មេដឹកនាំសហជីពប្រឆាំងគ្នាបង្កើនការផ្សព្វផ្សាយដល់កម្មករលើរឿងកូដកម្មទ្រង់ទ្រាយធំ
ក្រុមមេដឹកនាំសហជីពដែលគាំទ្រនយោបាយរបស់រដ្ឋាភិបាលបានបង្កើននូវយុទ្ធនាការរបស់ពួកគេ ក្នុងការទប់ស្កាត់កម្មករវិស័យកាត់ដេរ មិនឲ្យចូលរួមធ្វើកូដកម្មជាមួយនឹងក្រុមសហជីពចំនួន១៨ នៅខែមិនាខាងមុខ។ កូដកម្មដែលនឹងត្រូវធ្វើទូទាំងប្រទេសដើម្បីទាមទារឲ្យមានការដោះលែងអ្នកជាប់ឃុំចំនួន២១នាក់ និងតំឡើងប្រាក់ខែគោល១៦០ដុល្លារ ក្នុងមួយខែ។ ការបង្កើនល្បឿនផ្សព្វផ្សាយរបស់មេដឹកនាំសហជីពខាងលើ បានធ្វើឡើងខណៈដែលសហជីពរៀបចំបាតុកម្មកំពុងបន្តសកម្មភាពរបស់ខ្លួនផ្សព្វផ្សាយដល់កម្មករឲ្យចូលរួមបាតុកម្ម និងពហិការការងារថែមម៉ោង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១២
ក្រុមអ្នកសហជីពដែលគាំទ្រនយោបាយរបស់រដ្ឋាភិបាលបានបង្កើនការផ្សព្វផ្សាយរបស់ពួកគេប្រឆាំងនឹងគម្រោងធ្វើកូដកម្មទ្រង់ទ្រាយធំចំនួន១៨ ដែលនឹងកំណត់ធ្វើនៅថ្ងៃទី ១២ខែមិនា ខាងមុខ។ កូដកម្មដើម្បីតវ៉ាឲ្យមានការដោះលែងសកម្មជនសហជីពនិងកម្មករ ដែលបានចាប់ខ្លួននៅក្នុងព្រឹត្តិការណ៍ប៉ះទង្គិចគ្នាដោយបង្ហូរឈាមមួយកាលពីដើមខែមករា កន្លងទៅនេះក្នុងគោលដៅទាមទារប្រាក់ឈ្នួលអប្បបរមា ១៦០ដុល្លារ នៅក្នុងវិស័យកាត់ដេរ។
លោកសោម អូន ប្រធានក្រុមប្រឹក្សាសហជីពជាតិកម្ពុជាបានថ្លែងថា លោកមានជំនឿរ
តិចតួចពីការចូលរួមកូដកម្មរបស់កម្មករនៅក្នុងវិស័យកាត់ដេរ ដោយសារពួកគេបានខាតបង់ម្តងហើយកាលពីអំឡុងធ្វើកូដកម្មកាលពីខែមករា។ អំឡុងពេលនោះកម្មករបានបាត់បង់សរុបប្រមាណជា៧លានដុល្លារអាមេរិកពីការផ្តាច់ប្រាក់អត្ថប្រយោជន៍ផ្សេងៗពីថៅកែរោងចក្រ។ លោកថា ស្វាគមន៍ចំពោះការទាមទារតម្លើងប្រាក់ខែឲ្យបានច្រើន ក៏ប៉ុន្តែត្រូវធ្វើទៅតាមយន្តការចរចាត្រីភាគី។
ជាមួយគ្នានេះ នៅក្នុងលិខិតមួយរបស់លោកជួន មុំថុល ប្រធានសហភាពសហម្ព័ន្ធសហជីពជាតិកម្ពុជា ដែលស្និទ្ធិនឹងរដ្ឋាភិបាល កាលពីថ្ងៃទី២០ ខែកុម្ភៈ ឆ្នាំ២០១៤ ដែលរួមមាន៤ចំណុចបានអំពាវនាវដល់កម្មករ ទាំងអស់កុំឲ្យចូលរួមធ្វើកូដកម្ម ព្រោះពួកគេនឹងប្រឈមការកាត់ប្រាក់ឈ្នួល និងប្រាក់អត្ថប្រយោជន៍ដទៃទៀត និងស្នើឲ្យមានការធ្វើការបន្ថែមម៉ោង ប្រសិនបើមានសុខភាពល្អ ដើម្បីបានប្រាក់ចំណូលបន្ថែមទៀត។
លោកជួន មុំថុល ដែលអះអាងថាមានសមាជិក៣០ម៉ឺននាក់នោះ បន្តតាមសេចក្តីអំពាវនាវរបស់ខ្លួនថា ករណីជនជាប់ចោទទាំង២១នាក់គឺជាភារៈកិច្ចរបស់តុលាការ ពួកគេនឹងរួចខ្លួនបើតុលាការរកទៅមិនមានជាប់ពាក់ព័ន្ធនឹងបទល្មើស។ ជាមួយគ្នានេះសេចក្តីប្រកាសក៏បានប្រាប់ពីការប្រជុំតម្លើងប្រាក់ឈ្នួលអប្បបរមា នៅឆ្នាំ២០១៥ផងដែរ ដោយភ្ជាប់ជាមួយនឹងសំណូមពរដល់រដ្ឋាភិបាឲ្យចាត់វិធានការផ្លូវច្បាប់តឹងរឹងដើម្បីពង្រឹងសន្តិសុខ សណ្តាប់ធ្នាប់និងសុវត្ថិភាពជូនប្រជាពលរដ្ឋ។
ផ្ទុយទៅវិញលោក អាត់ ធន់ ប្រធានសហភាពការងារកម្ពុជា ដែលបានដឹកនាំផែនការកូដកម្មនេះ បានអះអាងថាក្រុមសហជីពសម្ព័ន្ធនិងលោកនៅតែបន្តអនុវត្តកម្មវិធីកូដកម្មរបស់ខ្លួនដូចការគ្រោងទុក។សម្រាប់ពេលនេះពួកគេនៅតែបន្តចែកខិតប័ណ្ណជាច្រើនម៉ឺនសន្លឹកបន្ថែមទៀតទៅដល់កម្មករ ដោយមិនមានការបង្ខិតបង្ខំឲ្យចូលរួមឡើយ នេះបើតាមលោក អាត់ ធន់។
មន្ត្រីសមាគមរោងចក្រកាត់ដេរនៅកម្ពុជា(GMAC)មិនមានការធ្វើអត្ថាធិប្បាយទេនៅថ្ងៃនេះ ក៏ប៉ុន្តែកាលពីពេលថ្មីៗនេះ លោក វ៉ាន់ ស៊ូអៀង ប្រធានសមាគម GMAC បានផ្តល់បទសម្ភាសន៍ដល់ប្រព័ន្ធផ្សព្វផ្សាយក្នុងស្រុកថា រោងចក្រនឹងបិទប្រមាណជា៨០ភាគរយ ប្រសិនជាមានកូដកម្មបន្តជាច្រើនខែទៅមុខ។
សូមបញ្ជាក់ថាកម្មករនិងសកម្មជនចំនួន២៣នាក់ត្រូវបានអាជ្ញាធរចាប់ខ្លួនបន្ទាប់ពីមានការប៉ះទង្គិចគ្នាដោយហឹង្សារកាលពីថ្ងៃទី២ទី៣ ខែមករា នៅក្នុងការតវ៉ា២កន្លែងផ្សេងគ្នានៅក្រុងភ្នំពេញដើម្បីសុំតម្លើងប្រាក់ខែអប្បបរមា ១៦០ដុល្លារក្នុងមួយខែ។ព្រឹត្តិការណ៍នោះធ្វើឲ្យអ្នកតវ៉ា ៤នាក់ស្លាប់ផងដែរ។ក្រោយមកមនុស្ស២នាក់ត្រូវបានដោះលែងនៅក្រៅឃុំ។ដើម្បីទាមទារឲ្យមានការដោះអ្នក២១នាក់បន្ថែមទៀត សហជីពទាំង១៨ បានជ្រើសរើសយកវិធីកូដកម្មមកធ្វើជាមធ្យោយដែលត្រជាក់និងមិនមានការប្រឈមដូចកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ