មានក្រុមហ៊ុន៦០ដែលទទួលបានច្បាប់អនុញ្ញាតរុករករ៉ែនៅកម្ពុជា
កម្មវិធីសម្រាប់ការអភិឌ្ឍន៍នៃអង្គការសហប្រជាជាតិ UNDP និងក្រសួងឧស្សាហកម្ម រ៉ែ និងថាមពល កំពុងត្រៀមរៀបចំសន្និសីទថ្នាក់អន្តរជាតិ ស្តីពីអាជីវកម្មរ៉ែ ដែលនឹងប្រព្រឹត្តទៅរយៈពេល២ថ្ងៃ គឺថ្ងៃទី២៦ និង២៧ខែឧសភានេះ។ នៅក្នុងសន្និសីទកាសែតមួយ ស្តីអំពីការរៀបចំសន្និសីទអន្តរជាតិនេះ អគ្គនាយកនៃអគ្គនាយកដ្ឋានធនធានរ៉ែរបស់ក្រសួងឧស្សាហកម្មលោក សុខ ឡេង បានថ្លែងអោយដឹងថា រហូតដល់ពេលនេះមានក្រុមហ៊ុនក្នុងស្រុក និងបរទេសប្រមាណ៦០ក្រុមហ៊ុនដែលទទួលបានអាជ្ញាប័ណ្ណ ស្រាវជ្រាវរករ៉ែក្រោមដីរបស់កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លាង ដឺលុច
នៅក្នុងសន្និសីទសារព័ត៌មាននៅព្រឹកថ្ងៃទី២៤នេះ នៅឯការិយាល័យរបស់UNDP លោក សុខ ឡេង អគ្គនាយកនៃអគ្គនាយកដ្ឋានធនធានរ៉ែបានផ្សាយអោយដឹងថា មានក្រុមហ៊ុនរហូតដល់ទៅ៦០ក្រុមហ៊ុនហើយដែលបាន និងកំពុងធ្វើការសិក្សាស្រាវជ្រាវ រុករកធនធានរ៉ែក្នុងតំបន់មួយចំនួននៃប្រទេសកម្ពុជា។ ក្រុមហ៊ុនទាំងនោះមានមកពីប្រទេសអូស្ត្រាលី ប្រទេសចិន វៀតណាម និងកូរ៉េជាដើម។
អគ្គនាយកធនធានរ៉ែលោក សុខ ឡេង បានរៀបរាប់អោយដឹងថា ក្រុមហ៊ុនទាំងនោះបានរកឃើញមានរ៉ែមាសនៅខាងខេត្តមណ្ឌលគិរី មានរ៉ែដែកនៅខាងខេត្តព្រះវិហារ កំពង់ធំ និងនៅខាងខេត្តសៀមរាប។ មានរកឃើញរ៉ែស្ពាន់នៅខាងព្រំប្រទល់ខេត្តព្រះវិហារ និងសៀមរាប និងក៏រកឃើញមានរ៉ែមាស និងស្ពាន់នៅខាងខេត្តរតនគិរីផងដែរ។
លោក សុខ ឡេង បានអះអាងអោយដឹងថា ក្រុមហ៊ុនរបស់ប្រទេសអូស្ត្រាលីមួយឈ្មោះOZ mineralsដែលសិក្សាស្រាវជ្រាវនៅខេត្តមណ្ឌលគិរី បានរកឃើញសក្តានុពលនៃរ៉ែមាសយ៉ាងច្រើនរហូតដល់៨លាន១សែនតោន។ ក្រុមហ៊ុននេះក៏បានធ្វើសេចក្តីប្រកាសព័ត៌មានរួចហើយដែរ។
ចំនូលពន្ធជាដុំកំភួននោះដូចជាមិនទាន់មានទេក្នុងដំណាក់កាលនេះ។ ដូចការអះអាងរបស់លោកអគ្គនាយកធនធានរ៉ែនៃក្រសួងឧស្សាហកម្មអ៊ីចឹង គឺថា ក្រុមហ៊ុនទាំងប៉ុន្មានដែលទទួលបានអាជ្ញាប័ណ្ណរុករករ៉ែខាងលើ គឺពួកគេស្ថិតនៅក្នុងដំណាក់កាលនៃការសិក្សាស្រាវជ្រាវនៅឡើយ។ វាមិនមែនជាដំណាក់កាលនៃការធ្វើអាជីវកម្មដែលរដ្ឋ និងក្រុមហ៊ុនត្រូវបែកចែកផលចំណេញទៅតាមកិច្ចព្រមព្រៀងនោះឡើយ។ ប៉ុន្តែទោះយ៉ាងណា ក៏ដោយ វិស័យរ៉ែនេះ ក៏អាចជួយរកចំណូលខ្លះជូនរដ្ឋផងដែរដូចជា ការចុះបញ្ជី កម្រៃអាជ្ញាប័ណ្ណ ថ្លៃពន្យាសុពលភាព ថ្លៃផ្ទេរសិទ្ធិអាជ្ញាប័ណ្ណ ថ្លៃឈ្នួលផ្ទៃក្រឡា ថ្លៃពន្ធសម្ភារៈសំណង់ផ្សេងៗ។
លោក សុខ ឡេង បន្តថាតាមគោលការណ៍របស់រដ្ឋនោះ ក្រុមហ៊ុនអាចទទួលបានសិទ្ធិក្នុងការសិក្សាស្រាវជ្រាវរកធនធានរ៉ែរយៈពេល២ឆ្នាំ។ តែក្រុមហ៊ុនអាចមានសិទ្ធិសុំបន្តម្តង២ឆ្នាំបាន៣ដងទៀត។ សម្រាប់ការធ្វើអាជីវកម្ម បើតាមការពន្យល់របស់លោកអគ្គនាយដ្ឋានធនធានរ៉ែ គឺថាក្រុមហ៊ុនអាចមានសិទ្ធិធ្វើអាជីវកម្មរហូតដល់៣៥ឆ្នាំ ហើយពន្យាម្តង៥ឆ្នាំបានពីរដងទៀត។
សន្និសីទនេះជាសន្និសីទធំលើកទីមួយស្តីពីការធ្វើអាជីវកម្មធនធានរ៉ែ។ រៀបចំរួមគ្នាដោយក្រសួងឧស្សាហកម្ម និងUNDP សន្និសីទនេះនឹងប្រារព្ធធ្វើរយៈពេល២ថ្ងៃគឺថ្ងៃទី២៦ និង២៧ឧសភាក្រោមប្រធានបទ ឱកាសសម្រាប់កម្ពុជា។ ហើយលោកនាយករដ្ឋមន្ត្រីហ៊ុន សែននឹងធ្វើជាអធិបតីភាពបើកសន្និសីទនេះ។
មានមនុស្សពី២៥០ទៅ៣០០នាក់ដែលត្រូវបានអញ្ជើញអោយចូលរួមក្នុងសន្និសីទអន្តរជាតិនេះ រួមមានមន្ត្រីរដ្ឋាភិបាល អង្គការសង្គមស៊ីវិល និងជាពិសេសអ្នកជំនាញការអន្តរជាតិផ្នែកធនធានរ៉ែមកពីប្រទេសឡាវ វៀតណាម ឥណ្ឌូនេស៊ី ម៉ុងហ្គោលី ចិន អូស្ត្រាលី កាណាដា សហរដ្ឋអាមេរិក និងអង់គ្លេស។
សន្និសីទនេះនឹងនិយាយអំពីច្បាប់ស្តីពីរ៉ែ តួនាទីរបស់រដ្ឋ ការរុករក និងអភិវឌ្ឍន៍រ៉ែ ហានិភ័យ ការការពារបរិស្ថាន ការអភិវឌ្ឍន៍សហគមនៅតំបន់ធ្វើអាជីវកម្មរ៉ែ និងបទពិសោធន៍ពីប្រទេសនានាក្នុងតំបន់ និងអន្តរជាតិ។ និយាយអោយខ្លី គោលបំណងនៃការរៀបចំសន្និសីទនេះ គឺធា្លប់ត្រូវបានលើកឡើងរួចមកហើយ គឺថាធ្វើយ៉ាងណាដើម្បីអោយកម្ពុជាអាចគ្រប់គ្រង និងបែកចែកអោយមានតម្លាភាព ផលដែលបានមកពីធនធានរ៉ែនេះ។ ពោលគឺការរួមចំណែកដល់ការអភិវឌ្ឍន៍សេដ្ឋកិច្ច និងសង្គមកម្ពុជាប្រកបដោយចីរភាព និងការទទួលខុសត្រូវសម្រាប់វិស័យរ៉ែរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ