វេទិការវាងរាជរដ្ឋាភិបាល និងបណ្តាប្រទេសផ្តល់ជំនួយ
កិច្ចប្រជុំរវាងរដ្ឋាភិបាល និងបណ្តាលប្រទេសអ្នកផ្តល់ជំនួយ ដែលហៅជាផ្លូវការថា វេទិកាកិច្ចសហប្រតិបត្តិការអភិវឌ្ឍន៍កម្ពុជា លើកទី៣ បានបើកកិច្ចប្រជុំហើយ នៅព្រឹកថ្ងៃទី២ ខែមិថុនានេះ។ វេទិការយៈពេលពីរថ្ងៃនេះ ជាការប្រជុំពិនិត្យបូកសរុបសកម្មភាពកែទម្រង់លើគ្រប់វិស័យអភិវឌ្ឍន៍ របស់ប្រទេសកម្ពុជា។ ថ្នាក់ដឹកនាំរដ្ឋាភិបាលកម្ពុជា ក៏ត្រូវធ្វើការពិគ្រោះយោបល់ជាមួយបណ្តាប្រទេសអ្នកផ្តល់ជំនួយ លើទិដ្ឋភាពគន្លឹះផ្សេងៗ ដើម្បីជម្រុញនូវការអភិវឌ្ឍន៍ប្រទេសកម្ពុជាផងដែរ។
ចុះផ្សាយនៅថ្ងៃ៖
បទអន្តរាគមន៍របស់លី ម៉េងហួរពីទីក្រុងភ្នំពេញ
វេទិកាកិច្ចសហប្រតិបត្តិការអភិវឌ្ឍន៍កម្ពុជា ដែលជាកិច្ចប្រជុំរវាងមន្ត្រីរដ្ឋាភិបាល បណ្តាប្រទេសអ្នកផ្តល់ជំនួយ អង្គការសង្គមស៊ីវិល និងវិស័យឯកជនផងនោះ បានធ្វើឡើងដំបូង នៅខែមិថុនា ឆ្នាំ២០០៧។ ចំណែកវេទិកាលើកទី២ នៅខែធ្នូ ឆ្នាំ២០០៨។
ចំណែកវេទិកាកិច្ចសហប្រតិបត្តិការអភិវឌ្ឍន៍កម្ពុជា លើកទី៣ នៅពេលនេះ ត្រូវប្រារព្ធឡើង ក្រោមប្រធានបទ ស្តីពី ការសម្រេចឲ្យបានជោគជ័យនូវយុទ្ធសាស្ត្រចតុកោណ កំណើនការងារសមធម៌ និងប្រសិទ្ធិភាព ដំណាក់កាលទី២ តាមរយៈការអនុវត្តន៍ផែនការយុទ្ធសាស្ត្រអភិវឌ្ឍន៍ជាតិ បច្ចុប្បន្នកម្ម។
វេទិការយៈពេលពីរថ្ងៃ ដែលចាប់ផ្តើមនៅថ្ងៃពុធនេះ បានប្រារព្ធឡើងលើ របៀបវារៈចំនួន ៦ រួមមាន៖ ផែនការអភិវឌ្ឍន៍ជាតិបច្ចុប្បន្នកម្ម, យុទ្ធសាស្ត្រសម្រាប់កិច្ចអភិវឌ្ឍន៍ ក្រោយពីកលិយុគហិរញ្ញវត្ថុ និងសេដ្ឋកិច្ចពិភពលោក កម្មវិធីកំណែទម្រង់អាទិភាព ដើម្បីសម្រេចនូវផែនការយុទ្ធសាស្ត្រអភិវឌ្ឍន៍ជាតិបច្ចុប្បន្នកម្ម ការអនុម័តសុច្ចនាករតាមដានរួមគ្នា ឆ្នាំ២០១០ និងក្របខណ្ឌហិរញ្ញប្បទានណែនាំពហុឆ្នាំ។
នៅពេលបិទបញ្ចប់វេទិកានោះ ប្រទេសអ្នកផ្តល់ជំនួយ ត្រូវប្រកាសពីការសន្យាផ្តល់ជំនួយ សម្រាប់អភិវឌ្ឍន៍ប្រទេសកម្ពុជា។
របាយការណ៍ស្តីពីប្រសិទ្ធិភាពហិរញ្ញប្បទានសហប្រតិបត្តិការឆ្នាំ២០១០ បានបង្ហាញថា នៅឆ្នាំ២០១០នេះ រដ្ឋាភិបាលកម្ពុជា សង្ឃឹមថា នឹងអាចទទួលបានហិរញ្ញប្បទានសហប្រតិបត្តិការប្រមាណជាង ១ ០០០ លានដុល្លារអាមេរិក។ ចំណែកហិរញ្ញប្បទានសម្រាប់កិច្ចសហប្រតិបត្តិការឆ្នាំ២០០៩ គឺបណ្តាប្រទេសដៃគូអភិវឌ្ឍន៍ បានសម្រេចផ្តល់ជំនួយដល់កម្ពុជា ចំនួន ៩៨៩,៥ លានដុល្លារអាមេរិក។ ចំណែកឆ្នាំ២០០៨ មានចំនួន ៩៥៥,៦ លានដុល្លារអាមេរិក។
នៅពេលផ្តើមវេទិកា នៅព្រឹកមិញ ក្នុងបទអន្តរាគមន៍ថ្លែងដោយលោកស្រី Annette Dixon នាយិកាធនាគារពិភពលោក ប្រចាំកម្ពុជា ដែលជាតំណាងដៃគូអភិវឌ្ឍន៍ បានលើកបង្ហាញដោយសង្ខេបពីបញ្ហាប្រឈមនានា ដែលប្រទេសកម្ពុជាកំពុងជួបប្រទះ មានជាអាទិ៍ បញ្ហាអតិផរណា ទំនិញឡើងថ្លៃ គម្លាតខ្លាំងរវាងអ្នកមាន និងអ្នកក្រ បម្រែបម្រួលអាកាសធាតុ ជាដើម។ បញ្ហាដីធ្លី និងការប្រឆាំងអំពើពុករលួយ ក៏ត្រូវបានតំណាងម្ចាស់ជំនួយ លើកឡើងផងដែរ។
ជាមួយនឹងការលើកឡើងនេះ តំណាងប្រទេសម្ចាស់ជំនួយ ក៏បានកោតសសើររដ្ឋាភិបាលកម្ពុជា ការអនុម័តលើកម្មវិធីគ្រប់គ្រងព្រៃឈើជាតិ និងសកម្មភាពនៃការបង្ក្រាប ការកាប់ឈើខុសច្បាប់ នាពេលថ្មីៗនេះ។ លោកស្រីតំណាងដៃគូអភិវឌ្ឍន៍ បានគូសបញ្ជាក់ថា បណ្តាប្រទេសអ្នកផ្តល់ជំនួយ ត្រៀមខ្លួនជួយដល់កម្ពុជា ដើម្បីដោះស្រាយបញ្ហាប្រឈមទាំងអស់នេះ។
ក្រុមអ្នកសង្កេតការណ៍ក្នុងស្រុក និងអន្តរជាតិ ក៏ដូចជាគណបក្សប្រឆាំង បានអំពាវនាវដល់បណ្តាប្រទេសម្ចាស់ជំនួយបរទេស ជម្រុញដល់រដ្ឋាភិបាលកម្ពុជា ឲ្យធ្វើកំណែទម្រង់លើវិស័យអាទិភាពសំខាន់ៗមួយចំនួន និងពង្រឹងការអនុវត្តច្បាប់ ដែលរួមមាន៖ ដោះស្រាយបញ្ហាវិវាទដីធ្លី ការបណ្តេញចេញប្រជាជនពីលំនៅដ្ឋាន កំណែទម្រង់ហិរញ្ញវត្ថុសាធារណៈ និងការប្រយុទ្ធប្រឆាំងអំពើពុករលួយ ជាដើម។
ក្នុងពិធីបើកវេទិកា នៅព្រឹកមិញ លោកនាយករដ្ឋមន្ត្រី ហ៊ុន សែន បានថ្លែងនូវសុន្ទរកថាគន្លឹះ ចំនួន១៦ទំព័រ ព្រមទាំងបញ្ជាក់ពីការបន្តប្តេជ្ញាចិត្តដ៏មោះមុត ឥតរាថយរបស់រដ្ឋាភិបាលកម្ពុជា។
ចំពោះមុខបណ្តាប្រទេសអ្នកផ្តល់ជំនួយ លោកនាយករដ្ឋមន្ត្រី ហ៊ុន សែន បានបញ្ជាក់ថា រដ្ឋាភិបាលកម្ពុជា បាន និងកំពុងតែបន្តជម្រុញអនុវត្តយ៉ាងម៉ឹងម៉ាត់ និងធ្វើឲ្យកាន់តែស៊ីជម្រៅនូវកម្មវិធីកំណែទម្រង់នានា រួមមាន៖ ការទប់ស្កាត់ និងបង្ក្រាបបទល្មើសព្រៃឈើ បទល្មើសដីធ្លី បទល្មើសជលផល កុងត្រូលជជុះ ការរត់ពន្ធទំនិញ ការឃុបឃិតគ្នារវាងឈ្មួញទុច្ចរិត និងមន្ត្រីអនុវត្តច្បាប់ និងសកម្មភាពរំលោភច្បាប់ផ្សេងៗទៀត ដែលបានបង្កដល់ផលវិបាកដល់ជីវភាពប្រចាំថ្ងៃរបស់ប្រជាជនស្លូតត្រង់។
ជាងនេះទៅទៀត លោកនាយករដ្ឋមន្ត្រីបានប្រកាសថា រដ្ឋាភិបាលរបស់លោក ក៏បានបន្តអនុវត្តនូវកំណែទម្រង់ប្រព័ន្ធយុត្តិធម៌ និងការគ្រប់គ្រងហិរញ្ញវត្ថុសាធារណៈ ដោយយកចិត្តទុកដាក់ ជាពិសេសលើការប្រមូល និងគ្រប់គ្រងប្រកបដោយប្រសិទ្ធិភាព តម្លាភាព និងគណនេយ្យភាព នូវចំណូលពីអាជីវកម្មលើធនធានរ៉ែគ្រប់ប្រភេទ ពិសេសរ៉ែមាស និងធនធានប្រេង និងឧស្ម័ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ