រដ្ឋាភិបាលកំពុងតាក់តែងច្បាប់អាស៊ីត
ច្បាប់គ្រប់គ្រងទឹកអាស៊ីតដែលមាន ៤ជំពូក និង២៥ មាត្រា ត្រូវបានគណៈកម្មការចម្រុះរបស់រដ្ឋាភិបាលកំពុងតែតាក់តែង។ ច្បាប់ថ្មីនេះបានកំណត់ដាក់ទោសលើឧក្រិដ្ឋជនដែលប្រើទឹកអាស៊ីតជា អាវុធឲ្យជាប់ពន្ធនាគារ ចាប់ពី ៥ឆ្នាំ ដល់មួយជីវិត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីព្រាងច្បាប់ទឹកអាស៊ីតនឹងត្រូវបញ្ចប់ នាក្រោយពិធីបុណ្យចូលឆ្នាំថ្មី នៅខែមេសាខាងមុខ ដើម្បីដាក់ទៅកាន់គណៈរដ្ឋមន្ត្រីមុននឹងបញ្ជូនទៅរដ្ឋសភាសម្រេច។ ច្បាប់ថ្មីនេះត្រូវបានតាក់តែងដើម្បីកំណត់ពីការគ្រប់គ្រងទឹកអាស៊ីត និងដាក់ទោសលើជនប្រព្រឹត្តល្មើសជះទឹកអាស៊ីតឲ្យជាប់ពន្ធនាគារពី ៥ឆ្នាំ ទៅមួយជីវិត។
លោកឧត្តមសេនីយ៍ អ៊ុក គឹមលេខ អនុរដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មការតាក់តែងសេចក្តីព្រាងច្បាប់អាស៊ីត បានប្រាប់អ្នកកាសែត នៅថ្ងៃនេះថា រដ្ឋាភិបាលមានឆន្ទៈដើម្បីជម្រុញឲ្យច្បាប់គ្រប់គ្រងទឹកអាស៊ីតចេញជា រូបរាងក្នុងពេលឆាប់ៗនេះ។ នៅថ្ងៃសុក្រខាងមុខ គណៈកម្មការចម្រុះនឹងជួបប្រជុំជាលើកទីពីរ ដើម្បីពិនិត្យលើពង្រាងច្បាប់ស្តីពីទឹកអាស៊ីត។
លោកឧត្តម សេនីយ៍បានបន្ថែមថា ជាគោលការណ៍រួម ច្បាប់អាស៊ីតមានចរិកបង្ការ និងបង្ក្រាប ឈានទៅកាត់បន្ថយបទឧក្រិដ្ឋដោយប្រើទឹកអាស៊ីតជាអាវុធ។ ច្បាប់នេះបានកំណត់ដោយម៉ត់ចត់លើការគ្រប់គ្រង និងចរាចរលក់ដូរទឹកអាស៊ីត ដូចជាអ្នកលក់ត្រូវមានសញ្ជាតិខ្មែរ និងមានអាយុលើសពី ២០ឆ្នាំ ហើយមិនត្រូវលក់ឲ្យកុមារ ដូចពេលមុនទៀតទេ។
ក្នុងពិធីជួបជុំនិយាយពីគ្រោះថ្នាក់ ដោយទឹកអាស៊ីត នៅថ្ងៃនេះ លោកស្រីពុង ឈីវហ្គេក ប្រធានអង្គការសិទ្ធិមនុស្សលីកាដូ បានសម្តែងការគាំទ្រចំពោះរដ្ឋាភិបាលលើការតាក់តែងច្បាប់គ្រប់គ្រង ទឹអាស៊ីត។
លោកស្រី បានលើកឡើងថា សោកនាដកម្មដោយទឹកអាស៊ីតលើជនរងគ្រោះ ដែលភាគច្រើនជាស្ត្រី នៅកម្ពុជាកើតឡើងគួរឲ្យព្រួយបារម្ភ នាពេលនេះ។ ការវាយប្រហារដោយទឹកអាស៊ីត ជាអំពើហិង្សាដ៏ឃោរឃៅ និងជាបទឧក្រិដ្ឋ ដែលត្រូវតែដាក់ទោសធ្ងន់ធ្ងរលើជនល្មើស។ ទឹកអាស៊ីតធ្វើឲ្យជនរងគ្រោះវេទនាពិបាកជាងស្លាប់ អស់មួយជីវិត។ ទឹកអាស៊ីត ធ្វើឲ្យជនរងគ្រោះ ពិការភ្នែក រលួយស្បែក ខូចមុខមាត់ និងរហូតដល់ស្លាប់។
គិតពីឆ្នាំ ១៩៩៩ ដល់ ឆ្នាំ២០០២ មានមនុស្ស ៦០ នាក់រងរបួសដោយការវាយប្រហារទឹកអាស៊ីត នៅកម្ពុជា និងមាន ៣នាក់បានស្លាប់។ ការវាយប្រហារដោយទឹកអាស៊ីត ភាគច្រើនកើតឡើង នៅភ្នំពេញ និងដោយសារតែរឿងគំនុំស្នេហាត្រីកោណ។ កំណើនជនរងគ្រោះដោយទឹកអាស៊ីតបានកើនឡើង ជាបន្តបន្ទាប់ នៅឆ្នាំ២០០៨ មាន៧ នាក់ ឆ្នាំ២០០៩ មាន ៣៣ នាក់ និង៣ ខែដើម ឆ្នាំ២០១០នេះ មានជនរងគ្រោះចំនួន ១៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ