ក្រុមប៉ូលីសអាស៊ានណាប៉ូលប្រជុំដើម្បីពង្រឹងសន្តិសុខក្នុងតំបន់
ក្រុមមេដឹកនាំ នគរបាលជាតិមកពីបណ្តាប្រទេសទាំង១០ជាសមាជិកអាស៊ាននិងប៉ូលីសមកពី ប្រទេសអូស្ត្រាលី ចិន ជប៉ុន កូរ៉េខាងត្បូង ញូវហ្សឺឡេននិងតំណាងប៉ូលីសអន្តរជាតិ interpol បានចូលរួមប្រជុំក្នុងសន្និសីទអាស៊ានណាប៉ូល( ASEANAPOL )លើកទី៣០នៅរាជធានីភ្នំពេញ។ អង្គសន្និសីទដែលចាប់ផ្តើមពីថ្ងៃទី២៤ដល់ថ្ងៃទី២៨ខែឧសភានេះ ផ្តោតសំខាន់លើការប្រយុទ្ធប្រឆាំងនឹងបញ្ហាភេរវកម្មនិងឧក្រិដ្ឋកម្ម ឆ្លងដែន។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ
សន្និសីទអាស៊ានណាប៉ូលលើកទី៣០ដែលកម្ពុជាធ្វើជាម្ចាស់ផ្ទះបានបើកជាផ្លូវការហើយនៅភ្នំពេញនាព្រឹកថ្ងៃទី២៥ខែឧសភានេះ។ អង្គសន្និសីទដែលជាការជួបប្រជុំរវាងមេប៉ូលីសអាស៊ាននិងបណ្តាប៉ូលីសប្រទេសមហាយក្សសេដ្ឋកិច្ចក្នុងតំបន់អាស៊ីរួមមាន ប្រទេសអូស្ត្រាលី ចិន ជប៉ុន កូរ៉េខាងត្បូង ញូវហ្សឺឡេននិងតំណាងប៉ូលីសអន្តរជាតិ interpol បានផ្តោតសំខាន់ទៅលើការពិភាក្សាពីបញ្ហាប្រយុទ្ធប្រឆាំងនឹងឧក្រិដ្ឋកម្មឆ្លងដែនគ្រប់ប្រភេទ។
បញ្ហាភេរវកម្ម ការជួញដូរគ្រឿងញៀនខុសច្បាប់ ការជួញដូរអាវុធ ការជួញដូរមនុស្ស បទល្មើសពាណិជ្ជកម្ម បទល្មើសលើផ្ទៃសមុទ្រ បទល្មើសធនាគារ បទល្មើសក្លែងក្លាយប័ណ្ណឥណទាន បទល្មើសបច្ចេកវិទ្យា ការក្លែងបន្លំឯកសារធ្វើដំណើរនិងការក្លែងបន្លំឆ្លងដែន ជាដើម ទាំងអស់នេះជាប្រធានបទដែលក្រុមនគរបាលអាស៊ាននិងប្រទេសដៃគូត្រូវពិភាក្សាគ្នា។
សន្និសីទរយៈពេល៥ថ្ងៃដែលចាប់ផ្តើមតាំងពីថ្ងៃ២៤ឧសភាក៏ផ្តោតការពិភាក្សាអំពីដំណើរការរីកចម្រើននៃប្រព័ន្ធទិន្នន័យអេឡិចត្រូនិចអាស៊ានណាប៉ូល និងកិច្ចសហប្រតិបត្តិការលើការជួយគ្នាទៅវិញទៅមកលើបញ្ហាឧក្រិដ្ឋកម្មគ្រប់ប្រភេទ។
ក្នុងអំឡុងពេលស្នាក់នៅកម្ពុជាពេលនេះ ក្រុមប៉ូលីសដែលចូលរួមសន្និសីទអាស៊ានណាប៉ូលក៏ត្រូវជួបជាមួយលោកនាយករដ្ឋមន្ត្រី ហ៊ុន សែន។ ការប្រកួតកីឡាវាយកូនហ្គោលក៏ត្រូវរៀបចំនៅក្នុងកម្មវិធីអង្គសន្និសីទនេះផងដែរ។
នៅពេលបើកអង្គសន្និសីទអាស៊ានណាប៉ូលនៅព្រឹកមិញលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានលើកឡើងថា ការជួបជុំរវាងថ្នាក់ដឹកនាំប៉ូលីសអាស៊ាននិងបណ្តាប្រទេសដែលមានសេដ្ឋកិច្ចរីកចម្រើនខ្លាំងនៅអាស៊ីនេះបានបង្ហាញច្បាស់អំពីការឯកភាពជាធ្លុងមួយរបស់អាស៊ានក្នុងការប្រយុទ្ធប្រឆាំងនឹងការគម្រាមកំហែងគ្រប់រូបភាពនៃឧក្រិដ្ឋកម្មឆ្លងដែន។ អង្គសន្និសីទនេះក៏ជាការពង្រីកកិច្ចសហប្រតិបត្តិការក្នុងនិងក្រៅតំបន់អាស៊ាន ដើម្បីបង្កើនប្រសិទ្ធភាពប្រឆាំងឧក្រិដ្ឋកម្មឆ្លងដែនតាមរយៈការកសាងភាពជាដៃគូជាមួយប្រទេសចិន ជប៉ុន សាធារណរដ្ឋកូរ៉េ អូស្ត្រាលី ញូវហ្សេឡេន និងតំណាងរបស់ប៉ូលីសអាំងទែប៉ូល។
លោកឧបនាយករដ្ឋមន្ត្រី ស ខេង បានបញ្ជាក់ថា ការកសាងភាពជាដៃគូនិងការជម្រុញកិច្ចសហប្រតិបត្តិការរវាងអាស៊ាននិងប្រទេសមហាយក្សសេដ្ឋកិច្ចអាស៊ីទាំងនេះកាន់តែមានសារៈសំខាន់ទ្វេដង ព្រោះថាក្នុងពេលដែលពិភពលោកកំពុងព្យាយាមងើបផុតពីវិបត្តិសេដ្ឋកិច្ចនិងហិរញ្ញវត្ថុពិភពលោកពេលនេះ។
បង្កើតនៅក្នុងឆ្នាំ១៩៨១អាស៊ានណាប៉ូលគឺជានគរបាលអាស៊ានដែលមានថ្នាក់ដឹកនាំនគរបាលក្នុងបណ្តាប្រទេសអាស៊ានជាសមាជិក។ នគរបាលក្នុងបណ្តាប្រទេសអាស៊ានត្រូវទាក់ទងគ្នាជាប់ជានិច្ច ដើម្បីផ្លាស់ប្តូរព័ត៌មាន ការស៊ើបអង្កេតស្រាវជ្រាវ និងជួយគ្នាទៅវិញទៅមកផ្នែកច្បាប់នៅក្នុងសំណុំរឿងព្រហ្មទណ្ឌឆ្លងដែន។ លេខាធិការដ្ឋាននគរបាលអាស៊ានដែលមានទីតាំងនៅប្រទេសម៉ាឡេស៊ីបានដំណើរការកាលពីដើមខែមករាកន្លងមក។
អាស៊ានណាប៉ូលឬនគរបាលអាស៊ានជាផ្នែកមួយនៅក្នុងសមាគមអាស៊ាន។ នៅក្នុងសន្និសីទប្រចាំឆ្នាំលើកទី១១នៅប្រទេសសឹង្ហបូរីនាខែឧសភាឆ្នាំ១៩៩១ នគរបាលអាស៊ានបានបង្កើតប្រព័ន្ធទិន្នន័យអេឡិចត្រូនិចមួយដើម្បីផ្លាស់ប្តូរនូវរាល់ព័ត៌មានឧក្រិដ្ឋកម្មឆ្លងដែន នៅក្នុងបណ្តាប្រទេសជាសមាជិក។ ប្រព័ន្ធទិន្នន័យអេឡិចត្រូនិចនេះក៏ធ្វើការទាក់ទងជាមួយនឹងប៉ូលីសអន្តរជាតិអាំងទែប៉ូល ដើម្បីបង្ក្រាបឧក្រិដ្ឋកម្មឆ្លងដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ