សមាគមវៀតណាមនៅកម្ពុជាកំពុងរៀបចំគម្រោងសកម្មភាពប្រឆាំងចិន
ក្រោយពីផ្ទុះបាតុកម្មជាបន្តបន្ទាប់នៅក្នុងប្រទេសវៀតណាមប្រឆាំងនឹងទង្វើខួងប្រេងរបស់ចិននៅសមុទ្រចិនខាងត្បូងនោះមក ជនជាតិចិនជាច្រើនបាននាំគ្នាចាកចេញពីប្រទេសវៀតណាមចូលមកកម្ពុជា។ សហគមន៍ជនជាតិវៀតណាមនៅកម្ពុជាក៏គ្រោងធ្វើសកម្មភាពប្រឆាំងចិនផងដែរ ប៉ុន្តែ សកម្មភាពនោះមិនមែនជាបាតុកម្មទេ។ នេះបើយោងតាមប្រធានសមាគមសហព័ន្ធខ្មែរវៀតណាមប្រចាំកម្ពុជា។
ចុះផ្សាយនៅថ្ងៃ៖
ស្តាប់ - ០២:០៤
សមាគមសហព័ន្ធខ្មែរ វៀតណាមប្រចាំនៅកម្ពុជាអាចនឹងធ្វើសកម្មភាពមួយចំនួនដើម្បីប្រឆាំងចិន។ លោក ស៊ឹម ជី ប្រធានសមាគមសហព័ន្ធខ្មែរ វៀតណាមប្រចាំនៅកម្ពុជា បានបញ្ជាក់ប្រាប់វិទ្យុបារាំងអន្តរជាតិ RFI ថា លោកគ្មានគម្រោងដឹកនាំធ្វើបាតុកម្មប្រឆាំងស្ថានទូតចិននៅលើទឹកកម្ពុជានោះទេ ក៏ប៉ុន្តែអាចនឹងធ្វើសកម្មភាពមួយចំនួនប៉ុណ្ណោះ។
លោក ស៊ឹម ជី បានបញ្ជាក់យ៉ាងដូច្នេះ ខណៈលោកកំពុងធ្វើការជួបប្រជុំជាមួយគណៈកម្មការនៃសមាគមរបស់លោកជុំវិញការធ្វើសកម្មភាពប្រឆាំងចិននៅថ្ងៃទី ១៥ ឧសភានេះ។
សារព័ត៌មានក្នុងស្រុកមួយចំនួនបានចុះផ្សាយថា សមាគមវៀតណាមនៅកម្ពុជាគ្រោងធ្វើបាតុកម្មប្រឆាំងចិនក្រោយពេលដែលប្រជាជនចិនមួយចំនួនបានសម្រុកចូលមកប្រទេសកម្ពុជាដើម្បីសុវត្ថិភាពបន្ទាប់ពីមានបាតុកម្មប្រឆាំងចិនយ៉ាងខ្លាំងក្លានៅក្នុងប្រទេសវៀតណាម។
ប៉ុន្តែ អាជ្ញាធរកម្ពុជាបានព្រមានថា មិនអនុញ្ញាតឲ្យជនជាតិណាធ្វើបាតុកម្មប្រឆាំងប្រទេសណាមួយនៅលើទឹកដីកម្ពុជាបាននោះឡើយ។ ទំនងជាហេតុផលនេះហើយបានជាសមាគមវៀតណាមនៅកម្ពុជាអះអាងថាមិនធ្វើបាតុកម្មទេ។
លោកឧត្តមសេនីយ៍ សុខ ផល ប្រធាននាយកដ្ឋានអន្តោប្រវេសន៍នៃក្រសួងមហាផ្ទៃមិនបានបង្ហាញឲ្យដឹងពីតួលេខប្រជាជនចិនដែលបានសម្រុកចូលមកកម្ពុជាពីប្រទេសវៀតណាមដើម្បីសុវត្ថិភាពនោះទេ ដោយលោកបានបង្វែសំណួរទៅលោកគៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិវិញ។ ក៏ប៉ុន្តែ លោកគៀត ច័ន្ទថារិទ្ធ មិនអាចទាក់ទងសុំបំភ្លឺបាននោះទេនៅថ្ងៃព្រហស្បតី៍ ទី ១៥ ឧសភានេះ។
សូមបញ្ជាក់ថា បញ្ហារវាងចិន និងវៀតណាមនៅសមុទ្រចិនខាងត្បូងកំពុងឡើងកម្តៅដល់ចំណុចកំពូល។ ដល់ចំណុចកំពូលដោយសារតែ ចិនបានបញ្ជូននាវារបស់ខ្លូនទៅខួងប្រេងនៅតំបន់មានជម្លោះក្នុងសមុទ្រចិនខាងត្បូង ហើយកាលពីថ្ងៃចន្ទដើមសប្តាហ៍នេះ នាវារបស់ចិន និង វៀតណាមបានបាញ់ទឹកដាក់គ្នាដើម្បីបញ្ឈប់សកម្មភាពខួងប្រេង។
ជាមួយគ្នានេះ ប្រជាជនវៀតណាមបានធ្វើបាតុកម្មប្រឆាំងនឹងចិនរហូតវាយកម្ទេចក្រុមហ៊ុនចិនមួយចំនួននៅក្នុងប្រទេសវៀតណាមផងដែរ។ តាមសេចក្តីរាយការណ៍ មានអ្នកស្លាប់និងរងរបួសជាច្រើននៅក្នុងសកម្មភាពធ្វើបាតុកម្មរបស់ប្រជាជនវៀតណាមនេះ។ ស្របពេលជាមួយគ្នានេះដែរ ចិនក៏បានប្រកាសព្រមានដល់អ្នកទេសចររបស់ខ្លួនកុំឲ្យធ្វើដំណើរទៅកាន់ប្រទេសវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ