លោកស្រី មួរ សុខហួរ ថ្លែងបញ្ជាក់សារជាថ្មីសុខចិត្តជាប់ពន្ធនាគារ
លោកស្រី មួរ សុខហួរ តំណាងរាស្ត្រគណបក្សប្រឆាំងដែលមានក្តីក្តាំជាមួយលោកនាយករដ្ឋមន្ត្រី ហ៊ុន សែន បានថ្លែងបញ្ជាក់សារជាថ្មី នៅថ្ងៃសៅរ៍នេះថា លោកស្រីមិនព្រមបង់ប្រាក់រឿងចាញ់ក្តីលោកនាយករដ្ឋមន្ត្រី ហ៊ុន សែនទេ ហើយលោកស្រីសុខចិត្តជាប់ពន្ធនាគារ។ ការអះអាងរបស់លោកស្រីបានធ្វើឡើងចំថ្ងៃកំណត់ចុងក្រោយរបស់តុលាការ ក្រុងភ្នំពេញដែលតម្រូវអោយលោកស្រីបង់ថ្លៃសងជំងឺចិត្តទៅកាន់លោក នាយករដ្ឋមន្ត្រីហ៊ុន សែន និងប៉ុន្មានថ្ងៃមុន កាលកំណត់បង់ប្រាក់ពិន័យចូលថវិការដ្ឋ។
ចុះផ្សាយនៅថ្ងៃ៖
បទអត្ថាធិប្បាយរបស់គី សុខលីំមពីទីក្រុងភ្នំពេញ
ថ្ងៃទី១០ខែកក្កដានេះ គឺជាថ្ងៃកំណត់ចុងក្រោយដែលតុលាការក្រុងភ្នំពេញតម្រូវអោយលោកស្រី មួរ សុខហួរ តំណាងរាស្ត្រគណបក្សសម រង្ស៊ីបង់ប្រាក់សំណងជំងឺចិត្តចំនួន២០០០ដុល្លារចំពោះការចាញ់ក្តីលោកនាយករដ្ឋមន្ត្រី ហ៊ុន សែន ពីបទបរិហារកេរ្តិ៍។ ប៉ុន្តែ នៅរសៀលថ្ងៃសៅរ៍នេះ លោកស្រី មួរ សុខហួរ បានបញ្ជាក់អះអាងប្រាប់សារជាថ្មីម្តងទៀតថា លោកស្រីនឹងប្រកាន់ជំហរដដែលគឺមិនបង់ប្រាក់ទេ។
លិខិតសាលាដំបូងរាជធានីភ្នំពេញដែលតម្រូវអោយលោកស្រី មួរ សុខហួរ បង់ប្រាក់ជំងឺចិត្ត ចុះថ្ងៃទី២៩ខែមិថុនាបានបញ្ជាក់ថា ប្រសិនបើលោកស្រីមិនព្រមបង់ប្រាក់ នៅថ្ងៃទី១០ខែកក្កដានេះទេ តុលាការនឹងអនុវត្តតាមច្បាប់។ ការអនុវត្តន៍តាមច្បាប់របស់តុលាការ ត្រូវបានអ្នកច្បាប់មួយចំនួនពន្យល់ថា តុលាការអាចបញ្ជាអោយគេសិក្សាទ្រព្យសម្បត្តិ ឬប្រាក់ខែរបស់លោកស្រី មួរ សុខហួរ។
ក្រោយពីការសិក្សាហើយ ប្រសិនបើគេសង្កេតឃើញថា លោកស្រី តំណាងរាស្ត្រមានទ្រព្យសម្បត្តិ ពេលនោះ គេអាចរឹបអូស ឬកាត់ប្រាក់ខែតែម្តង។ ប៉ុន្តែប្រសិនបើលោកស្រីមានទ្រព្យសម្បត្តិហើយមិនព្រមបង់សំណងនោះ គេអាចចាត់វិធានការចាប់ខ្លួនបានដែរ ប៉ុន្តែគ្រាន់តែនីតិវិធីច្បាប់ត្រូវធ្វើបន្តទៀតមុននឹងឈានទៅដល់ការចាប់ខ្លួននោះ។ ជារួម ការចាប់ខ្លួនមិនអាចធ្វើបានទេ នៅថ្ងៃសៅរ៍នេះ។
ចំពោះករណីបង់ប្រាក់ពិន័យចូលថវិការដ្ឋក្នុងសំណុំរឿងបណ្ដឹងជាមួយ លោកនាយករដ្ឋមន្ត្រី ហ៊ុន សែន ដដែលនោះ លោកស្រី មួរ សុខហួរ ត្រូវបានអយ្យការអមសាលាដំបូងរាជធានីភ្នំពេញតម្រូវអោយបង់ នៅថ្ងៃទី១៦ខែកក្កដាខាងមុខនេះ។
នៅក្នុងករណីបង់ប្រាក់ពិន័យនេះ លិខិតរបស់អយ្យការអមសាលាដំបូងរាជធានីភ្នំពេញបានបញ្ជាក់ថា ប្រសិនបើលោកស្រី មួរ សុខហួរ មិនព្រមបង់ទេ គេនឹងបញ្ជាអោយឃុំខ្លួនលោកស្រីតែម្តង។ ប៉ុន្តែ បើទោះបីជាយ៉ាងនេះក្តី លោកស្រី មួរ សុខហួរ បានបញ្ជាក់ដោយសម្ដីម៉ាត់ៗ នៅថ្ងៃសៅរ៍នេះថា លោកស្រីនឹងមិនបង់ទាំងអស់ ទាំងប្រាក់សងជំងឺចិត្តលោកនាយករដ្ឋមន្ត្រីហ៊ុន សែន ទាំងប្រាក់ពិន័យចូលថវិការដ្ឋ។
លោកស្រីបានបញ្ជាក់បន្តទៀតថា លោកស្រីនឹងមិនខ្លាចពន្ធនាគារនោះទេ។ សូមបញ្ជាក់ថា កាលពីម្សិលមិញ ក្នុងខណៈពេលដែលលោកស្រីកំពុងពិសារចង្រិតបំពងនៅនឹងដៃ លោកស្រីបានប្រាប់អ្នកកាសែតម្តងរួចមកហើយថា លោកស្រីសុខចិត្តជាប់ពន្ធនាគារ។ ហើយប្រសិនបើលោកស្រីជាប់ពន្ធនាគារមែននោះ លោកស្រីសំណូមពរអោយគេយកចង្រិតបំពងអោយលោកស្រីពិសារនៅក្នុងពន្ធនាគារផងពីព្រោះចង្រិតបំពង គឺជាអាហារដែលលោកស្រីចូលចិត្តខ្លាំងជាងគេ។
ទាក់ទងទៅនឹងករណីលោកស្រី មួរ សុខហួរ ដដែល នៅល្ងាចថ្ងៃសៅរ៍នេះ កិច្ចពិភាក្សាមួយត្រូវបានរៀបចំឡើងក្រោមចំណងជើងថា តើស្ត្រីគួរនៅស្ងៀមឬទេ?។
សេចក្តីប្រកាសព័ត៌មានរបស់អ្នករៀបចំកិច្ចពិភាក្សាបានបញ្ជាក់ថា ក្រុមស្ត្រីអ្នកតស៊ូមតិ កម្មករ-កម្មការិនី ថ្នាក់ដឹកនាំសហជីព គ្រូបង្រៀន អ្នកប្រកបរបរផ្លូវភេទ អាជីវករ ក្រុមអ្នករត់ម៉ូតូឌុប កសិករ និស្សិត មន្ត្រីរាជការបានសម្ដែងការព្រួយបារម្ភចំពោះសេរីភាពក្នុងការបញ្ចេញមតិនៅក្នុងប្រទេសកម្ពុជា។ ជាក់ស្តែង ករណីកាត់ទោសលោកស្រី មួរ សុខហួរ អោយចាញ់ក្តីលោកនាយករដ្ឋមន្ត្រី ហ៊ុន សែន ពីបទបរិហារកេរ្តិ៍។
សេចក្តីប្រកាសព័ត៌មានបានបន្តទៀតថា អ្នកចូលរួមកិច្ចពិភាក្សាគាំទ្រពេញទំហឹងចំពោះលោកស្រី មួរ សុខហួរ ដែលបានលះបង់កម្លាំងកាយ កម្លាំងចិត្តក្នុងការរួមចំណែកយ៉ាងសកម្មដើម្បីទាមទារអោយមានការគោរពសិទ្ធិមនុស្សជាពិសេសការគោរពសិទ្ធិស្ត្រីនិងសិទ្ធិកុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ