រដ្ឋសភាកម្ពុជាអនុម័តការសម្រួលពាណិជ្ជកម្មកម្ពុជា-ចិន
រដ្ឋសភាបានផ្តល់ការយល់ព្រមជា ឯកច្ឆ័ន្ទលើអនុសញ្ញាកុងស៊ុល រវាងព្រះរាជាណាចក្រកម្ពុជា និង សាធារណរដ្ឋប្រជាមានិតចិន នាព្រឹកថ្ងៃទី៧ ខែឧសភានេះ។ ជា កិច្ចព្រមព្រៀង ដើម្បីសម្រួលពាណិជ្ជកម្មរវាង ប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
អនុសញ្ញាកុងស៊ុល រវាងកម្ពុជា និងចិន ត្រូវបានរដ្ឋាភិបាលប្រទេសទាំងពីរចុះ
បទអន្តរាគមន៍របស់លី ម៉េងហួរពីទីក្រុងភ្នំពេញ
ហត្ថលេខាព្រមព្រៀងរួមគ្នា កាលពីថ្ងៃទី២៥ ខែកុម្ភៈ ឆ្នាំ២០១០ នៅភ្នំពេញ។ អនុសញ្ញាកុងស៊ុលនេះ បានធ្វើឡើង យកលំនាំតាមអនុសញ្ញាទីក្រុងវីយ៉ែន ឆ្នាំ១៩៦៣ ស្តីពី ទំនាក់ទំនងកុងស៊ុលដែលត្រូវបានប្រើប្រាស់ជាផ្លូវការ នៅកម្ពុជា កាលពីឆ្នាំ២០០៥។
អនុសញ្ញាកុងស៊ុលកម្ពុជា និងចិន តម្រូវឲ្យភាគីទាំងពីរត្រូវគោរពអភ័យឯកសិទ្ធិ និងបុព្វសិទ្ធិ និងសម្រួលដល់មន្ត្រីកុងស៊ុល និងក្រុមគ្រួសាររបស់គេដែលបំពេញការងារកុងស៊ុល នៅក្នុងទឹកដីនៃរដ្ឋម្ចាស់ផ្ទះ។ អនុសញ្ញានេះ ក៏បានផ្តល់លទ្ធភាពឲ្យមន្ត្រីកុងស៊ុល អនុវត្តនូវមុខងារជាអ្នកការទូត រួមទាំងការប្រាស្រ័យទាក់ទងដោយផ្ទាល់រវាងពលរដ្ឋនៃរដ្ឋដាក់កុងស៊ុល ជាមួយមន្ត្រីកុងស៊ុល ទទួលពាក្យស្នើសុំសញ្ជាតិ ផ្តល់ទិដ្ឋាការ ព្រមទាំងពន្យារសុពលភាព ជាដើម។ មន្ត្រីកុងស៊ុលទាំងពីរ ក៏ នឹងត្រូវផ្តល់កិច្ចឧបត្ថម្ភនានា ដល់ពលរដ្ឋ នាវា ក្រុមនាវិក ក៏ដូចជាយន្តហោះ និងក្រុមអាកាសយានិករបស់ប្រទេសរៀងៗខ្លួន។
អនុសញ្ញាកុងស៊ុលកម្ពុជា និងចិន ដែលរដ្ឋសភាបានយល់ព្រម នៅព្រឹកថ្ងៃទី៧ ខែឧសភានេះ ក៏អនុញ្ញាតឲ្យរដ្ឋាភិបាលប្រទេសទាំងពីរអាចបើកស្ថានអគ្គកុងស៊ុល ដែលជាសាខារបស់ស្ថានឯកអគ្គរាជទូតកម្ពុជាបន្ថែមទៀត។ ក្នុងស្ថានភាពនេះ កម្ពុជានឹងបើកស្ថានអគ្គកុងស៊ុលចំនួន ៦ បន្ថែមទៀត នៅតាមទីក្រុងធំៗរបស់ប្រទេសចិន បន្ថែមលើស្ថានឯកអគ្គរាជទូតកម្ពុជា នៅទីក្រុងប៉េកាំង និងស្ថានអគ្គកុងស៊ុល ៦ ផ្សេងទៀត ដែលត្រូវបានបង្កើតរួចហើយ។
អនុសញ្ញាកុងស៊ុលកម្ពុជា-ចិន ក៏ដើម្បីសម្រួលដល់ទំនាក់ទំនងផ្នែកការទូតផង និងដើម្បីសម្រួលដល់ទំនាក់ទំនងពាណិជ្ជកម្មប្រទេសទាំងពីរ។ សម្រាប់កម្ពុជា អនុសញ្ញានេះ នឹងទាក់ទាញអ្នកវិនិយោគ និងអ្នកទេសចរចិនបន្ថែមទៀត ចូលមកកាន់ប្រទេសកម្ពុជា។
ក្នុងអង្គប្រជុំរដ្ឋសភា លោកប្រមុខការទូតកម្ពុជា ហោ ណាំហុង ដែលជាតំណាងរាជរដ្ឋាភិបាល ដើម្បីការពារសេចក្តីព្រាងច្បាប់នេះ បានលើកឡើងថា អនុសញ្ញាកុងស៊ុលកម្ពុជា និងចិន ធ្វើឡើងដើម្បីពង្រីក និងពង្រឹងបន្ថែមទៀត នូវទំនាក់ទំនងជាប្រពៃណីដ៏យូរលង់ រវាងប្រទេសទាំងពីរ និងទំនាក់ទំនងកុងស៊ុល ក្នុងការបង្កលក្ខណៈអនុគ្រោះដល់កិច្ចការពារសិទ្ធិ និងផលប្រយោជន៍ស្របច្បាប់របស់ពលរដ្ឋនៃប្រទេសទាំងពីរ។ ម្យ៉ាងទៀត អនុសញ្ញានេះ ក៏ជម្រុញការអភិវឌ្ឍន៍ទំនាក់ទំនងពាណិជ្ជកម្ម សេដ្ឋកិច្ច វិនិយោគ វប្បធម៌ ទេសចរណ៍ និងវិទ្យាសាស្ត្រ ក៏ដូចជាវិស័យដទៃទៀត។
ទំនាក់ទំនងជាសាលវន្តរវាងកម្ពុជា និងចិន ត្រូវបានបង្កើតឡើង តាំងពីយូរយារណាស់មកហើយ។ ទំនាក់ទំនងនេះ ក៏កាន់តែជិតស្និទបន្ថែមទៀត តាមរយៈអតីតព្រះមហាក្សត្រ សម្តេចព្រះ នរោត្តម សីហនុ និងលោកប្រមុខរាជរដ្ឋាភិបាល ហ៊ុន សែន នាពេលសព្វថ្ងៃ។ ក្នុងនោះ ទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគរវាងកម្ពុជា និងចិន ក៏កាន់តែជិតស្និទ និងមានការរីកចម្រើនខ្លាំងគួរឲ្យកត់សម្គាល់លើគ្រប់វិស័យ។
របាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា រហូតដល់ចុងឆ្នាំ២០០៩ គម្រោងវិនិយោគទុនរបស់ចិននៅកម្ពុជា មានចំនួន ៣៤៩ គម្រោង គិតជាទឹកប្រាក់ចំនួន ៧,០៣០ លានដុល្លារអាមេរិក។ ចំណែកស្ថានទូតចិនប្រចាំកម្ពុជា ក៏បានប្រកាស កាលពីដើមខែមីនាថា ការផ្តោះប្តូរពាណិជ្ជកម្មរវាងកម្ពុជា និងចិន នៅឆ្នាំ២០០៩ មានតម្លៃ ៩៤៤ លានដុល្លារអាមេរិក។ ក្នុងនោះ ចិនបាននាំទំនិញចូលមកកាន់ប្រទេសកម្ពុជា ចំនួន ៩០៧លានដុល្លារ។ ចំណែកកម្ពុជាវិញ នាំចេញ ទៅចិនតែ ៣៧ លានដុល្លារប៉ុណ្ណោះ។
ក្នុងកិច្ចប្រជុំ នាថ្ងៃទី៧ខែឧសភានេះ រដ្ឋសភាកម្ពុជា ក៏បានអនុម័តយល់ព្រមលើកិច្ចព្រមព្រៀងរវាងរដ្ឋាភិបាលកម្ពុជា និងវៀតណាម ស្តីពី ការដឹកជញ្ជូនតាមផ្លូវទឹក។ ជាកិច្ចព្រមព្រៀង ដែលលោក ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា ជាការជម្រុញ និងលើកកម្ពស់ ពាណិជ្ជកម្មអន្តរជាតិ តាមរយៈការសម្របសម្រួល ការដឹកជញ្ជូនទំនិញ អ្នកដំណើរ និងទេសចរ តាមផ្លូវទឹករវាងប្រទេសកម្ពុជា និងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ