គ.ជ.ប.ថា លោកស្រី មូ សុខហួរ មានឈ្មោះបោះឆ្នោតពីរកន្លែង
គណៈកម្មការ ជាតិរៀបចំការបោះឆ្នោតបានធ្វើសេចក្តីបំភ្លឺជាសាធារណៈមួយកាលពី ថ្ងៃទី២២មេសាច្រានចោលប្រសាសន៍លោកស្រី មូ សុខហួរ ដែលថ្លែងថា ឈ្មោះលោកស្រីមិនមាននៅក្នុងបញ្ជីបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
សំឡេងរបស់ លាង ដឺលុច
កាសែតជាភាសាអង់គ្លេស The Cambodia Dailyបានចេញផ្សាយអត្ថបទមួយកាលពីថ្ងៃទី២១មេសា និយាយអំពីជំនួយរបស់អង្គការUSAIDដល់កម្ពុជាដើម្បីតម្លាភាពក្នុងរដ្ឋាភិបាល។ អ្នកនិពន្ធអត្ថបទបានជួបសម្ភាសន៍លោកស្រី មូ សុខហួរ តំណាងរាស្ត្រគណបក្ស សម រង្ស៊ី ដើម្បីអត្ថាធិប្បាយលើការងាររបស់រដ្ឋាភិបាល។ នៅក្នុងអត្ថបទលោកស្រី មូ សុខហួរ បាននិយាយដល់ការងាររបស់គណៈកម្មាធិការជាតិរៀបចំការបោះឆ្នោត ថាត្រូវតែឯករាជ្យ។
អត្ថបទកាសែតបានសរសេរដកស្រង់សម្តីលោកស្រី មូ សុខហួរ ថា ឈ្មោះលោកស្រីមិនមាននៅក្នុងបញ្ជីអ្នកបោះឆ្នោតកាលពីនៅក្នុងការបោះឆ្នោតឆ្នាំ២០០៨។ ការអះអាងត្រង់នេះហើយ ដែលតម្រូវអោយគណៈកម្មាធិការជាតិរៀបចំការបោះឆ្នោត ធ្វើការបំភ្លឺជាសាធារណៈមួយ ដោយច្រានចោលប្រសាសន៍របស់លោកស្រី មូ សុខហួរ។
គណៈកម្មាធិការជាតិរៀបចំការបោះឆ្នោតបានសរសេរថា មិនមែនថា លោកស្រី មូ សុខហួរ មិនមានឈ្មោះក្នុងបញ្ជីឈ្មោះអ្នកបោះឆ្នោតទេ។ តែលោកស្រី មូ សុខហួរ មានឈ្មោះដល់ទៅ២កន្លែងឯណោះ។ ទីមួយ គឺនៅភ្នំពេញ និងឈ្មោះទី២ គឺនៅឯខេត្តកំពត ជាមណ្ឌលឈ្មោះតំណាងរាស្ត្រដែលលោកស្រីបានប្តូរពីភ្នំពេញទៅ។
លោកស្រី មូ សុខហួរ បញ្ជាក់ថា អ្វីដែលលោកស្រីនិយាយជាមួយកាសែតCambodia Dailyនោះ គឺជារឿងចាស់ ដែលកើតឡើងមុនពេលបោះឆ្នោតឆ្នាំ២០០៨ទេ។ លោកស្រីបានអះអាងថា ឈ្មោះលោកស្រីពិតជាត្រូវបានលុបចោលពីបញ្ជីឈ្មោះអ្នកបោះឆ្នោតមែន នៅភ្នំពេញ។ ហើយក្រោយពីលោកស្រីដាក់ពាក្យបណ្តឹងទៅ ទើបគ.ជ.ប.សរសេរឈ្មោះលោកស្រីចូលមកវិញ។
លោកស្រី មូ សុខហួរ បានលើកឡើងអំពីរឿងចាស់ទេ ប៉ុន្តែការបំភ្លឺរបស់ គ.ជ.ប. វាបានធ្វើអោយលេចចេញនូវរឿងថ្មីមួយទៅវិញ។ រឿងថ្មីនោះគឺថា បើតាមការពន្យល់របស់ គ.ជ.ប. បន្ទាប់ពីលោកស្រី មូ សុខហួរ បានទៅឈរឈ្មោះជាបេក្ខជនតំណាងគណបក្ស សម រង្ស៊ី នៅមណ្ឌលកំពត លោកស្រីក៏បានទៅចុះឈ្មោះក្នុងបញ្ជីឈ្មោះអ្នកបោះឆ្នោតមួយទៀតនៅខេត្តកំពត។ ជាហេតុដែលធ្វើអោយលោកស្រីមានឈ្មោះបោះឆ្នោតដល់ទៅ២កន្លែង។ យោងតាមសេចក្តីបំភ្លឺរបស់គជប គជបមិនបានប្រកាសថានឹងលប់ចោលឈ្មោះលោកស្រី មូ សុខហួរ ណាមួយទេ។ តែ គ.ជ.ប.បញ្ជាក់ថា ច្បាប់បានកំណត់អោយពលរដ្ឋខ្មែរមានឈ្មោះបោះឆ្នោតតែមួយប៉ុណ្ណោះ។
លោកស្រី មូ សុខហួរ ថា បើច្បាប់តម្រូវអោយពលរដ្ឋខ្មែរមានឈ្មោះបោះឆ្នោតតែមួយ លោកស្រីនឹងអនុវត្តទៅតាមច្បាប់តម្រូវ។ គួររំលឹកថា ជារៀងរាល់ឆ្នាំគ.ជ.ប. តែងតែប្រកាសធ្វើបច្ចុប្បន្នភាពបញ្ជីឈ្មោះអ្នកបោះឆ្នោត ដើម្បីពិនិត្យឡើងវិញស្ថានភាពរបស់អ្នកបោះឆ្នោត ថាតើមានអ្នកផ្លាស់ប្តូរទីលំនៅ អ្នកស្លាប់ ឬក៏ថាបើមានឈ្មោះត្រួតគ្នា គេត្រូវបំពេញសំណុំបែបបទដើម្បីលុបឈ្មោះមួយចេញវិញ។ ហើយជារៀងរាល់ពេលធ្វើបច្ចុប្បន្នភាពបញ្ជីឈ្មោះអ្នកបោះឆ្នោតនេះហើយ ដែលតែងតែមានបញ្ហាតវ៉ាកើតឡើងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ