អគ្គលេខាធិការអាស៊ានចង់ឃើញដំណោះស្រាយសន្តិវិធីក្នុងជម្លោះកម្ពុជាថៃ
ក្រោយពីប្រមុខការទូតកម្ពុជាសរសេរលិខិតផ្ញើទៅប្រធានអាស៊ានដើម្បី ស្វែងរកអន្តរាគមន៍ពីអាស៊ានក្នុងជម្លោះព្រំដែនខ្មែរថៃ កម្ពុជានៅមិនទាន់ទទួលបានការឆ្លើយតបយ៉ាងណានៅឡើយទេ អំពីមធ្យោបាយនៃការដោះស្រាយវិបត្តិនេះ។ នៅថ្ងៃនេះ អគ្គលេខាធិការអាស៊ាន លោកស៊ូរិន ពិតសុវណ្ណបានជួបជាមួយប្រមុខរដ្ឋាភិបាល និងប្រមុខការទូតរបស់កម្ពុជា ហើយថា អាស៊ានចង់បានការដោះស្រាយដោយសន្តិវិធី។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់លាង ដឺលុចពីទីក្រុងភ្នំពេញ
នៅក្នុងជំនួបព្រឹកថ្ងៃទី១៦សីហា នៅឯក្រសួងការបរទេសកម្ពុជា ប្រមុខការទូតកម្ពុជាលោកហោ ណាំហុងថ្លែងថា កម្ពុជាចង់បានការដោះស្រាយមួយដោយសន្តិភាពក្នុងជម្លោះព្រំដែនជាមួយថៃ។ លោកហោ ណាំហុងថ្លែងប្រាប់អ្នកសារព័ត៌មានថា កម្ពុជាត្រៀមគ្រប់លក្ខណៈក្នុងការដោះស្រាយបញ្ហាព្រំដែនជាមួយប្រទេសថៃ។ គ្រប់ទម្រង់នៃការចរចា ព្រមទាំងយោធាផង។ ប៉ុន្តែ លោកហោ ណាំហុងបញ្ជាក់ថា កម្ពុជាចង់បានការដោះស្រាយដោយសន្តិវិធី។
ការអះអាងដូចគ្នានេះបានចេញពីមាត់របស់អគ្គលេខាធិការអាស៊ានផងដែរ។ លោកស៊ូរិនបានឆ្លើយតបយ៉ាងខ្លីចំពោះសំណួរអ្នកកាសែត នៅក្រោយជំនួបជាមួយលោកហោ ណាំហុងនៅក្រសួងការបរទេស។ លោកស៊ូរិនឆ្លើយថា ពិតប្រាកដណាស់ យើងចង់ឃើញការដោះស្រាយដោយសន្តិភាពចំពោះបញ្ហាទាំងអស់ដែលកើតឡើងក្នុងក្របខណ្ឌអាស៊ាន។
វត្តមានរបស់លោកស៊ូរិន ពិតសុវណ្ណនៅកម្ពុជាអាចជាភាពចៃដន្យ។ ពីព្រោះថា បើតាមការបញ្ជាក់របស់លោកឧបនាយករដ្ឋមន្ត្រីហោ ណាំហុង លោកអគ្គលេខាធិការអាស៊ានរូបនេះត្រូវនាំគណៈប្រតិភូថ្នាក់ដឹកនាំសាសនាអ៊ីស្លាម មកជួបសហគមន៍ខ្មែរអ៊ីស្លាម នៅកម្ពុជាដើម្បីពង្រឹងកិច្ចសហប្រតិបត្តិការជាមួយគ្នា។ ម្យ៉ាងវិញទៀត វត្តមានរបស់លោកស៊ូរិននៅកម្ពុជានៅពេលនេះ គឺដោយសារលោកស៊ូរិនត្រូវចូលរួមក្នុងលំហាត់ហ្វឹកហ្វឺន ការរៀបចំ និងប្រឆាំងមេរោគឆ្លងរាតត្បាតពីប្រទេសមួយទៅប្រទេសមួយ ដែលលំហាត់នេះត្រូវរៀបចំក្នុងកម្រិតថ្នាក់តំបន់ រយៈពេល៥ថ្ងៃនៅភ្នំពេញ។
ក្រោយពីការសរសេរទៅកាន់ប្រធានអាស៊ាន កាលពីថ្ងៃសៅរ៍ទី១៦សីហា ដើម្បីស្វែងរកការសម្រុះសម្រួលពីអាស៊ាននោះ ការឆ្លើយតប ឬដំណឹងយ៉ាងណាជាផ្លូវការពីអាស៊ាននោះ គឺកម្ពុជានៅមិនទាន់ទទួលបានអ្វីនៅឡើយទេ។ គឺមានតែការជួបគ្នាជាមួយអគ្គលេខាធិការអាស៊ាននៅថ្ងៃនេះតែប៉ុណ្ណោះ។ ប៉ុន្តែថា អគ្គលេខាធិការអាស៊ានមិនអាចធ្វើសេចក្តីសម្រេចអ្វីឡើយ។ បើតាមលោកហោ ណាំហុង ដោយដកភាគីជម្លោះគឺ កម្ពុជានិងថៃចេញ គឺមានតែរដ្ឋមន្ត្រីការបរទេសអាស៊ានចំនួន៨ទៀតឯណោះទេ ដែលជាអ្នកមានសិទ្ធិផ្តល់យោបល់យ៉ាងណាៗនោះ។ ហើយជាធម្មតាទេ ពួកគេត្រូវការពេលវេលាដើម្បីពិចារណាលើមធ្យោបាយនៃការដោះស្រាយក្នុងសំណុំរឿងកម្ពុជាថៃនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ