អង្គការអន្តរជាតិពីរចេញមុខថ្កោលទោសក្រសួងអប់រំរឿងបញ្ឈប់គ្រូបង្រៀន១១នាក់ពីការងារ
សហភាពសហជីពអន្តរជាតិ (ITUC) និងអង្គការអប់រំអន្តរជាតិ (EI) នៅថ្ងៃទី២០ មីនាម្សិលមិញ បានចេញមុខថ្កោលទោសយ៉ាងខ្លាំងទៅនឹងការសម្រេចបណ្តេញគ្រូបង្រៀននិងបុគ្គលិកសិក្សាចំនួន១១រូបរបស់ក្រសួងអប់រំកម្ពុជា។ បន្ថែមលើការថ្កោលទោស អង្គការអន្តរជាតិទាំងពីរនេះ ក៏បានទាមទារឲ្យក្រសួងអប់រំទទួលយកពួកគេឲ្យចូលធ្វើការវិញថែមទៀត។
ចុះផ្សាយនៅថ្ងៃ៖
ស្តាប់ - ០២:២៤
សហភាពសហជីពអន្តរជាតិ (ITUC) និងអង្គការអប់រំអន្តរជាតិ (EI) បានអះអាងថា គ្រូបង្រៀន និងបុគ្គលិកសិក្សាទាំង១១នាក់នេះ បានឈប់សម្រាកពីការងារនៅចន្លោះឆ្នាំ២០១៦ និងឆ្នាំ២០១៧ដោយមានការយល់ព្រមពីក្រសួងអប់រំកម្ពុជា។ តែទោះជាបែបនេះក្តី ក្រសួងមួយនេះ បែរជាបដិសេធមិនព្រមទទួលយកពួកគេឲ្យចូលធ្វើការវិញកាលពីចន្លោះខែមករា និងខែមីនាឆ្នាំនេះ ដោយមូលហេតុថា អវត្តមានដោយគ្មានច្បាប់អនុញ្ញាត។ ការណ៍នេះធ្វើឲ្យអង្គការអន្តរជាតិទាំងពីរសង្ស័យថា ការលុបឈ្មោះរបស់ពួកគេចេញពីក្របខណ្ឌក្រសួងអប់រំនេះ ធ្វើឡើងក្រោមហេតុផលនយោបាយ។
ប្រតិកម្មរបស់អង្គការអន្តរជាតិទាំងពីរ ធ្វើឡើងក្រោយពីគ្រូបង្រៀន និងបុគ្គលិកសិក្សាទាំង១១នាក់ ក្នុងនោះក៏មានលោករ៉ុង ឈុន ម្នាក់ផង ត្រូវបានក្រសួងអប់រំលុបឈ្មោះចេញពីក្របខណ្ឌក្រសួងកាលពីថ្ងៃទី៣០ មករាកន្លងទៅ។ ក្រោយមក អ្នកទាំងនេះតាមរយៈសមាគមគ្រូបង្រៀនកម្ពុជាឯករាជ្យក៏បានស្វែងរកការជួយអន្តរាគមន៍ពីសំណាក់សហភាពសហជីពអន្តរជាតិ (ITUC) និងអង្គការអប់រំអន្តរជាតិ (EI)។ សម្រាប់អង្គការអន្តរជាតិទាំងពីរ ការបញ្ឈប់គ្រូបង្រៀននិងបុគ្គលិកសិក្សាទាំងនេះ គឺធ្វើឡើងខុសច្បាប់។ ខុសច្បាប់ គឺនៅត្រង់ថា ច្បាប់កម្ពុជាអនុញ្ញាតឲ្យមន្រ្តីរាជការស៊ីវិលអាចផ្លាស់ប្តូរទៅកាន់កន្លែងផ្សេងហើយក៏អាចមកកាន់កន្លែងដើមវិញនៅពេលបញ្ចប់ការផ្លាស់ប្តូរនោះ។ អង្គការទាំងពីរអះអាងទៀតថា ច្បាប់ស្តីពីលក្ខន្តិកៈទូទៅរបស់មន្រ្តីរាជការស៊ីវិលអនុញ្ញាតឲ្យមានការបញ្ឈប់ពីការងារបាន លុះត្រាតែមានការសាកសួរជាផ្លូវការមួយនៅចំពោះមុខក្រុមប្រឹក្សាវិន័យ។ តែការបញ្ឈប់នេះមិនត្រូវបានធ្វើក្នុងទម្រង់បែបនេះឡើយ។
ក៏ប៉ុន្តែសម្រាប់ក្រសួងអប់រំកម្ពុជាវិញ ការបញ្ឈប់អ្នកទាំងនេះ គឺក្រសួងអនុវត្តទៅតាមច្បាប់ស្តីពីលក្ខន្តិកៈទូទៅរបស់មន្រ្តីរាជការស៊ីវិល ក៏ដូចជាអនុក្រិដ្ឋនិងសេចក្តីប្រកាសផ្សេងៗរបស់ក្រសួងអប់រំ។ ក្រសួងអប់រំបានរំលេចត្រង់ចំណុចនេះថា ពេលបញ្ចប់តួនាទីនៅកន្លែងថ្មីភា្លម គ្រូបង្រៀន និងបុគ្គលិកសិក្សាទាំងនេះ មិនបានដាក់ពាក្យស្នើសុំចូលកន្លែងចាស់វិញភា្លមទេ ដែលនេះ គឺជាមូលហេតុនៃការបញ្ឈប់។
ទោះបីជាយ៉ាងណាក៏ដោយ សហភាពសហជីពអន្តរជាតិ (ITUC) និងអង្គការអប់រំអន្តរជាតិ(EI) តាមរយៈសេចក្តីថ្លែងការណ៍ដដែល និងតាមរយៈលិខិតដាច់ដោយឡែកមួយទៀតទៅកាន់លោករដ្ឋមន្រ្តីអប់រំ ហង់ ជួនណារ៉ុន បានទាមទារឲ្យក្រសួងអប់រំទទួលយកគ្រូបង្រៀន និងបុគ្គលិកសិក្សាទាំង១១នាក់នេះ ឲ្យចូលធ្វើការឡើងវិញ។ លោកហង់ ជួនណារ៉ុន រដ្ឋមន្រ្តីក្រសួងអប់រំមិនអាចទាក់ទងសុំការបំភ្លឺបាននៅឡើយទេ ខណៈក្រសួងអប់រំបើកសន្និបាតអប់រំ យុវជន និងកីឡានៅថ្ងៃចុងក្រោយ នៅឯវិទ្យាស្ថានបច្ចេកវិទ្យាកម្ពុជា ពេញមួយថ្ងៃពុធទី២១មីនានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ