជាជនកម្ពុជា ដែលទទួលបានសម្លេងគាំទ្រដ៏ច្រើនលើសលប់ក្នុងរដ្ឋសភា តែងតែដឹកនាំប្រទេស តាមបែបលទ្ធិប្រជាធិបតេយ្យ ដោយគោរពសិទ្ធិប្រជាពលរដ្ឋ ជាម្ចាស់ឆ្នោត ស្របតាមគោលការណ៍ប្រជាធិបតេយ្យ មិនមែនជារដ្ឋាភិបាលផ្តាច់ការ គ្មានច្បាប់ទម្លាប់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ