កម្ពុជាស្វែងរកការដោះលែងពលរដ្ឋខ្មែរ ដែលជាប់ចោទក្នុងរឿងកុបកម្ម នៅបាងកក
មន្ត្រីការទូត កម្ពុជា ប្រចាំក្រុងបាងកក កំពុងស្វែងរកការដោះលែងពលរដ្ឋខ្មែរម្នាក់ ដែលត្រូវរដ្ឋាភិបាលថៃ ចោទប្រកាន់ក្នុងរឿងបង្កសកម្មភាព ដុតបំផ្លាញធនាគារថៃ។ អាជ្ញាធរថៃបានចាប់ខ្លួនបុរសជនជាតិខ្មែរ អាយុ ២៧ ឆ្នាំនោះ កាលពីថ្ងៃទី១៩ ឧសភា ខណៈដែលបាតុករអាវក្រហមថៃ បានដុតបំផ្លាញអគារនានា នៅទីក្រុងបាងកក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ
នៅថ្ងៃច័ន្ទនេះ មន្ត្រីស្ថានទូតកម្ពុជា ប្រចាំក្រុងបាងកក បានទៅជួបបុរសជាប់ចោទ ដល់មន្ទីរឃុំឃាំងបណ្តោះអាសន្ន។ មន្ត្រីការទូត ក៏បានរកមេធាវី ជាជនជនជាតិថៃ ជូនបុរសកម្ពុជា ដែលជាប់ចោទក្នុងសកម្មភាពដុតបំផ្លាញធនាគារក្រុងថេបផងដែរ។ នេះបើតាមការបញ្ជាក់របស់លោក កុយ គួង អ្នកនាំពាក្យក្រសួងការបរទេសកម្ពុជា នៅថ្ងៃច័ន្ទ ទី២៤ឧសភា។
លោក កុយ គួង បានប្រាប់វិទ្យុបារាំងអន្តរជាតិថា ការចោទប្រកាន់របស់រដ្ឋាភិបាលថៃ លើបុរសកម្ពុជា ក្នុងរឿងដុតបំផ្លាញធនាគារក្រុងថេប ជាការចោទប្រកាន់ដោយខុសទាំងបំពាន ហើយក៏ជាការចោទប្រកាន់ ដែលមានបំណងបង្ករឿងជាមួយកម្ពុជា។ ការចោទប្រកាន់របៀបនេះ កម្ពុជាមិនអាចទទួលយកបានទេ។
លោក កុយ គួង បានបញ្ជាក់ថា ពលរដ្ឋកម្ពុជា ដែលត្រូវថៃចាប់ខ្លួននោះ មានឈ្មោះ សាន មុនីភេទ អាយុ ២៧ ឆ្នាំ មានស្រុកកំណើតនៅខេត្តបាត់ដំបង។ បុរសកម្ពុជារូបនេះ បានទៅធ្វើការនៅហាងលក់ភេសជ្ជៈមួយ នៅទីក្រុងបាងកក ក្បែរកន្លែងកើតហេតុ។ សាន មុនីភេទ បានទៅធ្វើការនៅក្រុងបាងកក ក្នុងនាមជាកម្មករស្របច្បាប់មួយរូប ដោយមានប្រពន្ធជាជនជាតិថៃ និងមានកូនម្នាក់។
មន្ត្រីការទូតកម្ពុជា បានបន្ថែមថា សាន មុន្នីភេទ នៅពេលចេញពីធ្វើការ នៅល្ងាចម៉ោង ៤ កន្លះ ថ្ងៃ១៩ឧសភាចំពេលមានព្រឹត្តិការណ៍កុបកម្ម ដុតបំផ្លាញអគារនានា នៅទីក្រុងបាងកកបុរសរូបនេះ ក៏បានឈរមើលហេតុការណ៍នៅជិតកន្លែងធ្វើការ ក៏ត្រូវនគរបាលថៃ ចាប់ខ្លួនតែម្តង។
មន្ត្រីការទូតកម្ពុជា ក៏បានអំពាវនាវដល់រដ្ឋាភិបាលក្រុងបាងកក ឲ្យដោះលែងពលករស្របច្បាប់កម្ពុជាម្នាក់នេះជាបន្ទាន់ ព្រោះបុរសនេះ មិនបានចូលរួមក្នុងបាតុកម្មហិង្សា របស់ក្រុមអាវក្រហមនោះឡើយ។ ផ្ទុយទៅវិញលោក សាន មុន្នីភេទ ជាជនរងគ្រោះ ដែលរដ្ឋាភិបាលកម្ពុជា សុំអំពាវនាវឲ្យរដ្ឋាភិបាលក្រុងបាងកក ដោះលែងគាត់ ឲ្យមានសេរីភាព ព្រោះលោកជាពលករកម្ពុជា ទៅធ្វើការនៅប្រទេសថៃ ដោយស្របច្បាប់។
សូមរម្លឹកថា មន្ត្រីរដ្ឋាភិបាលកម្ពុជា បានប្រកាសច្រានចោលភ្លាមៗ កាលពីថ្ងៃ២២ឧសភាថា គ្មានពលរដ្ឋខ្មែរណាម្នាក់ បានចូលរួមបាតុកម្មហិង្សា ជាមួយក្រុមអាវក្រហមថៃ នៅបាងកកឡើយ។ សេចក្តីប្រកាសនេះ បន្ទាប់ពីសេចក្តីរាយការណ៍របស់ព័ត៌មានថៃ ពីការចាប់ខ្លួនពលរដ្ឋខ្មែរ នៅក្នុងបទល្មើសដុតបំផ្លាញធនាគារមួយ នៅទីក្រុងបាងកក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ