អនុប្រធានប្ដឹងរំលាយបក្សសម្បុកឃ្មុំហើយមានគម្រោងបង្កើតគណបក្សថ្មី
វិវាទផ្ទៃក្នុងគណបក្សសម្បុកឃ្មុំសង្គមប្រជាធិបតេយ្យរហូតមកដល់ពេលនេះឈានដល់ការដាក់ពាក្យបណ្ដឹងឲ្យរំលាយគណបក្ស។ លោក ហៀង ឬទ្ធី អនុប្រធានគណបក្សដែលជាអ្នកដាក់ពាក្យបណ្ដឹងដោយផ្ទាល់នោះរួមនិងអ្នកច្បាប់ឯទៀតប្រកាសថា មានគម្រោងបង្កើតគណបក្សថ្មីនិងបានប្រកាសចង់សម្ព័ន្ធភាពជាមួយគណបក្សផ្សេងជាមុន។
ចុះផ្សាយនៅថ្ងៃ៖
ស្តាប់ - ០១:៥៨
លោក ហៀងរិទ្ធី អនុប្រធានគណបក្សសម្បុកឃ្មុំសង្គមប្រជាធិតេយ្យបានដាក់ពាក្យបណ្ដឹងទៅតុលាការក្រុងភ្នំពេញកាលពីថ្ងៃទី០៦តុលាឆ្នាំ២០១៥ ស្នើសុំរំលាយគណបក្សមួយនេះចោលបន្ទាប់ពីរូបលោកនិងលោក ម៉ម សូណង់ដូ ដែលជាប្រធានធ្វើការមិនចុះសម្រុងគ្នាដែលផ្ដើមចេញពីបញ្ហាហិរញ្ញវត្ថុនិងបញ្ហាមួយចំនួនទៀត។ ប៉ុន្តែរហូតមកទល់ពេលនេះពាក្យបណ្ដឹងរបស់លោក ហៀង ឬទ្ធី នៅមិនទាន់មានការឆ្លើយតបពីតុលាការទេ ហើយលោកនឹងរងចាំពេលមួយសប្ដាហ៍ទៀតក្រែងមានការកោះហៅពីតុលាការ។ តែលោកថា គ្មានសង្ឃឹមនឹងទទួលបានយុត្តិធម៌ពីតុលាការស្រុកខ្មែរឡើយ។
លោក ហៀង រិទ្ធី រួមនិងអ្នកច្បាប់ឯទៀតដែលបានតួនាទីនៅក្នុងគណបក្សជាអគ្គលេខាធិការ អគ្គលេខាធិការរង បានចោទលោក ម៉ម សូណង់ដូ ថាជាអ្នកប្រជាធិបតេយ្យមានតែឈ្មោះហើយក្រុមរបស់លោកនឹងដើរចេញពីលោក ម៉ម សូណង់ដូទៅបង្កើតគណបក្សថ្មីមួយទៀតគឺប្រមូលអ្នកជាតិនិយមមកចង់ក្រងគ្នាដោយមិនទៅចូលរួមជាមួយគណបក្សនយោបាយផ្សេងទេ។ វិទ្យុបារាំងអន្តរជាតិRFIមិនអាចសុំការពន្យល់បន្ថែមពីលោក ម៉ម សូណង់ដូបានទេ។
បើតាមលោកហៀង រិទ្ធី គម្រោងបង្កើតបក្សថ្មីហាក់នៅឆ្ងាយបន្តិច តែបំណងរបស់លោកបានប្រកាសទុកជាមុនថានឹងចង់សម្ព័ន្ធភាពជាមួយគណបក្សផ្សេងទៀតដើម្បីដោះស្រាយប្រទេសជាតិប្រសិនបើលោកបង្កើតគណបក្ស។ ការមិនចុះចូលជាមួយគណបក្សផ្សេងបានធ្វើឲ្យអនុប្រធានគណបក្សសម្បុកឃ្មុំរូបនេះរិះគន់ទៅលើសកម្មភាពកន្លងមករបស់គណបក្សសង្គ្រោះជាតិនិងគណបក្សហ្វ៊ុនស៊ិនប៉ិចថាបានបោកប្រាស់ប្រជាពលរដ្ឋ។
សូមបញ្ជាក់ថា ជម្លោះផ្ទៃក្នុងគណបក្សសម្បុកឃ្មុំគឺកើតចេញពីការងារមិនចុះសម្រុងគ្នារវាងប្រធាននិងអនុប្រធានបក្សពិសេសទាក់ទងហិរញ្ញវត្ថុរបស់គណបក្សប្រើប្រាស់គ្មានតម្លាភាព។ គួររម្លឹកថា គណបក្សសម្បុកឃ្មុំសង្គមប្រជាធិបតេយ្យបានរៀបចំសមាជកាលពីថ្ងៃទី៩កញ្ញានិងសម្រេចជ្រើសលោកម៉ម សូណង់ដូ ជាប្រធាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ