គណបក្សសម រង្ស៊ីរម្លឹកព្រឹត្តិការណ៍ផ្ទុះអាវុធខែកក្កដា១៩៩៧
គណបក្សសម រង្ស៊ីបានប្រារព្ធពិធីរាប់បាត្រព្រះសង្ឃ១៣អង្គ ដើម្បីរម្លឹកព្រឹត្តិការណ៍បង្ហូរឈាមថ្ងៃទី៥-៦ខែកក្កដាឆ្នាំ១៩៩៧។ លោកគង់ គាំ ប្រធានស្តីទីគណបក្សសម រង្ស៊ី ធ្វើជាអធិបតី នៅក្នុងពិធីនេះដែលមានអ្នកចូលរួមជាសកម្មជន និងអ្នកតំណាងរាស្ត្រទាំងអស់ប្រមាណ ៥០នាក់នៅក្នុងទីស្នាក់ការកណ្តាលគណបក្សសម រង្ស៊ីក្នុងទីក្រុងភ្នំពេញ។
ចុះផ្សាយនៅថ្ងៃ៖
បទអន្តរាគមន៍របស់លាង ដឺលុចពីទីក្រុងភ្នំពេញ
គណបក្សសម រង្ស៊ីក្រោមការដឹកនាំរបស់លោកគង់ គាំប្រធានស្តីទីបានរៀបចំពិធីរម្លឹកព្រឹត្តិការណ៍បង្ហូរឈាមថ្ងៃទី៥-៦កក្កដាឆ្នាំ១៩៩៧ តាមបែបសាសនា ជាមួយពិធីរាប់បាត្រព្រះសង្ឃចំនួន១៣អង្គ។ តាមពិត គួរតែគណបក្សហ៊្វុនស៊ីនប៉ិចទេដែលជាអ្នករៀបចំការរម្លឹកនេះ ព្រោះវាពាក់ព័ន្ធនឹងគណបក្សនេះសុទ្ធសាធ។
ប៉ុន្តែបើយោងតាមការបញ្ជាក់របស់លោកកែវ ពុទ្ធរស្មី ដែលជាសហប្រធានសម្ព័ន្ធភាពគណបក្សហ៊្វុនស៊ីនប៉ិច និងគណបក្សជាតិនិយម គណបក្សទាំងពីរដែលជាអតីតអ្នករស់នៅក្រោមដំបូលហ៊្វុនស៊ីនប៉ិច កាលពីឆ្នាំ១៩៩៧ ឥឡូវនេះកំពុងរវល់ជាមួយការងារសម្ព័ន្ធភាព រវល់ជាមួយការរៀបចំរចនាសម្ព័ន្ធនៅតាមខេត្តក្រុង។ ដូច្នេះពួកគេមិនមានពេលគ្រប់គ្រាន់ក្នុងការគិតគូរអំពីបញ្ហារម្លឹកព្រឹត្តិការណ៍ថ្ងៃទី ៥-៦កក្កដាឆ្នាំ១៩៩៧នោះទេ។
គួររម្លឹកថា ក្រុមគណបក្សហ៊្វុនស៊ីនប៉ិចនៅក្នុងខែកក្កដាឆ្នាំ១៩៩៧នោះ ត្រូវបានក្រុមកងកំលាំងរបស់លោកហ៊ុន សែនបង្ក្រាបយ៉ាងដំណំ ក្រោមការចោទប្រកាន់ថា ព្រះអង្គម្ចាស់នរោត្តមរណឬទ្ធិ ដែលពេលនោះជាអតីតនាយករដ្ឋមន្ត្រីទី១ បានចាប់ដៃជាមួយកំលាំងខ្មែរក្រហម ចង់ផ្តួលរំលំលោកហ៊ុន សែន។
ងាកមកនិយាយពីគណបក្សសម រង្ស៊ីវិញ ព្រឹកមិញនេះ មុននឹងរាប់បាត្រព្រះសង្ឃ១៣អង្គ លោកគង់ គាំ ប្រធានស្តីទី គឺជាអ្នកថ្លែងសុន្ទរកថា បាននិយាយអត្ថាធិប្បាយពីព្រឹត្តិការណ៍ថ្ងៃ៥-ថ្ងៃ៦ខែកក្កដាថា ជាថ្ងៃកំចាត់ក្រុមអ្នកប្រជាធិបតេយ្យតាមរយៈការប្រើប្រាស់កំលាំង តាមរយៈអាវុធ និងតុលាការជាដើម។ ហើយលោកគង់ គាំក៏និយាយថា គណបក្សសម រង្ស៊ីរបស់គាត់ក៏កំពុងទទួលរងការកំទេចដូចគ្នានេះដែរ។
សម្រាប់ខាងភាគីរដ្ឋាភិបាល ការរៀបចំពិធីបែបនេះរបស់គណបក្សសម រង្ស៊ី គឺគ្រាន់តែជាការកេងចំណេញនយោបាយតែប៉ុណ្ណោះ នេះជាការអះអាងរបស់លោកទិត សុធា។ លោកទិត សុធាដែលជាអ្នកនាំពាក្យអង្គភាពប្រតិកម្មរហ័សរបស់ទីស្តីការគណៈរដ្ឋមន្ត្រីបានថ្លែងថា តាមពិតព្រឹត្តិការណ៍ខែកក្កដាឆ្នាំ៩៧នោះ គឺជាថ្ងៃជោគជ័យរបស់រដ្ឋាភិបាលទៅវិញទេ ដែលបានកំទេចក្រុមឃុបឃិតនឹងពួកខ្មែរក្រហមដែលចង់ផ្តួលរដ្ឋាភិបាលនោះ។
កាលពីប៉ុន្មានសប្តាហ៍មុន លោកនាយករដ្ឋមន្ត្រីបានបង្ហើបថា លោកបានបញ្ជាអោយត្រៀមបទសម្ភាសន៍របស់លោកសេរី កុសលដែលនិយាយអំពីសារបាននៃព្រឹត្តិការណ៍៥-៦កក្កដា ប្រសិនបើមានការរម្លឹក ឬសេចក្តីថ្លែងការណ៍ណាមួយដែលនិយាយថា ព្រឹត្តិការណ៍ឆ្នាំ៩៧នោះ ត្រូវបានបង្កឡើងដោយលោកនាយករដ្ឋមន្ត្រីហ៊ុន សែននោះ។ ការដែលអោយលោកសេរី កុសលជាអ្នកនិយាយរៀបរាប់ពីព្រឹត្តិការណ៍នេះ គឺដោយសារលោកសេរី កុសលជាអតីតសមាជិកជាន់ខ្ពស់គណបក្សហ៊្វុនស៊ីនប៉ិច ហើយក៏អ្នកដឹងរឿងច្រើនអំពីបញ្ហានេះ។
តាមពិត ព្រឹត្តិការណ៍ឆ្នាំ៩៧នេះ ក៏ត្រូវបានលោកនាយករដ្ឋមន្ត្រីហ៊ុន សែន និយាយលើកឡើងជាញឹកញាប់ដែរ។ កាលឆ្នាំនោះ លោកហ៊ុន សែនគឺជានាយករដ្ឋមន្ត្រីទី២។ លោកហ៊ុន សែនតែងតែនិយាយបង្ហើបថា គឺកំលាំងគណបក្សហ៊្វុនស៊ីនប៉ិចទេដែលចាប់ដៃជាមួយក្រុមខ្មែរក្រហមប្រុងផ្តួលរំលំរូបលោក។ តែដោយសារលោកដឹងមុន ទើបបង្ក្រាបបានមុនទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ