រដ្ឋាភិបាលសម្រេចដកសិទ្ធិគ្រប់គ្រងការលក់សំបុត្រចូលទស្សនាប្រាសាទអង្គរពីក្រុមហ៊ុន សុខា
នៅទីបំផុតទៅ រដ្ឋាភិបាលកម្ពុជាបានសម្រេច ដកសិទ្ធិគ្រប់គ្រងលើការលក់សំបុត្រ ចូលទស្សនាប្រាសាទអង្គរ ពីក្រុមហ៊ុន សុខា របស់លោកឧកញ៉ាសុខ គង់ វិញហើយ។ គណៈកម្មការអន្តរក្រសួងមួយដឹកនាំដោយក្រសួងទេសចរណ៍និង ក្រសួងសេដ្ឋកិច្ច និងហិរញ្ញវត្ថុ នឹងត្រូវបង្កើតឡើង ដើម្បីសិក្សាលើសេចក្តីសម្រេចនេះ។ ការប្រគល់ភារកិច្ចឲ្យក្រុមហ៊ុនឯកជនគ្រប់គ្រងលើចំណូលពីប្រាសាទ អង្គរ គឺជាប្រធានបទដែលគណបក្សប្រឆាំងបានរិះគន់ជាយូរមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
សេចក្ដីសម្រេចនេះនឹងចាប់អនុវត្តនៅដើមឆ្នាំ២០១៦ខាងមុខនេះតទៅ។ នេះបើយោងតាមសេចក្តីសម្រេចរបស់ប្រមុខរដ្ឋាភិបាលកម្ពុជា លោក ហ៊ុន សែន នៅក្នុងកិច្ចប្រជុំពេញអង្គគណៈរដ្ឋមន្ត្រី នៅព្រឹកថ្ងៃសុក្រ ទី០៦ ខែវិច្ឆិកានេះ។
លោកនាយករដ្ឋមន្ត្រី ហ៊ុន សែន បានចាត់ទុក ការដកសិទ្ធិគ្រប់គ្រងលើការលក់សំបុត្រចូលទស្សនាប្រាសាទអង្គរវត្តនេះថា គឺជាដំណឹងដ៏ល្អមួយ សម្រាប់ប្រជាពលរដ្ឋទូទាំងប្រទេស។ ហើយរាជរដ្ឋាភិបាលនឹងកាន់កាប់ចាត់ចែង គ្រប់គ្រង តំបន់អង្គរទាំងមូល រួមទាំងបុគ្គលិក និងចំណូលចំណាយ។ បើតាមកិច្ចប្រជុំនេះ គណៈកម្មការអន្តរក្រសួងមួយដឹកនាំដោយក្រសួងទេសចរណ៍និងក្រសួងសេដ្ឋកិច្ច និងហិរញ្ញវត្ថុ នឹងត្រូវបង្កើតឡើង ដើម្បីសិក្សាលើសេចក្តីសម្រេចនេះ។
តាមពិតទៅ កិច្ចសន្យារវាងក្រុមហ៊ុនសុខា របស់លោកឧកញ៉ា សុខ គង់ និងរដ្ឋាភិបាលកម្ពុជា ស្ដីពី ការគ្រប់គ្រងប្រាសាទអង្គរវត្តនេះ មិនទាន់ផុតកំណត់នៅឡើយទេ ព្រោះថា កិច្ចសន្យាដែលបានធ្វើឡើងកាលពីឆ្នាំ២០០០នោះ មានរយៈពេលរហូតដល់ទៅ៩០ឆ្នាំឯណោះ។ ហើយការដកសិទ្ធគ្រប់គ្រងពីក្រុមហ៊ុនរបស់លោកឧកញ៉ា សុខ គង់ នៅមុនពេលកំណត់នេះ បានធ្វើឡើងដោយពុំមានការបញ្ជាក់ពីមូលហេតុនោះទេ។ ប៉ុន្តែបើតាម លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី ការសម្រេចដកសិទ្ធិគ្រប់គ្រងលើការលក់សំបុត្រចូលទស្សនាតំបន់អង្គរពីក្រុមហ៊ុនរបស់លោកឧកញ៉ា សុខ គង់ នេះ គឺស្ថិតនៅក្នុងគម្រោងរបស់រដ្ឋាភិបាលយូរមកហើយ ហើយការប្រកាសនៅពេលនេះ គឺចំពេលដែលរដ្ឋាភិបាលកម្ពុជា កំពុងធ្វើកំណែទម្រង់ប្រព័ន្ធពន្ធដា សំដៅទាញរកចំណូលឲ្យបានច្រើន ដាក់ទៅក្នុងថង់ថវិកាជាតិ។
សូមបញ្ជាក់ថា ការប្រគល់សិទ្ធិគ្រប់គ្រងលើការលក់សំបុត្រចូលទស្សនាតំបន់ប្រាសាទអង្គរពីក្រុមហ៊ុនឯកជននេះ បានក្លាយជាប្រធានបទនៃការរិះគន់របស់គណបក្សប្រឆាំងជាយូរមកហើយ។ នៅក្នុងយុទ្ធនាការឃោសនាបោះឆ្នោតកាលពីឆ្នាំ២០១៣ លោក សម រង្ស៊ី បានសន្យាជាមួយអ្នកគាំទ្រថា នឹងយកប្រាសាទអង្គរវត្តនេះ មកឲ្យរដ្ឋគ្រប់គ្រងវិញ នៅពេលដែលគណបក្សប្រឆាំងឈ្នះឆ្នោត។ យ៉ាងណាក៏ដោយ លោក សុន ឆ័យ តំណាងរាស្ត្រគណបក្សសង្គ្រោះជាតិ បានស្វាគមន៍ចំពោះសេចក្ដីសម្រេចនេះ។ ប៉ុន្តែលោក សុន ឆ័យបានបញ្ជាក់ថា រដ្ឋាភិបាលគួរបើកការស៊ើបអង្កេតមួយ ទៅលើការអនុវត្តកិច្ចសន្យារបស់ក្រុមហ៊ុន ព្រោះលោក ជឿជាក់ថា ការអនុវត្តកន្លងមកគ្មានតម្លាភាពនោះទេ។
យោងតាមអាជ្ញាធរជាតិអប្សរា បានប្រកាសថា ចំណូលដែលបានពីការលក់ប័ណ្ណចូលទស្សនារមណីយដ្ឋានអង្គររយៈពេល១០ខែឆ្នាំ២០១៥ មានចំនួនជាង៤៧លានដុល្លាសហរដ្ឋអាមេរិក ពីភ្ញៀវចំនួន ១,៦៧៧,៣៥២នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ