លោក សុខ ទូច ថាតំណាងរាស្ត្រ អ៊ុំ សំអាន «អត់ចេះមើលផែនទី»
ប្រធានក្រុមស្រាវជ្រាវព្រំដែនកម្ពុជានៃរាជបណ្ឌិតសភាខ្មែរ បានអះអាងនៅថ្ងៃនេះថា លោក អ៊ុំ សំអាន ដែលជាអ្នកតំណាងរាស្ត្រ «អត់ចេះមើលផែនទី»។ លោក សុខ ទូច ថ្លែងដូច្នេះ បន្ទាប់ពីក្រុមស្រាវជ្រាវព្រំដែនកម្ពុជាបានផ្ទៀងផ្ទាត់ផែនទីកម្ពុជា ប្រភេទបោន ខ្នាត១/ ១០០ ០០០ ដែលលោក អ៊ុំ សំអាន បានរកឃើញនៅបណ្ណាល័យអង្គការសហប្រជាជាតិ។ អ្នកតំណាងរាស្ត្រខាងគណបក្សសង្គ្រោះជាតិរូបនេះ ធ្លាប់បានតម្រូវឱ្យរដ្ឋាភិបាលកម្ពុជា «សើរើការបោះបង្គោលព្រំដែនឡើងវិញ» ដោយសម្អាងលើផែនទីដែលលោក សុខ ទូច ថា «មិនស្របច្បាប់»។
ចុះផ្សាយនៅថ្ងៃ៖
ស្តាប់ - ០១:៥៤
លោក សុខ ទូច ដែលជាប្រធានក្រុមស្រាវជ្រាវព្រំដែនកម្ពុជានៃរាជបណ្ឌិតសភាខ្មែរ បានប្រាប់នៅព្រឹកថ្ងៃអាទិត្យថា ក្រុមការងារលោកបានផ្ទៀងផ្ទាត់រួចរាល់ហើយ នូវផែនទីកម្ពុជា ប្រភេទបោន ខ្នាត១/១០០០០០ ដែលតំណាងរាស្ត្រ អ៊ុំ សំអាន ទើបរកឃើញ។ លោក សុខ ទូច អះអាងថា អ្នកតំណាងរាស្ត្រកម្ពុជារូបនេះ «អត់ចេះមើលផែនទី»។
សូមរម្លឹកថា លោក អ៊ុំ សំអាន តំណាងរាស្ត្រខាងគណបក្សសង្គ្រោះជាតិ បានរកឃើញផែនទីកម្ពុជា«ជាង២០ផ្ទាំង» ប្រភេទបោន ខ្នាត១/១០០០០០ បោះពុម្ពដោយក្រុមភូមិសាស្ត្រឥណ្ឌូ ចិនឆ្នាំ១៩៥២ និងឆ្នាំ១៩៥៣ នៅក្នុងបណ្ណាល័យអង្គការសហប្រជាជាតិកាលពីពេលថ្មី។
លោក អ៊ុំ សំអាន បានសរសេរសារតាមរយៈហ្វេសប៊ុក ជម្រុញឱ្យរដ្ឋាភិបាល«សើរើការបោះបង្គោលព្រំដែនឡើងវិញ»ដោយសម្អាងលើផែនទីដែលទើបរកឃើញនោះ ហើយដែលលោកអះអាងថា«ស្របតាមមាត្រា២នៃរដ្ឋធម្មនុញ្ញកម្ពុជា»។ អ្នកតំណាងរាស្ត្ររូបនេះ បានសរសេរ និងផ្តល់សម្ភាសន៍ឱ្យវិទ្យុអាស៊ីសេរី និងសារព័ត៌មានភ្នំពេញប៉ុស្តិ៍ អំពីផែនទីនេះជាបន្តបន្ទាប់ ចាប់តាំងពីថ្ងៃទី០៧ ខែតុលា ឆ្នាំ២០១៥មក។
ប៉ុន្តែ ក្រុមស្រាវជ្រាវព្រំដែនកម្ពុជានៃរាជបណ្ឌិតសភា បានផ្ទៀងផ្ទាត់ឃើញថា ក្នុងចំណោមផែនទីកម្ពុជាចំនួន«២៣ផ្ទាំង»នោះ «មានតែ១១ផ្ទាំងទេដែលអាចប្រើការបាន» រីឯផ្ទាំងផ្សេងៗទៀត មានខ្លះជា«ផែនទីរួម» ខ្លះជា«ផែនទីនៅលើទឹកដីវៀតណាម» និងខ្លះទៀតជា«ផែនទីតំបន់ក្នុងផ្ទៃប្រទេស មិនមែនជាផែនទីព្រំដែនទេ»។ នេះបើយោងតាមការអះអាងរបស់លោក សុខ ទូច ដែលបានបញ្ជាក់បន្ថែមថា នៅលើផែនទីនោះ«ពុំមានការចុះហត្ថលេខាទទួលស្គាល់»ជាអន្តរជាតិក្នុងចន្លោះពីឆ្នាំ១៩៦៣ ដល់ឆ្នាំ១៩៦៩ ដូចមានចែងក្នុងមានត្រា២នៃរដ្ឋធម្មនុញ្ញកម្ពុជាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ