WWF៖ មនុស្ស២៧ម៉ឺននាក់អំពាវនាវឲ្យបញ្ឈប់គម្រោងទំនប់វារីអគ្គិសនីដនសាហុង
តំណាងសហគមន៍និងអង្គការសង្គមស៊ីវិលប្រមាណ១០អង្គភាពបានស្នើឲ្យក្រុមហ៊ុន មេហ្គាហ្វើសផ្អាកគម្រោងទំនប់វារីអគ្គិសនីដនសាហុងរបស់ឡាវនៅលើដងទន្លេមេគង្គ។ ពួកគេបានសម្តែងពីការព្រួយបារម្ភ ហើយបាននិយាយថា មានមនុស្ស២៧ម៉ឺននាក់ជុំវិញពិភពលោកដែលបានអំពាវនាវឲ្យបញ្ឈប់គម្រោងនេះដោយសារតែវាផ្តល់គុណវិបត្តិច្រើនជាងផលប្រយោជន៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
អង្គការមូលនិធិសកលសម្រាប់ការអភិរក្សធនធានធម្មជាតិ ហៅកាត់ថា WWF បានផ្សព្វផ្សាយញតិ្តរបស់ប្រជាជនប្រមាណ២៧ម៉ឺននាក់ ដែលអំពាវនាវឲ្យបញ្ឈប់គម្រោងទំនប់វារីអគ្គិសនីដនសាហុង នៅលើដងទន្លេមេគង្គ ជាប់ព្រំដែនប្រទេសកម្ពុជានិងឡាវ។ យោងតាម WWF ក្នុងចំណោមមនុស្ស២៧ម៉ឺននាក់នោះ មានប្រជាជនកម្ពុជាជាង១ម៉ឺន២ពាន់នាក់ ដែលបានបញ្ចេញមតិជំទាស់ ដោយផ្ទាល់តាមរយៈការសរសេរញត្តិ ហើយអ្នកផ្សេងទៀតបានសម្តែងមតិតាមរយៈចុះឈ្មោះតាមបណ្តាញប្រព័ន្ធអ៊ិនធឺណិត ក្នុងប្រទេសច្រើនជាង២០០ជុំវិញពិភពលោក។
ក្នុងសន្និសីទកាសែតរួមគ្នា នៅភោជនីយដ្ឋាទីតានិក នាព្រឹកថ្ងៃទី១១កញ្ញានេះ តំណាងសហគមន៍ មកពីខេត្តក្រចេះ ស្ទឹងត្រែង និងសហគមន៍នេសាទបឹងទន្លេសាប ព្រមទាំងតំណាងយុវជនបានសម្តែងការព្រួយបារម្ភថា គម្រោងសាងសង់ទំនប់វារីអគ្គិសនីដនសាហុងនេះនឹងធ្វើឲ្យពួកគេរងទុក្ខលំបាក ប៉ះពាល់យ៉ាងធ្ងន់ធ្ងរដល់ជីវភាពប្រជាជនបាត់ បង់ជីវៈចម្រុះ ពិសេសត្រីដែលជាប្រភពចិញ្ចឹមជីវិត ប៉ះពាល់ដល់វិស័យកសិកម្មនិងទេសចរណ៍ ព្រមទាំងអាចនឹងវិនាសដល់សត្វផ្សោត ដែលជាសត្វកម្រថែមទៀត។
លោក ឈិត សំអាត នាយកអង្គការ WWF បាននិយាយថា គម្រោងសាងសង់នេះអាចធ្វើឲ្យប៉ះពាល់ជាអវិជ្ជមានដល់ធនធានជលផលនៃទន្លេមេគង្គនិងទន្លេសាប ព្រមទាំងប្រជាពលរដ្ឋច្រើនជាង៦០លាននាក់ ដែលកំពុងរស់នៅតំបន់អាងទន្លេមេគង្គផ្នែកខាងក្រោម។ លោក ឈិត សំអាត បញ្ជាក់ថា បើធៀបប្រៀបពីផលប្រយោជន៍និងគុណវិបត្តិ គឺមិនអាចទូទាត់គ្នាបានឡើយ ព្រោះថា ផលកម្រៃនៃកម្លាំងអគ្គិសនី ២៦០ មេហ្គាវ៉ាត ដែលគម្រោងរំពឹងទុកនោះ មិនអាចប៉ះប៉ូវនឹងហានិភ័យដ៏ធ្ងន់ធ្ងរបានទេ។
ទោះយ៉ាងណា ពួកគេលើកឡើងថា មិនទាន់មានរបាយការណ៍ច្បាស់ការណាមួយ ដែលបញ្ជាក់ពីផលចំណេញ និងគុណវិបត្តិជាក់ស្តែង ជាលក្ខណៈស្រាវជ្រាវវិទ្យាសាស្ត្រនៅឡើយទេ។ ពួកគេក៏ស្នើឲ្យមានការស្រាវជ្រាវពីអ្នកជំនាញតាមបែបវិទ្យាសាស្ត្រពិតប្រាកដដែរ។
តំណាងសហគមន៍តំណាងនាយកអង្គការ WWF និងអ្នកតំណាងពីវេទិកានៃអង្គការមិនមែនរដ្ឋាភិបាលបានអះអាងថា នឹងបន្តដាក់ញត្តិនិងអំពាវវនាវជាបន្តទៀត ទៅបណ្តាស្ថានទូតនានា រដ្ឋាភិបាលនៃប្រទេសទាំងអស់តាមដងទន្លេមេគង្គ និងក្រុមហ៊ុនពាក់ព័ន្ធផ្សេងៗ ដើម្បីគៀងគរសំឡេងរួមមួយ ឲ្យផ្អាកគម្រោងសាងសង់ទំនប់វារីអគ្គិសនីដនសាហុង។
គួរបញ្ជាក់ថា ក្នុងសន្និសីទកាសែត នាព្រឹកថ្ងៃទី១១កញ្ញានេះ មិនមានវត្តមានភាគីរដ្ឋាភិបាលកម្ពុជាទេ។ ប៉ុន្តែ ពេលកន្លងទៅ តំណាងរដ្ឋាភិបាលកម្ពុជា ថៃ និងវៀតណាមក៏ធ្លាប់បានស្នើឲ្យភាគីឡាវ សិក្សាផលប៉ះពាល់ឲ្យបានច្បាស់លាស់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ