បាតុកម្មប្រឆាំងការឈ្លានពានរបស់ថៃត្រូវបានរារាំង
ថ្ងៃនេះគឺជាថ្ងៃទី១៥កក្កដាដែលជាទិវារំលឹកខួប២ឆ្នាំនៃការឈ្លានពានរបស់ថៃមកលើប្រាសាទព្រះវិហារ។ប៉ុន្តែក្រុមអ្នករៀបចំបាតុកម្មដើម្បីប្រឆាំងទៅនឹងការឈ្លានពាននេះត្រូវបានរារាំងដោយសមត្ថកិច្ចប៉ូលិស។លោករ៉ុងឈុនប្រធាន សហភាពសហជីពកម្ពុជាដែលជាអ្នករៀបចំបាតុកម្មនេះបានសម្តែងការ ខកចិត្តនិងខឹងសម្បារចំពោះអាជ្ញាធរដែលបានរារាំងពួកគេមិនឲ្យជួបជុំដើម្បីដង្ហែរក្បួនបាតុកម្ម។យ៉ាងណាក៏ដោយកម្មវិធីត្រូវបានរៀបចំឡើងដោយសោះកក្រោះនៅឯទីស្នាក់ការសហជីពដែលមានមនុស្សចូលរួមតិចតួចប៉ុណ្ណោះ។
ចុះផ្សាយនៅថ្ងៃ៖
សេចក្តីរាយការណ៍របស់ ប៉ែន បូណា
កងកម្លាំងសមត្ថកិច្ចរាប់រយនាក់ត្រូវបានគេដាក់ពង្រាយនៅតាមដងវិថីនានានៅក្បែរសួនច្បារទល់មុខរដ្ឋសភាចាស់ទីដែលក្រុមបាតុករគ្រោងប្រមូលផ្តុំគ្នាដើម្បីប្រារព្ធទិវារំលឹកខួបទី២ឆ្នាំនៃការឈ្លានពានរបស់ថៃនៅព្រឹកថ្ងៃទី១៥កក្កដានេះ។
លោករ៉ុង ឈុន ប្រធានសហភាពសហជីពកម្ពុជានិងជាប្រធានសមាគមគ្រូបង្រៀនកម្ពុជាឯករាជ្យបានបង្ហាញខ្លួននៅឯគោលដៅជាមួយនឹងអ្នកចូលរួមប្រហែលជាង១០នាក់ផ្សេងទៀតបើទោះបីជាមានការរារាំង។ ប៉ុន្តែពួកគេមិនអាចធ្វើអ្វីបានក្រៅពីសេចក្តីថ្លែងការណ៍មួយចំនួនទៅកាន់ក្រុមអ្នកកាសែត។ មួយសន្ទុះក្រោយមកបាតុករមួយក្រុមតូចនោះក៏ត្រូវបានប៉ូលិសស្នើឲ្យបំបែកជួរដោយសន្តិវិធីដោយគ្មានអំពើហិង្សាកើតឡើងទេ។
ក្រុមអ្នកតវ៉ាមួយក្រុមតូចនេះក៏បានវិលទៅជួបជុំគ្នានៅឯទីស្នាក់ការសហជីពវិញនៅក្នុងខណ្ឌចំការមនរាជធានីភ្នំពេញ។ ពួកគេបានលើកបដារមួយចំនួនដែលមានន័យទាមទារឲ្យកងទ័ពថៃដកចេញពីទឹកដីកម្ពុជានិងបញ្ជាក់ថាប្រាសាទព្រះវិហារគឺជារបស់ខ្មែរ។ ថ្លែងទៅកាន់ក្រុមអ្នកកាសែតនៅទីនោះ លោករ៉ុង ឈុន បានសម្តែងការខកចិត្តយ៉ាងខ្លាំងចំពោះការរារាំងរបស់អាជ្ញាធរមិនឲ្យប្រារព្ធទិវារំលឹកនិងចងកំហឹងការឈ្លានពានរបស់ថៃ។ មេដឹកនាំសហជីពដែលលំអៀងទៅរកបក្សប្រឆាំងរូបនេះបានរិះគន់ថា សេរីភាពនៃការជួបជុំសម្តែងមតិនៅកម្ពុជាបានធ្លាក់ដល់កម្រិតទាបបំផុតមួយគួរឲ្យព្រួយបារម្ភ។
សហភាពសហជីពកម្ពុជាបានដាក់លិខិតមួយទៅសាលារាជធានីភ្នំពេញកាលពីថ្ងៃទី៦កក្កដាដើម្បីស្នើសុំការអនុញ្ញាតរៀបចំទិវារំលឹកខួបនៃការឈ្លានពានរបស់ថៃ។ ប៉ុន្តែសាលារាជធានីភ្នំពេញបានអនុញ្ញាតឲ្យរៀបចំនៅនឹងកន្លែងដោយហាមប្រាមមិនឲ្យរៀបចំនៅទីសាធារណៈឡើយ។ អាជ្ញាធរបានលើកឡើងអំពីបញ្ហាសន្តិសុខនិងសណ្តាប់ធ្នាប់សាធារណៈមកធ្វើជាមូលហេតុដើម្បីពន្យល់ពីការហាមប្រាមនេះ។ ប៉ុន្តែលោករ៉ុង ឈុន នៅតែប្រកាសធ្វើបាតុកម្មដដែលបើទោះបីជាមានការហាមប្រាមពីសំណាក់សាលារាជធានីនិងក្រសួងមហាផ្ទៃក៏ដោយ។
ប្រទេសថៃបានបញ្ជូនកងទ័ពចូលឈ្លានពានទឹកដីខ្មែរកាលពីថ្ងៃទី១៥កក្កដាឆ្នាំ២០០៨ពោលគឺមួយសប្តាហ៍បន្ទាប់ពីការចុះឈ្មោះប្រាសាទព្រះវិហារចូលក្នុងបញ្ជីបេតិកភណ្ឌពិភពលោក។ ចាប់តាំងពីពេលនោះមកយោធានៃប្រទេសទាំងពីរបានប្រឈមមុខដាក់គ្នាជារៀងរហូត។ យ៉ាងណាក៏ដោយលោកឧត្តមសេនីយ៍ស្រីឌឹក មេបញ្ជាការប្រចាំទិសព្រះវិហារបានអះអាងនៅថ្ងៃនេះថា ស្ថានការណ៍នៅតាមជាយដែនមានសភាពស្ងប់ស្ងាត់ជាធម្មតាទេនៅថ្ងៃទី១៥កក្កដានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ