កម្ពុជាទាត់ចោលការចោទប្រកាន់របស់ថៃថាផ្តល់កន្លែងលាក់ខ្លួនដល់មេបាតុករអាវក្រហម
កម្ពុជាបានច្រានចោលនៅថ្ងៃនេះ ចំពោះការចោទប្រកាន់របស់ថៃ ថាអ្នកបោកគ្រាប់បែកក្បែរទីស្នាក់ការគណបក្សនៅក្រុងបាងកក បានរត់ចូលដីខ្មែរ។ មន្ត្រីរដ្ឋាភិបាលកម្ពុជា បានហៅការចោទប្រកាន់របស់ថៃ ម្តងហើយម្តងទៀតនេះ ថា មានបំណងចង់បង្ខូចកេរ្តិ៍ឈ្មោះកម្ពុជា។ កម្ពុជាបានស្នើឲ្យអាជ្ញាធរ និងប្រព័ន្ធផ្សព្វផ្សាយថៃ បញ្ឈប់រាល់ការផ្សាយព័ត៌មានមិនពិតទាំងឡាយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នេត្រ ភក្ត្រា
រដ្ឋាភិបាលកម្ពុជា តាមរយៈមន្ត្រីអ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី បានចេញសេចក្តីថ្លែងការណ៍នៅថ្ងៃនេះបញ្ចេញប្រតិកម្មខ្លាំងៗទាត់ចោលទាំងស្រុងនូវការចោទប្រកាន់របស់ក្រុមសន្តិសុខជាតិរបស់រដ្ឋាភិបាលថៃ។ ក្រុមសន្តិសុខជាតិតាមរយៈមន្ត្រីជំនួយការក្រសួងការបរទេសថៃ បានថ្លែងប្រាប់ប្រព័ន្ធផ្សព្វផ្សាយថាមេដឹកនាំក្រុមបាតុករអាវក្រហមពីរនាក់ដែលរត់គេចខ្លួនពីការតាមចាប់របស់សមត្ថកិច្ចកំពុងសម្ងំលាក់ខ្លួននៅក្នុងកាស៊ីណូមួយនៅក្រុងប៉ោយប៉ែតក្នុងទឹកដីប្រទេសកម្ពុជា។
លោកទិត សុធា មន្ត្រីអ្នកនាំពាក្យអង្គភាពព័ត៌មាន និងប្រតិកម្មរហ័សបានថ្លែងបន្ថែមថា កម្ពុជាសូមច្រានចោលទាំងស្រុងចំពោះការចោទ ប្រកាន់ដោយគ្មានមូលដ្ឋាន និងគ្មានការពិតរបស់ក្រុមសន្តិសុខថៃ។ លោកទិត សុធា បន្តទៀតថា ការចោទប្រកាន់ គ្មានការពិតនេះគឺបានបង្ហាញពីភាពកម្សោយរបស់ក្រុមចារកម្មថៃក្នុងការប្រមូលព័ត៌មាន និងជាការបង្កហេតុមួយ របស់រដ្ឋាភិបាលថៃមកលើកម្ពុជា ដោយការបង្វែរបញ្ហាដែលកំពុងតែកើតមាននៅទីក្រុងបាងកកមកកាន់កម្ពុជាដែលកំពុងតែរស់នៅក្នុងសុខសន្តិភាព។
នៅក្នុងសេចក្តីថ្លែងការណ៍ រដ្ឋាភិបាលកម្ពុជាបានស្នើសុំយ៉ាងទទូចដល់រដ្ឋាភិបាល និងបណ្តាញព័ត៌មានថៃឲ្យបញ្ឈប់ជាបន្ទាន់ និងទាំងស្រុងនូវចរិតបង្កហេតុក្នុងការផ្សព្វផ្សាយព័ត៌មានដែល មិនមានមូលដ្ឋានច្បាស់លាស់ ដែលបណ្តាលឲ្យមានការយល់ច្រឡំពីសំណាក់មតិសាធារណៈ ក្នុង និងក្រៅប្រទេស ហើយធ្វើឲ្យទំនាក់ទំនងទ្វេភាគីរវាងប្រទេសទាំងពីរធ្លាក់ក្នុងសភាពគ្រោះថ្នាក់។
ទំនាក់ទំនងកម្ពុជា-ថៃដែលនៅបន្តមានភាពតានតឹងជាមួយគ្នានៅឡើយចាប់តាំងពីមានការឈ្លានពានរបស់ក្រុមកងទ័ពឈុតខ្មៅថៃចូលឈ្លានពានទឹកដីកម្ពុជានៅក្នុងខេត្តព្រះវិហារចាប់ តាំងពីខែកក្កដា ឆ្នាំ ២០០៨ និងកាន់តែធ្ងន់ធ្ងររហូតដល់ដកឯកអគ្គរាជទូតរៀងៗខ្លួន បន្ទាប់ពីមានការតែងតាំងអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត្រា ធ្វើជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជា និងលោកនាយករដ្ឋមន្ត្រីហ៊ុន សែន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ