រឿងអាស្រូវក្នុងវត្តស្រះចកបង្ខំឲ្យអាជ្ញាធររៀបចំសណ្តាប់ធ្នាប់ក្នុងវត្ត
ព្រះសង្ឃដូនជីនិងនិស្សិតដែលស្នាក់នៅក្នុងវត្តស្រះចកទាំងអស់ ត្រូវបានអាជ្ញាធរបង្ខំឲ្យចាកចេញពីវត្តរយៈពេលមួយសប្តាហ៍ ដើម្បីរៀបចំសណ្តាប់ធ្នាប់ជាថ្មី។ វិធានការនេះត្រូវបានចាត់ឡើងបន្ទាប់ពីការបែកធ្លាយរឿងអាស្រូវដ៏ ធំមួយនៅក្នុងទីអារាមនេះ ដោយសារតែព្រះសង្ឃមួយអង្គបានដាក់បង្កប់កាម៉េរ៉ាថតរូបជាច្រើននៅ ក្នុងបន្ទប់ទឹកដើម្បីថតរូបស្រីៗដែលងូតទឹកមន្ត ខណៈដែលពួកគេបានមករកព្រះសង្ឃអង្គនោះឲ្យស្រោចទឹករំដោះគ្រោះ។ អាជ្ញាធរកំពុងបើកការស៊ើបអង្កេតដ៏ធំមួយទៅលើសំណុំរឿងនេះ។
ចុះផ្សាយនៅថ្ងៃ៖
សេចក្តីរាយការណ៍របស់ ប៉ែន បូណា
អាជ្ញាធរខណ្ឌដូនពេញបានដឹកនាំកម្លាំងសមត្ថកិច្ចជាច្រើនចុះទៅកាន់វត្តស្រះចកនៅថ្ងៃសៅរ៍នេះ ដើម្បីបង្ខំឲ្យព្រះសង្ឃ ដូនជី រួមទាំងនិស្សិត ដែលស្នាក់នៅក្នុងវត្តទាំងអស់ចាកចេញពីវត្តមួយរយៈ ដើម្បីទុកឲ្យសមត្ថកិច្ចបើកការស៊ើបអង្កេតនិងរៀបចំសណ្តាប់ធ្នាប់ជាថ្មី។
វិធានការជម្លៀសព្រះសង្ឃ និងអ្នកស្នាក់នៅក្នុងវត្តស្រះចកនេះ ត្រូវបានចាត់ឡើងទៅតាមនីតិវិធីរបស់សមត្ថកិច្ចខណ្ឌដូនពេញដោយសហការជាមួយតុលាការនិងគណៈសង្ឃផង។ អាជ្ញាធរកំពុងបើកការស៊ីបអង្កេតដ៏ធំមួយនៅក្នុងទីអារាមដែលបង្កប់ដោយរឿងអាស្រូវដ៏គួរឲ្យភ្ញាក់ផ្អើល។ រឿងអាស្រូវបានផ្ទុះឡើងនៅពេលដែលអាជ្ញាធរបានរកឃើញថាអ្នកដែលលួចថតរូបស្រីៗងូតទឹកមន្តនៅក្នុងបន្ទប់ដែលមានរូបកាយអាក្រាតហើយត្រូវបានគេបាញ់តាមប្រព័ន្ធប៊្លូធូតចែកគ្នាមើលតាមទូរសព្ទ័ដៃពីមួយទៅមួយស្ទើរពាសពេញប្រទេសនោះ គឺជាព្រះសង្ឃដែលគង់នៅក្នុងវត្តស្រះចក។
ព្រះសង្ឃបរាជិកព្រះនាម នេត ខៃ ព្រះជន្ម៣៧វស្សាត្រូវបានគេចាប់ផ្សឹករួចហើយបញ្ជូនទៅតុលាការ។ ព័ត៌មានចុងក្រោយឲ្យដឹងថាមានរូបឃ្លីបវីដេអូរអាសអាភាសដល់ទៅរាប់ពាន់ដែលព្រះសង្ឃ នេត ខៃ បានថតទុកតាមរយៈការបង្កប់កាមេរ៉ានៅក្នុងបន្ទប់ទឹក។ រឿងអាស្រូវដែលធ្វើឲ្យកក្រើកពេញផ្ទៃប្រទេសនេះហើយដែលតម្រូវឲ្យអាជ្ញាធរនិងគណៈសង្ឃចាត់វិធានការស៊ើបអង្កេត។
សូមបញ្ជាក់ថានៅក្នុងវត្តស្រះចកមានព្រះសង្ឃទាំងអស់៧០អង្គ និងនិស្សិតជាង១០០នាក់ ព្រមទាំងដូនជី និងតាអាចារ្យជាច្រើនទៀតស្នាក់នៅ។ វិធានការជម្លៀសព្រះសង្ឃ និងអ្នកស្នាក់នៅក្នុងវត្តនេះ បានធ្វើឲ្យមានបញ្ហាប្រទាំងប្រទើសមួយចំនួនកើតឡើង។ ដូនជីមួយចំនួនបានយំស្រែកដោយមិនដឹងជាត្រូវទៅស្នាក់នៅទីណា។ ចំណែកឯព្រះសង្ឃវិញត្រូវបានគេបែងចែកឲ្យស្នាក់នៅបណ្តោះអាសន្នតាមទីអារាមនានានៅក្នុងរាជធានី។
រឿងអាស្រូវដ៏គួរឲ្យអាម៉ាស់នេះ ក៏បានបង្ខំឲ្យលោកចៅអធិការវត្តព្រះនាម មាសគង់ លាចេញពីមុខតំណែងដើម្បីជាការទទួលខុសត្រូវ។ អាជ្ញាធរមានបំណងរកឲ្យឃើញការពិតជុំវិញរឿងអាស្រូវក្នុងវត្តស្រះចកដែលបានកើតឡើងជាច្រើនឆ្នាំមកហើយ តែហេតុអ្វីក៏អ្នកទទួលខុសត្រូវ និងអ្នករស់នៅក្នុងវត្តនេះមិនបានដឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ