ក្រសួងអប់រំកំពុងស្រាវជ្រាវករណីគ្រូបង្រៀននៅបាត់ដំបងរងការគំរាមជីវិត
ក្រុមការងាររបស់ក្រសួងអប់រំ យុវជន និង កីឡា សហការជាមួយមន្ទីរអប់រំខេត្តបាត់ដំបងបានចុះធ្វើការស្រាវជ្រាវ តាំងពីថ្ងៃសុក្រទី២៧ឧសភាកន្លងទៅ ជុំវិញករណីរបស់អ្នកគ្រូម្នាក់ឈ្មោះ ញាណ ប៊ុនសុជាតា បង្រៀននៅសាលាបឋមសិក្សាកំប៉ូវ ដែលរងការគំរាមសម្លាប់ពីមនុស្សមួយក្រុមបន្ទាប់ពីអ្នកគ្រូបាន ធ្វើសកម្មភាពមនុស្សធម៌ទាក់ទងការជួយកុមារីម្នាក់ឲ្យមានឱកាសបាន ចូលរៀន។
ចុះផ្សាយនៅថ្ងៃ៖
ស្តាប់ - ០១:៤៦
ក្រុមការងាររបស់ក្រសួងអប់រំយុវជននិងកីឡា បានចុះធ្វើការស្រាវជ្រាវភ្លាមៗជុំវិញករណីគំរាមជីវិតចំពោះអ្នកគ្រូ ញាណ ប៊ុនសុជាតា ដែលបង្រៀននៅសាលាបឋមសិក្សាកំប៉ូវក្នុងខេត្តបាត់ដំបង។ ក្រសួងអប់រំចាត់ទុកថា នេះជាករណីទី១មិនធ្លាប់កើតមានឡើយនៅក្នុងវិស័យអប់រំនៅកម្ពុជា ប្រសិនបើពាក់ព័ន្ធគ្រូបង្រៀនត្រូវបានគេគំរាមជីវិតដោយសារសកម្មភាពមនុស្សធម៌ជួយសិស្សរបស់ខ្លួននោះ។
ប៉ុន្តែយ៉ាងណាក៏ដោយក្រសួងនៅមិនទាន់ហ៊ានវាយតម្លៃថា ករណីនេះជាការពិតឬយ៉ាងណាទេដោយរងចាំលទ្ធផលនៃការស្រាវជ្រាវជាមុនសិន។ នេះបើតាមការបញ្ជាក់របស់លោក រស់ សាលីន អ្នកនាំពាក្យក្រសួងអប់រំ យុវជននិង កីឡា ។
ថ្លែងប្រាប់វិទ្យុបារាំងអ្នកគ្រូ ញាណ ប៊ុនសុជាតា សុំមិនធ្វើអធិប្បាយអ្វីច្រើនទេដោយគ្រាន់តែបញ្ជាក់ថា អ្នកគ្រូពិតជាទទួលរងការគំរាមដល់ជីវិតមែន។ និងបានអះអាងថាក្រសួងអប់រំនិងមន្ទីរអប់រំខេត្តបានជួយរកដំណោះស្រាយដល់អ្នកគ្រូរួចហើយ។
តែដំណោះស្រាយអ្វីខ្លះអ្នកគ្រូសុំមិនបកស្រាយ។ ប៉ុន្តែយ៉ាងណាក៏ដោយអ្នកគ្រូនឹងបង្រៀនសិស្សដូចដើមវិញនាឆ្នាំក្រោយបន្ទាប់ពីអ្នកគ្រូជាសះពីជំងឺនិងបន្ទាប់ពីករណីគំរាមជីវិតនេះត្រូវបានគេបំភ្លេច។
សូមបញ្ជាក់ថា ព័ត៌មានស្ដីពីការគំរាមជីវិត អ្នកគ្រូ ញាណ ប៊ុនសុជាតា ត្រូវបានអ្នកប្រើប្រាស់ហ្វេសប៊ុកចែករំលែកបន្តយ៉ាងព្រោងព្រៀតកាលពីប៉ុន្មានថ្ងៃកន្លងទៅនេះរួមជាមួយនិងការរិះគន់។
ករណីគំរាមជីវិតអ្នកគ្រូ ញាណ ប៊ុនសុជាតា កើតមានឡើងក្រោយអ្នកគ្រូធ្វើសកម្មភាពមនុស្សធម៌តាមរយៈការផ្ដល់ឱកាសឲ្យក្មេងស្រីម្នាក់បានចូលរៀនដូចក្មេងដទៃទៀតបន្ទាប់ពីក្មេងស្រីរូបនោះបានអើតតាមបង្អួចលួចមើលសកម្មភាពបង្រៀនរបស់អ្នកគ្រូ។ មុនកើតមានករណីគំរាមជីវិតអ្នកគ្រូ ញាណ ប៊ុនសុជាតា ត្រូវបានគេលើកសសើរថា អ្នកគ្រូបានធ្វើសកម្មភាពមនុស្សធម៌ជាច្រើនចំពោះសិស្សទូទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ