លោកសម រង្ស៊ីអំពាវនាវអោយកសិករប្តូរបច្ចេកទេសដាំស្រូវក្នុងឆ្នាំថ្មី
មេគណបក្សប្រឆាំងគឺលោកសម រង្ស៊ីបានធ្វើសារជូនពរមួយដល់ពលរដ្ឋកម្ពុជាក្នុងឱកាសបុណ្យ ចូលឆ្នាំប្រពៃណីខ្មែរ ហើយបានអំពាវនាវអោយ កសិករខ្មែរផ្លាស់ប្តូរគំនិតក្នុងការដាំស្រូវ។ លោកសម រង្ស៊ីចង់អោយកសិករខ្មែរងាកមកធ្វើស្រែតាមបែបប្រព័ន្ធ ប្រពលវប្បកម្ម។
ចុះផ្សាយនៅថ្ងៃ៖
ប្រធានគណបក្សប្រឆាំងលោកសម រង្ស៊ីមិនបានសម្ងំស្ងៀមនៅក្នុងការគេចខ្លួនពីក្តីក្តាំនៅក្នុង ប្រទេសកម្ពុជាឡើយ។ ក្នុងឱកាសបុណ្យចូលឆ្នាំប្រពៃណីខ្មែរ លោកសម រង្ស៊ីបានអំពាវនាវពីប្រទេសបារាំង អោយប្រជាកសិករខ្មែរផ្លាស់ប្តូរទម្លាប់ពីការធ្វើស្រែប្រវាស់មេឃ ឬតាមយថាកម្មនោះ មកជាការធ្វើស្រែតាមប្រព័ន្ធប្រពលវប្បកម្មវិញ។ ការធ្វើស្រែតាមបែបប្រព័ន្ធប្រពលវប្បកម្មគឺជារបៀបធ្វើស្រែ ជាមួយនឹងការច្នៃប្រឌិត តាំងពីការជ្រើសរើសពូជស្រូវការប្រើប្រាស់ប្រភេទជី ធ្វើយ៉ាងណាដើម្បីទទួលបានទិន្នផលខ្ពស់។
ក្នុងសារលិខិតរបស់ លោកចុះថ្ងៃទី១១មេសា លោកសម រង្ស៊ីបានអះអាងថា គណបក្សរបស់លោកកំពុងផ្តោតការយកចិត្តទុកដាក់យ៉ាងខ្លាំងទៅលើការ បណ្តុះបណ្តាលបច្ចេកទេសកសិកម្មទំនើបដល់កសិករនៅទូទាំងប្រទេសដើម្បី ជួយដល់កសិករអោយទទួលទិន្នផលខ្ពស់ និងរកទីផ្សារជូនកសិករ ដើម្បីលក់កសិផលក្នុងតម្លៃខ្ពស់សមរម្យ។ ធ្វើយ៉ាងនេះគឺលោកសម រង្ស៊ីអះអាងថា ដើម្បីលើកកំពស់កំរិតជីវភាពរស់នៅរបស់កសិករឲ្យបានធូរធារ។
លោក យ៉ង់ សាំងកុមារ ដែលជាប្រធានមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជាហៅ កាត់ថាសេដាក់(CEDAC)បានអត្ថាធិប្បាយថាលើការអំពាវនាវរបស់មេគណបក្ស ប្រឆាំងថាជាការអំពាវនាវត្រឹមត្រូវ និងជាការជម្រុញបន្ថែមដល់ប្រជាកសិករខ្មែរអោយចាប់អារម្មណ៍លើការ ធ្វើស្រែតាមបែបប្រព័ន្ធប្រពលវប្បកម្មនេះ។ លោកយ៉ង់ សាំងកុមារបានពន្យល់អោយដឹងថាការផ្លាស់ប្តូរទម្លាប់ពីការធ្វើស្រែ តាម យថាកម្ម ហើយត្រឡប់ធ្វើស្រែតាមរបៀបប្រពលវប្បកម្មនេះគឺមានតែផ្តល់ប្រយោជន៍ ដល់កសិករខ្មែរតែប៉ុណ្ណោះ។ បើតាមអ្នកជំនាញកសិកម្មរូបនេះសព្វថ្ងៃប្រជាកសិករខ្មែរច្រើនឡើងៗ ពីមួយឆ្នាំទៅមួយឆ្នាំបាននាំគ្នាអនុវត្តការដាំស្រូវតាមបែប ប្រព័ន្ធប្រពលវប្បកម្មនេះ ក្រោយពីមានការផ្សព្វផ្សាយនិងបង្រៀនរបស់អង្គការសេដាក់របស់លោក និងការចូលរួមរបស់ក្រសួងកសិកម្ម។
លោកនាយករដ្ឋមន្ត្រីខ្មែរហ៊ុន សែនក៏តែងបានលើកឡើងថារដ្ឋាភិបាលរបស់លោកកំពុងដោះស្រាយបញ្ហា ប្រព័ន្ធស្រោចស្រព និងជម្រុញការផលិតស្រូវដើម្បីធ្វើយ៉ាងណាអោយកម្ពុជាអាចក្លាយជា ប្រទេសផលិត និងនាំចេញស្រូវអង្ករច្រើនជាងគេក្នុងពិភពលោកក្នុងអំឡុងឆ្នាំ២០១៥ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ