កាសែតប្រឆាំងខ្មែរម្ចាស់ស្រុកចាប់បើកឡើងវិញនៅថ្ងៃទី១ខែឧសភា
កាសែតខ្មែរម្ចាស់ស្រុកដែលបាន បិទទ្វារកាលពីដើមខែមេសាកន្លងមកនេះនឹងចាប់ផ្តើមបោះពុម្ពផ្សាយ ឡើងវិញនៅថ្ងៃទី១ខែឧសភាខាងមុខនេះពោលគឺកាសែតនេះនឹងបើកឡើងវិញនៅ២ថ្ងៃមុនទិវាសេរីភាព សារព័ត៌មានពិភពលោក។ ការបើកឡើង វិញនេះគឺបានធ្វើឡើងបន្ទាប់ពីចាងហ្វាងរបស់ខ្លួនត្រូវបានដោះលែង ចេញពីពន្ធនាគារព្រៃសកាលពី១០ ថ្ងៃមុននេះ។
ចុះផ្សាយនៅថ្ងៃ៖ កែប្រែថ្ងៃទី៖
សំឡេងរបស់ គី សុខលីម
លោកហង្សចក្រាដែលធ្លាប់ជាប់ពន្ធនាគារជិត១ឆ្នាំដោយសារតែសេ្មររិះគន់របស់លោកបានបញ្ជាក់នៅថ្ងៃសៅរ៍នេះថាកាសែតខ្មែរម្ចាស់ស្រុកដែលបានបិទទ្វារកាលពីដើមខែមេសាកន្លងមកនេះនឹងចាប់ផ្តើមបោះពុម្ពផ្សាយឡើងវិញនៅថ្ងៃទី១ខែឧសភាខាងមុខនេះពោលគឺកាសែតនេះត្រូវបើកឡើងវិញ២ថ្ងៃមុនទិវាសេរីភាពសារព័ត៌មានអន្តរជាតិ។
ចាងហ្វាងកាសែតធ្លាប់ជាប់ពន្ធនាគារព្រៃសរូបនេះបានបន្តទៀតថាលោកបានចំណាយពេលវេលាថវិកានិងកិត្តិយសជាមួយកាសែតនេះតាំងពីការចាប់ផ្តើមដំបូងមកម្ល៉េះ ដូច្នេះលោកមិនអាចទុកអោយកាសែតនេះងាប់ចោលនោះទេ។លោកបានបញ្ជាក់ទៀតថាលោកត្រូវតែធ្វើអោយវារស់ឡើងវិញនៅក្នុងពេលឆាប់ៗខាងមុខនេះ។
កាសែតប្រឆាំងមួយនេះនឹងបន្តផ្សាយផ្សាយ៦លេខក្នុងមួយសប្តាហ៍ជាមួយនឹងបុគ្គលិកអ្នកកាសែតចំនួន៦នាក់។កាសែតសខ្មៅ៤ទំព័រនេះបោះពុម្ពចំនួនជាង១ពាន់ច្បាប់ក្នុងមួយលេខៗ។លោកហង្សចក្រាចាងហ្វាងកាសែតខ្មែរម្ចាស់ស្រុកបានបញ្ជាក់ជាមួយនឹងសម្តីម៉ាត់ៗថាតុងកាសែតរបស់លោកគឺនៅដដែល។ប៉ុន្តែម្តងនេះលោកសរសេរអត្ថបទប្រឆាំងដោយគោរពទៅតាមក្រមសីលធម៌វិជ្ជាជីវៈអ្នកកាសែត។
បច្ចុប្បន្នប្រទេសកម្ពុជាមានកាសែតប្រឆាំងចំនួនបីប៉ុន្តែកាសែតទាំងបីនេះតែងតែបិទការផ្សាយរបស់ខ្លួនប្តូរវេនគ្នាដោយសារតែបញ្ហាហិរញ្ញវត្ថុ។
ការបើកកាសែតប្រឆាំងឡើងវិញត្រូវបានធ្វើឡើង២ថ្ងៃមុនទិវាសេរីភាពសារព័ត៌មានអន្តរជាតិ។ការប្រារព្ធទិវាសេរីភាពសារព័ត៌មានអន្តរជាតិនៅឆ្នាំនេះ ត្រូវប្រារព្ធឡើងក្នុងបរិបទដែលអ្នកកាសែតកម្ពុជាមួយចំនួននៅតែប្រឈមមុខនឹងការគំរាមកំហែង និងការប្តឹងផ្តល់ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ