ហាមធ្វើរូបសំណាកមេដឹកនាំប្រទេសដែលនៅមានជីវិត
ខុទ្ទកាល័យលោកនាយករដ្ឋមន្ត្រី ហ៊ុន សែន អំពាវនាវដល់ស្ថាប័នរដ្ឋនិងសាធារណជនអោយបញ្ឈប់នូវការដាក់តាំងឬក៏ ដាក់លក់រូបសំណាកថ្នាក់ដឹកនាំប្រទេសកម្ពុជានិងបញ្ឈប់ការឆ្លាក់ឬ ចាក់ពុម្ពរូបថ្នាក់ដឹកនាំ។ ការធ្វើបែបនេះគឺជាការខុសឆ្គងទៅនឹងទំនៀមទម្លាប់នៃប្រទេស កម្ពុជាដែលហាមមិនអោយធ្វើរូបសំណាកឬឆ្លាក់រូបមនុស្សដែលកំពុងនៅ មានជីវិតនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គី សុខលីម
លោក ឱម យិនទៀង ទីប្រឹក្សាលោកនាយករដ្ឋមន្រ្តី ហ៊ុន សែន និងជាប្រធានអង្គភាពប្រឆាំងអំពើពុករលួយបានសរសេរលិខិតសុំទោសជាសាធារណៈចំពោះលោកនាយករដ្ឋមន្រ្តី ហ៊ុន សែន ទាក់ទងទៅនឹងការសាងសង់រូបសំណាករបស់លោកនាយករដ្ឋមន្ត្រី ហ៊ុន សែន។
នៅក្នុងលិខិតសុំទោសជាសាធារណៈដែលចេញផ្សាយកាលពីថ្ងៃព្រហស្បត៍ម្សិលមិញ លោក ឱម យិនទៀង បានបញ្ជាក់ប្រាប់ថា លោកបានធ្វើរូបសំណាកលោកនាយករដ្ឋមន្រ្តី ហ៊ុន សែនដោយឯកចិត្ត តាមចិត្តស្រលាញ់និងមនោសញ្ចេតនាផ្ទាល់ខ្លួនរបស់លោកដែលដឹងគុណគោរពនិងស្រលាញ់ដ៏ជ្រាលជ្រៅចំពោះលោកលោកនាយករដ្ឋមន្រ្តី ហ៊ុន សែន។ លោក ឱម យិនទៀង បានបន្តទៀតថា ការកសាងរូបសំណាកនេះបានធ្វើឡើងតាមការស្រឡាញ់និងការគោរពរបស់គាត់ ដោយលោកនាយករដ្ឋមន្ត្រី ហ៊ុន សែន មិនបានដឹងខ្លួនទេ ហើយប្រការនេះអាចនាំអោយប្រមុខរាជរដ្ឋាភិបាលស្ថិតក្នុងស្ថានភាពរងគ្រោះពីការរិៈគន់យ៉ាងអយុត្តិធម៌ពីមជ្ឈដ្ឋានមួយក្តាប់តូច ថានេះជាអំពើលើកតំឡើងបុគ្គល ដែលតាមពិតទៅ រូបលោកនាយករដ្ឋមន្រ្តី ហ៊ុន សែន ផ្ទាល់ លោកមិនដែលមាននូវគំនិតក្នុងខ្លួនរបស់លោកសូម្បីតែបន្តិចបន្តួចក៏ដោយក្តី។
ស្របពេលជាមួយគ្នា កាលពីមិ្សលមិញ ខុទ្ទកាល័យលោកនាយករដ្ឋមន្ត្រី ហ៊ុន សែន បានចេញលិខិតជូនដំណឹងមួយដោយអំពាវនាវដល់ស្ថាប័នរដ្ឋនិងសាធារណជនអោយបញ្ឈប់នូវការដាក់តាំងឬក៏ដាក់លក់រូបសំណាកថ្នាក់ដឹកនាំប្រទេសកម្ពុជានិងបញ្ឈប់ការឆ្លាក់ឬចាក់ពុម្ពរូបថ្នាក់ដឹកនាំ។ ការប្រកាសរបស់ខុទ្ទកាល័យលោកនាយករដ្ឋមន្រ្តី ហ៊ុន សែន បានធ្វើឡើងដោយសង្កេតឃើញថា កន្លែងមួយចំនួនបានដាក់តាំងរូបសំណាកថ្នាក់ដឹកនាំឆ្លាក់ឬចាក់ពុម្ពរូបថ្នាក់ដឹកនាំប្រទេសដើម្បីដាក់លក់សម្រាប់យកទៅតាំងនៅតាមលំនៅឋាន ឬធ្វើជាវត្ថុអនុស្សារីយ៍។
បើយោងតាមសេចក្តីជូនដំណឹងរបស់ខុទ្ទកាល័យលោកនាយករដ្ឋមន្ត្រី ហ៊ុន សែនការធ្វើបែបនេះគឺជាការខុសឆ្គងទៅនឹងទំនៀមទម្លាប់នៃប្រទេសកម្ពុជាដែលហាមមិនអោយធ្វើរូបសំណាកឬឆ្លាក់រូបមនុស្សដែលកំពុងនៅមានជីវិតនៅឡើយ។
សូមបញ្ជាក់ថា រូបសំណាករបស់លោកនាយករដ្ឋមន្រ្តី ហ៊ុន សែន ដែលផ្តួចផ្តើមគំនិតធ្វើដោយលោក ឱម យិនទៀង ហើយបានដាក់តាំងនៅច្រកចូលអង្គភាពប្រឆាំងអំពើពុករលួយត្រូវបានគេដកចេញវិញហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ