ខុមហ្វ្រែលថា មានបញ្ហាចុះឈ្មោះបោះឆ្នោតសម្រាប់អ្នកផ្លាស់ទីលំនៅ
គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថាខុមហ្វ្រែល(Comfrel)បានធ្វើការអង្កេតទៅលើក្រុមអ្នកផ្លាស់ទីលំនៅដោយបង្ខំ និងក្រុមអ្នកផ្ទុកមេរោគអេដស៍ ដើម្បីស្វែងរកបញ្ហាដែលពួកគេជួបប្រទះក្នុងការចុះឈ្មោះបោះឆ្នោត។ ការអង្កេតនេះត្រូវបានធ្វើជាមួយពលរដ្ឋចំនួន២៤៤នាក់ក្នុងភូមិចំនួន៣ក្នុងខណ្ឌដង្កោរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
អង្គការសង្កេតការណ៍បោះឆ្នោតឈ្មោះខុមហ្វ្រែលបានរកឃើញបញ្ហាមួយចំនួនទាក់ទងនឹងការចុះឈ្មោះបោះឆ្នោតរបស់ក្រុមមនុស្សដែលបានផ្លាស់ទីលំនៅដោយបង្ខំ។ ខុមហ្វ្រែលបានធ្វើបទសម្ភាសន៍ជាមួយពលរដ្ឋចំនួន២៤៤នាក់នៅក្នុងភូមិចំនួន៣ គឺភូមិដំណាក់ត្រយឹង ភូមិត្រពាំងអញ្ចាញ និងភូមិទួលសំបូរក្នុងខណ្ឌដង្កោជាយរាជធានីភ្នំពេញ។ ភូមិទាំង៣នេះហើយដែលទទួលពលរដ្ឋដែលត្រូវបានអាជ្ញាធរជន្លៀសចេញពីក្នុងរាជធានីភ្នំពេញកន្លងមកនោះ។
នៅទីកន្លែងថ្មីនោះ ខុមហ្វ្រែលបានរកឃើញមានបញ្ហាមួយចំនួនទាក់ទងនឹងការចុះឈ្មោះបោះឆ្នោត។ បញ្ហាមានដូចជា អ្នកខ្លះមិនត្រូវបានមន្ត្រីចុះឈ្មោះអោយពួកគេ ដោយសារ គ្មានឯកសារគ្រប់គ្រាន់។ ហើយបើទោះជាមានអ្នកចុះឈ្មោះច្រើនក៏ដោយ តែលទ្ធផលនៃការផ្ទៀងផ្ទាត់បញ្ជីបោះឆ្នោតឆ្នាំ២០០៩កន្លងទៅ បង្ហាញថា មានតែចំនួនជាង៥០ភាគរយប៉ុណ្ណោះដែលមានឈ្មោះក្នុងបញ្ជីបោះឆ្នោត។ ទោះយ៉ាងណាក៏ដោយ ខុមហ្វ្រែលបានអបអរសាទរចំពោះលទ្ធផលនៃការអង្កេតដែលបង្ហាញថា អ្នកផ្ទុកមេរោគអេដស៍និងអ្នកជំងឺអេដស៍ដែលមានសិទ្ធិបោះឆ្នោត បានទៅចុះឈ្មោះជាង៩០ភាគរយ ហើយថាពូកគេគ្មានអារម្មណ៍ថា ពួកគេត្រូវបានគេរើសអើងក្នុងការចុះឈ្មោះបោះឆ្នោតនោះឡើយ។
យោងតាមការអះអាងរបស់ខុមហ្វ្រែល ការសិក្សាក៏បានរកឃើញដែរថា គុណភាពនៃបញ្ជីបោះឆ្នោតពីមួយឆ្នាំទៅមួយឆ្នាំ កាន់តែគួរអោយព្រួយបារម្ភ ពិសេសការបាត់ឈ្មោះ និងភាពមិនត្រឹមត្រូវនៃទិន្នន័យរបស់អ្នកបោះឆ្នោត ក្នុងបញ្ជីឈ្មោះបោះឆ្នោត។ ដូច្នេះ នៅក្នុងសេចក្តីថ្លែងការណ៍របស់ខ្លួន ខុមហ្វ្រែលបាននិយាយថា វាជាការចាំបាច់ដែលភាគីពាក់ព័ន្ធទាំងអស់ត្រូវយកចិត្តទុកដាក់ទៅលើអនុសាសន៍នានាដែលទាក់ទងនឹងការកែទម្រង់ការចុះឈ្មោះបោះឆ្នោត និងការធ្វើបញ្ជីបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ