អ្នកនាំពាក្យរដ្ឋាភិបាល មិនភ្ញាក់ផ្អើល ដែលមន្ត្រីរដ្ឋាភិបាលមានប្រាក់ច្រើន ដើម្បីទទួលបានសញ្ជាតិលើសពី១
អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន យល់ថា ការមានសញ្ជាតិ ២ របស់មន្ត្រីជាន់ខ្ពស់រដ្ឋាភិបាលកម្ពុជា មិនមានរឿងអ្វីគួរឲ្យភ្ញាក់ផ្អើលនោះទេ ព្រោះថាកម្ពុជា គ្មានច្បាប់ រឹតត្បិតនរណាម្នាក់ មិនឲ្យមានសញ្ជាតិ ២នោះឡើយ។ ការលើកឡើងរបស់លោកផៃ ស៊ីផាន នេះ គឺបន្ទាប់ពីមានការចុះផ្សាយរបស់សារព័ត៌មានអង់គ្លេស Reuters ថាសែស្រឡាយលោកនាយករដ្ឋមន្ត្រីហ៊ុន សែន និងមន្ត្រីជាន់ខ្ពស់រដ្ឋាភិបាលមួយចំនួន កំពុងមានសញ្ជាតិ ២ និងកំពុងបន្តដំណើរការសុំសញ្ជាតិនោះ ពីប្រទេសស៊ីប (Cyprus)។
ចុះផ្សាយនៅថ្ងៃ៖
ស្តាប់ - ០២:១៦
លោក ផៃ ស៊ីផាន បានប្រាប់វិទ្យុបារាំងអន្តរជាតិ នៅថ្ងៃសុក្រនេះថា ការមានសញ្ជាតិ ២របស់មន្ត្រីជាន់ខ្ពស់រដ្ឋាភិបាលកម្ពុជា និងសាច់ញាតិរបស់លោកនាយករដ្ឋមន្ត្រីហ៊ុន សែន គឺមិនមែនជារឿងអ្វីធំដុំ គួរយកមកកកូរកកាយទេ ព្រោះថាសញ្ជាតិ ២ គឺជាផលប្រយោជន៍របស់ប្រទេសនីមួយៗ។
លោកផៃ ស៊ីផាន ដែលមានសញ្ជាតិខ្មែរ និងអាមេរិកផងនោះ បានបន្តថា ការមានសញ្ជាតិ ២ របស់បុគ្គលម្នាក់ៗ គឺអាចផ្តល់លទ្ធភាពសម្រាប់ការបន្តាក់ទុន ភាពងាយស្រួលក្នុងការរស់នៅ ឬ ការសិក្សា ដែលជាទិសដៅសេដ្ឋកិច្ចសុទ្ធសាធ មិនមែនជាទិសដៅនយោបាយនោះទេ។
សូមរម្លឹកជូនថា កាលពីសប្តាហ៍មុន ទីភ្នាក់ងារព័ត៌មានអង់គ្លេស Reuters បានចុះផ្សាយអត្ថបទបែបស៊ើបអង្កេតយ៉ាងវែងមួយថា ក្មួយស្រីរបស់លោកនាយករដ្ឋមន្ត្រី ហ៊ុន សែន គឺលោកស្រី ហ៊ុន គីមឡេង ដែលជាអ្នកជំនួញម្នាក់ នៅកម្ពុជា បានទទួលសញ្ជាតិស៊ីប។ ហើយកូនស្រី និងស្វាមីរបស់លោកស្រី គឺលោក នេត សាវឿន អគ្គស្នងការនគរបាលជាតិ កំពុងស្នើសុំសញ្ជាតិនេះដូចគ្នា។ ចំណែករដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានស្នើសុំសញ្ជាតិ ខណៈដែលលោកឧកញ៉ា ឡៅ ម៉េងឃីន ព្រឹទ្ធសមាជិករបស់គណបក្សប្រជាជនកម្ពុជា និងជាអ្នកជំនួញដ៏ល្បីឈ្មោះមួយរូប និងភរិយារបស់លោក ក៏បានទទួលសញ្ជាតិពីសាធារណរដ្ឋស៊ីបនេះផងដែរ។
តាំងពីឆ្នាំ ២០១៣មក ប្រទេសស៊ីប បានកំណត់ផ្តល់សញ្ជាតិដល់ពលរដ្ឋបរទេស ដែលបានវិនិយោគក្នុងប្រទេសនេះ ក្រោមទំហំទឹកប្រាក់យ៉ាងតិចបំផុត ២លានអឺរូ ឬ ប្រមាណ ២,២លានដុល្លារអាមេរិក ដើម្បីទទួលសញ្ជាតិស៊ីប។ លិខិតឆ្លងដែនរបស់ពលរដ្ឋស៊ីប មានឥទ្ធិពលលើទិដ្ឋាការចេញចូលដោយសេរី ក្នុងប្រទេសចំនួន ១៧៣លើពិភពលោក ដោយក្នុងនោះ រួមមានទាំងចក្រភពអង់គ្លេស និងសហភាពអឺរុបទៀតផង។
នៅពេលសួរថា តើការមានប្រាក់យ៉ាងសម្បើមដើម្បីដោះដូរនឹងសញ្ជាតិ ២នេះ មានន័យយ៉ាងណា? លោកផៃ ស៊ីផាន បានតបថា ប្រទេសកម្ពុជាមានទីផ្សារសេរី និងសេដ្ឋកិច្ចទូលំទូលាយ ដូច្នេះការមានប្រាក់កាសច្រើនរបស់បុគ្គលម្នាក់ៗ មិនគួរជារឿងចម្លែកនោះឡើយ។
យ៉ាងណាមិញ បន្ទាប់ពីការចុះផ្សាយរបស់ Reuters គណបក្សប្រឆាំងនៅប្រទេសស៊ីប បានអំពាវនាវឲ្យមានការពន្យល់ពីរដ្ឋាភិបាលស៊ីប ទៅលើការផ្តល់សញ្ជាតិ ដល់សែស្រឡាយរបស់ប្រមុខដឹកនាំរដ្ឋាភិបាលកម្ពុជានេះ។ ហើយមកដល់ពេលនេះ វិទ្យុបារាំងអន្តរជាតិ នៅពុំទាន់អាចទាក់ទងសុំការបំភ្លឺពីលោក នេត សាវឿន អគ្គស្នងការនគរបាលជាតិ ដែល Reuters បានចុះផ្សាយថាកំពុងស្នើសុំសញ្ជាតិស៊ីបនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ