ប្រជាជាតិរបស់ទន្លេមេគង្គក្រោម ពិភាក្សាគ្នាអំពីការប្រើប្រាស់ទឹក
តំណាងមកពីប្រទេសកម្ពុជា ឡាវ ថៃ និងវៀតណាមកំពុងពិភ្សាគ្នានៅក្នុងកិច្ចប្រជុំថ្នាក់តំបន់មួយដែល ត្រូវបានរៀបចំនៅក្នុងទីក្រុងវៀងច័ន្ទប្រទេសឡាវ។ កិច្ចប្រជុំរយៈពេលពីរថ្ងៃក្នុងក្របខណ្ឌសមាជិកទន្លេមេគង្គក្រោម ត្រូវពិភាក្សាគ្នាអំពីការទាញយកផលប្រយោជន៍ពីទឹកទន្លេមេគង្គប្រកប ដោយចេរភាព។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុចពីទីក្រុងភ្នំពេញ
មន្ត្រីរដ្ឋាភិបាល អ្នកជំនាញ អ្នកស្រាវជ្រាវ ភ្នាក់ងារអភិវឌ្ឍន៍ សង្គមស៊ីវិលជាតិ និងអន្តរជាតិ និងផ្នែកឯកជនមកពីប្រទេសកម្ពុជា វៀតណាម ឡាវ និងថៃកំពុងជួបពិភាក្សានៅក្នុងកិច្ចប្រជុំថ្នាក់តំបន់ក្នុងទីក្រុងវៀងចន្ទប្រទេសឡាវ។
ប្រធានបទជាច្រើនត្រូវបានលើកឡើងនៅក្នុងកិច្ចប្រជុំរយៈពេល២ថ្ងៃនេះ ទាក់ទងទៅនឹងការប្រើប្រាស់ធនធានទឹកទន្លេមេគង្គនាពេលអនាគត ដើម្បីជាប្រភពនៃការអភិវឌ្ឍន៍សេដ្ឋកិច្ច។ កិច្ចប្រជុំនេះត្រូវបានរៀបចំឡើងចំពេលដែល កំពុងមានគម្រោងសាងសង់វារីអគ្គីសនីចំនួន១២នៅតាមដងទន្លេមេគង្គផ្នែកខាងលើ និងមានគម្រោងវារីអគ្គីសនីជាង១០ទៀត ត្រូវគ្រោងសាងសង់នៅអាងទន្លេមេគង្គក្រោម។ គម្រោងវារីអគ្គីសនីទាំងនេះជាប្រធានបទដែលធ្វើឲ្យមានការព្រួយបារម្ភរបស់ក្រុមអ្នកការពារបរិស្ថាន។
នៅក្នុងកិច្ចពិភាក្សានេះ ក៏មានដាក់បង្ហាញដែលពីផលប៉ះពាល់ និងឱកាសនៃការស្រូបយកផលប្រយោជន៍ពីធនធានអាងទន្លេមេគង្គនេះតាមរយៈការនេសាទ ការប្រើប្រាស់ទឹកតាមព្រំដែនទឹក ការសាងសង់ប្រព័ន្ធធារាសាស្ត្រជាដើម។ ប្រធានបទសំខាន់មួយ គឺការផ្លាស់ប្តូរអាកាសធាតុក៏ជារបៀបវារៈនៃការពិភាក្សាផងដែរ។
ទន្លេមេគង្គត្រូវបានទទួលស្គាល់ថា ជាទន្លេធម្មជាតិមួយដែលមានសក្កានុពលមហាសាលសម្រាប់ការអភិវឌ្ឍន៍ប្រទេសនានានៅតាមដងទន្លេមេគង្គនេះ។ យោងតាមរបាយការណ៍របស់គណៈកម្មការទន្លេមេគង្គ មានមនុស្សជាង៦០លាននាក់ដែលកំពុងរស់នៅអាស្រ័យផល នៅផ្នែកអាងទន្លេមេគង្គក្រោម។ កសិកម្មគឺជាសកម្មភាពសេដ្ឋកិច្ចចាំបាច់តែមួយគត់សម្រាប់ប្រជាជនទាំងនេះ។ មានផ្ទៃដីធ្វើស្រែច្រើនជាង១០លានហិចតានៅតាមអាងទន្លេមេគង្គក្រោមដែលត្រូវប្រើប្រាស់ទឹកទន្លេមេគង្គនេះ។
ទោះយ៉ាងណាក៏ដោយ ទឹកជំនន់ប្រចាំឆ្នាំនៅតាមអាងទន្លេមេគង្គដែលជាទូទៅបានញ៉ាំញីប្រទេសកម្ពុជា និងវៀតណាមនោះបានធ្វើអោយខូចខាតដល់ការផលិតស្រូវដែលមានតម្លៃរាប់រយដុល្លារ។ ទន្លេមេគង្គក៏ជាផ្លូវផ្លាស់ប្តូរពាណិជ្ជកម្មដ៏សំខាន់មួយដែរ។ ជារៀងរាល់ឆ្នាំមានទំនិញជា៣សែនតោនត្រូវបានដឹកតាមនាវារវាងពីខេត្តគន់មីងប្រទេសចិន មកបាងកកប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ