កម្មករព្រមានធ្វើកូដកម្មបើមិនបានប្រាក់ឈ្នួល១៦០ដុល្លារ
មួយថ្ងៃមុនការកំណត់ប្រាក់ឈ្នួលប្រចាំឆ្នាំ២០១៦មកដល់នៅថ្ងៃទី០៨តុលាស្អែកកម្មករ-កម្មការិនីធ្វើការនៅក្នុងរោងចក្រសួនឧស្សាហកម្មកាណាឌីយ៉ាបានជួបជុំសម្ដែងមតិនៅថ្ងៃទី០៧តុលានេះ។ ការជួបជុំនេះគឺសារបង្ហាញទៅរដ្ឋាភិបាលនិងថៅកែរោងចក្រថា ពួកគេមិនពេញចិត្តជាមួយតួលេខទឹកប្រាក់ដែលគ្រោងនឹងផ្ដល់ឲ្យ។ កម្មករថែមទាំងបានព្រមានទៀតថា ពួកគេនឹងធ្វើកូដកម្មប្រសិនមិនបានប្រាក់ឈ្នួល១៦០ដុល្លារ។
ចុះផ្សាយនៅថ្ងៃ៖
ស្តាប់ - ០២:០៧
«បងប្អូនយើងមកធ្វើអី? យើងមកទាមទារ ធ្វើម៉េចបាន? សាមគ្គីគ្នាដើម្បីទាមទារ ដោយសារតែចចារមានការតឹងតែងដោយសារតែនិយោជកព្រមឲ្យតែ៥ដុល្លារប៉ុណ្ណោះ។ តើយើងយកអត់? អត់ ! បើសិនជាតែ៥ដុល្លារយើងធ្វើម៉េចទៀត? កូដកម្ម! កូដកម្ម!» សម្រែកនៃការទាមទាររបស់កម្មករនេះផ្ដើមចេញពីតំបន់ឧស្សាហកម្មកាណាឌីយ៉ានៅកណ្ដាលទីក្រុងភ្នំពេញដែលមានកម្មករចូលរួមជាច្រើនរយនាក់ជាមួយនិងការលើកបដាទាមទារ។
លោក អាត់ ធន់ ប្រធានសហជីពប្រជាធិបតេយ្យកម្មករកាត់ដេរកម្ពុជា ដែលបានដឹកនាំការជួបជុំនេះបានស្រែកនៅចំពោះមុនកម្មករថា ការចរចាមានភាពតានតឹងដោយសារតែនិយោជកសម្រេចផ្ដល់ឲ្យកម្មករតែ៥ដុល្លារ ហើយរដ្ឋាភិបាលសម្រេចផ្ដល់ឲ្យ៧.៥ដុល្លារ ដែលផ្ទុយពីបំណងកម្មករចង់បាន១៦០ដុល្លារ។
លោក អាត់ ធន់ ឲ្យដឹងទៀតថានៅថ្ងៃនេះមានការជួបជុំចំនួន៦០កន្លែងទាំងនៅក្នុងរាជធានីភ្នំពេញ ខេត្តកណ្ដាល កំពង់ស្ពឺ កំពង់សោម និង ស្វាយរៀង។ ហើយការជួបជុំនេះគឺជាសារបង្ហាញថា កម្មករពួកគេមិនពេញចិត្តនិងតួលេខទឹកប្រាក់ដែលនិយោជកនិងរដ្ឋាភិបាលគ្រោងផ្ដល់ជូននិងស្នើបន្តឲ្យលុបបំបាត់កិច្ចសន្យាការងារខ្លីដើម្បីកុំឲ្យបង្កើតច្បាប់ដែលមានភាពរឹតបណ្តឹងនិងពិនិត្យលក្ខខណ្ឌការងារប្រសើរជាដើម។
សូមបញ្ជាក់ថា ប្រាក់ឈ្នួលទាបបំផុតសម្រាប់កម្មករក្នុងរោងចក្រកាត់ដេរសម្លៀកបំពាក់និងផលិតស្បែកជើងកម្ពុជាក្នុងឆ្នាំ២០១៥គឺ១២៨ដុល្លារក្នុងមួយខែ។
រួមជាមួយប្រាក់អត្ថប្រយោជន៍ផ្សេងៗកម្មករកម្ពុជាក្នុងវិស័យវាយភណ្ឌមានចំណូលមធ្យមប្រចាំខែចាប់ពី១៤៧ដុល្លារទៅ១៥៦ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ