ក្រុមហ៊ុនផលិតជីរបស់វៀតណាម សម្លឹងឃើញឱកាសជំនួញ នៅកម្ពុជា
ក្រុមហ៊ុនសាជីវកម្ម ផលិតជី និងសារជាតិ គីមី ប៉េត្រូវៀតណាម ( PVFCCo ) ដែលជាក្រុមហ៊ុនផលិតជីធំជាងគេ នៅប្រទេសវៀតណាម បានសម្លឹង ឃើញឱកាសជំនួញ ដោយ ធ្វើការនាំចូលជី អ៊ុយរ៉េ មកកាន់ទីផ្សារ កសិកម្ម នៅក្នុងប្រទេសកម្ពុជា។ កម្ពុជា ដែលកំពុងតែ ពង្រីកវិស័យកសិកម្ម សម្រាប់ការទ្រទ្រង់ចំណូល ថវិកាជាតិ។
ចុះផ្សាយនៅថ្ងៃ៖
បទអន្តរាគន៍របស់ លី ម៉េងហួរ ពីទីក្រុងភ្នំពេញ
ក្រុមហ៊ុនសាជីវកម្មផលិតជី អ៊ុយរ៉េ របស់ប្រទេសវៀតណាម ដែលមានតម្លៃវិនិយោគ ៣៧០ លានដុល្លារ គម្រោងនឹងបើកសម្ពោធការិយាល័យតំណាងនៅក្នុងប្រទេសកម្ពុជា នាថ្ងៃសុក្រ ទី៧ ខែឧសភា ខានស្អែកនេះ ដើម្បីធ្វើជាការិយាល័យលក់ និងផ្សព្វផ្សាយពាណិជ្ជកម្ម ជីកសិកម្មនេះ។
ក្រុមហ៊ុនសាជីវកម្មផលិតជី អ៊ុយរ៉េ ដែលអះអាងថា ជាក្រុមហ៊ុនផលិតជីធំជាងគេរបស់ប្រទេសវៀតណាម បានប្រកាសនៅក្នុងសន្និសីទកាសែត នៅថ្ងៃនេះថា ការប្រើប្រាស់ជីអ៊ុយរ៉េបានបង្កើនទិន្នផលស្រូវរបស់កសិករកម្ពុជាពី ២,៥ តោន ក្នុងមួយហិកតា ទៅដល់ ៨,៦ តោន ក្នុងមួយហិកតា។ ទិន្នផលនេះត្រូវបានក្រុមហ៊ុនធ្វើការសាកល្បង ជាមួយនឹងកសិករកម្ពុជានៅក្នុងខេត្តកំពង់ឆ្នាំង និងខេត្តបាត់ដំបង នាពេលថ្មីនេះ។
នៅក្នុងសន្និសីទកាសែតនៅព្រឹកមិញក្នុងទីក្រុងភ្នំពេញ តំណាងក្រុមហ៊ុនសាជីវកម្មផលិតជី អ៊ុយរ៉េ ហ្វូមី បានអះអាងថា ជីគីមីនេះអាចប្រើប្រាស់ដើម្បីបំប៉ន និងបង្កើនទិន្នផលគ្រប់ប្រភេទ ដំណាំដាំដុះ និងដីគ្រប់ប្រភេទ ជាពិសេសលើដំណាំស្រូវ ដោយមិនប៉ះពាល់ដល់បរិស្ថានទេ។ ក៏ប៉ុន្តែតំណាងក្រុមហ៊ុនជីវៀតណាមនេះក៏បានប្រកាសថា បើសិនជាប្រើប្រាស់នូវជីកសិកម្មនេះច្រើនលើសកម្រិត និងមិនមានជីធម្មជាតិទេនោះ ក៏អាចបង្កឲ្យដីកសិកម្មរឹងខូចគុណភាពដែរ។
យ៉ាងណាក៏ដោយ លោក ង្វៀន ហុងវិញ ( Nguyen Hong Vinh ) អគ្គនាយករងក្រុមហ៊ុនសាជីវកម្មផលិតជី និងសារជាតិគីមី ប៉េត្រូវៀតណាមបានលើកឡើងក្នុងសន្និសីទកាសែតថា ក្រុមហ៊ុនសាជីវកម្មផលិតជីវៀតណាមនេះ មិនត្រឹមតែនាំចូលជីអ៊ុយរ៉េ ដែលមានគុណភាពខ្ពស់ទៅលក់ចែកចាយនៅប្រទេសកម្ពុជានាពេលនេះទេ តែក្រុមហ៊ុនវៀតណាមមួយនេះ ក៏នឹងផ្ទេរចែករំលែកនូវបច្ចេកទេសក្នុងការបង្កើនទិន្នផលជាមួយនឹងកសិករកម្ពុជា នោះគឺកញ្ចប់ដំណោះស្រាយកសិកម្ម ដែលត្រូវបានរៀបចំឡើងនៅក្នុងប្រទេសវៀតណាម។ ពោលគឺនឹងជួយដល់កសិករកម្ពុជា ឲ្យធ្វើស្រូវ ពីមួយរដូវ ទៅបីរដូវ ដូចនៅវៀតណាម។ ប្រទេសវៀតណាម ដែលជាប្រទេសដែលនាំចេញអង្ករចំណាត់ថ្នាក់ទី២ នៅក្នុងពិភពលោក បន្ទាប់ពីប្រទេសថៃ។
ការវិនិយោគរបស់ក្រុមហ៊ុនវៀតណាមនៅកម្ពុជាសព្វថ្ងៃនេះ ឈរនៅលំដាប់ទី១ ក្នុងពេលពិភពលោកជួបវិបត្តិសេដ្ឋកិច្ច។ នេះបើតាមរបាយការណ៍របស់រដ្ឋាភិបាលកម្ពុជា។ នៅឆ្នាំ២០០៩ យ៉ាងហោចណាស់ មានគម្រោងវិនិយោគរបស់ក្រុមហ៊ុនវៀតណាមជាង ៦០ គម្រោង កំពុងដំណើរការនៅក្នុងប្រទេសកម្ពុជា ដោយប្រើដើមទុនជិត ៩០០ លានដុល្លារអាមេរិក។ វៀតណាមវិនិយោគលើការដាំកៅស៊ូ កសិកម្ម ព្រៃឈើ ឧស្សាហកម្ម ហេដ្ឋារចនាសម្ព័ន្ធ រ៉ែប្រេង វារីអគ្គិសនី ធនាគារ ទូរស័ព្ទ និងទេសចរណ៍។ វៀតណាមបានវិនិយោគលើវិស័យកសិកម្ម ច្រើនជាងគេ នៅកម្ពុជា។
នៅឆ្នាំ២០១០នេះ កម្ពុជា និងវៀតណាមបានតាំងចិត្តថា ផ្តោះប្តូរពាណិជ្ជកម្មឲ្យកើនដល់ ២០០០ លានដុល្លារ ខណៈដែលជញ្ជីងពាណិជ្ជកម្មកាលពីឆ្នាំមុនមានត្រឹមតែ ១៧០០ លានដុល្លារប៉ុណ្ណោះ។ ភាគច្រើន គឺវៀតណាមបាននាំចូលទំនិញផលិតផល ទៅលក់នៅកម្ពុជា ឯកម្ពុជា បាននាំចូលទៅវៀតណាម តិចតួចប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ