លោក សុខ អាន ផ្តល់ដំបូន្មានឲ្យយុវជនចេះរបៀបដោះស្រាយបញ្ហាសង្គម និងបរិស្ថាន
លោក សុខ អាន ដែលជាឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានលើកឡើងនូវដំបូន្មាន៣ចំណុច សម្រាប់ឲ្យយុវជនពិចារណា ពេលបើកសន្និសីទអន្តរជាតិលើកទី៥ ស្តីពីភាពជាអ្នកដឹកនាំនៃបញ្ញវន្តឆ្នើមឆ្នាំ២០១៤ ក្រោមប្រធានបទ«រៀនគិត រៀបផែនការ និងអនុវត្តន៍» កាលពីថ្ងៃសៅរ៍ នៅរាជធានីភ្នំពេញ។ នោះជាការផ្តល់គំនិតខ្លះៗ នៅចំពោះមុខបញ្ហានានា ពាក់ព័ន្ធនឹងការអភិវឌ្ឍន៍សមត្ថភាពយុវជន និងការពង្រឹងតួនាទីយុវជនក្នុងការងារសង្គម និងបរិស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ជាបឋម លោក សុខ អាន បានជម្រុញយុវជនជំនាន់ក្រោយឱ្យរួបរួមគ្នា ពង្រឹងលទ្ធិប្រជាធិបតេយ្យ និងនីតិរដ្ឋ ដើម្បីធានាសន្តិភាព និងស្ថិរភាព ដែលជាសមិទ្ធផលរបស់«មេដឹកនាំបច្ចុប្បន្ន» បន្ទាប់ពីកម្ពុជាបានឆ្លងកាត់ជម្លោះ សង្គ្រាមស៊ីវិល អំពើហិង្សា និងរបបប្រល័យពូជសាសន៍ជាច្រើនទសវត្សរ៍។ ត្រង់ចំណុចនេះ លោកឧបនាយករដ្ឋមន្ត្រីបានលើកឡើងថា វឌ្ឍនភាពសង្គម និងសុខមាលភាពរបស់ប្រជាពលរដ្ឋ បានកើតឡើងហើយ។ លោក សុខ អាន បន្ថែមថា តាមរយៈកំណែទម្រង់ស៊ីជម្រៅ យើងគួរតែសកម្មឡើង ដើម្បីផ្លាស់ប្តូរឱ្យកាន់តែប្រសើរថែមទៀត។
បន្ទាប់មក រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីរូបនេះ បានអះអាងថា មិនខុសពីប្រជាជនអាស៊ីជាទូទៅទេ ប្រជាជនកម្ពុជាគោរពបញ្ញវន្តជានិច្ច ហើយដោយហេតុនេះ បញ្ញវន្តទាំងឡាយគឺជាអ្នកទទួលខុសត្រូវខ្ពស់ ក្នុងការផ្ទេរចំណេះដឹង សំដៅដោះស្រាយបញ្ហារបស់សង្គម ក៏ដូចជាក្នុងការធ្វើគំរូទាក់ទងនឹងភាពជាអ្នកដឹកនាំ»។ បើតាមលោក សុខ អាន ការណ៍នេះទាមទារឱ្យបញ្ញវន្តឆ្នើម និងអ្នកដឹកនាំ ត្រូវមានភាពចាស់ទុំ គតិបណ្ឌិត និងការឆ្លុះបញ្ចាំង ដែលអាចស្តែងចេញតាមរយៈតួនាទីនៅក្នុងសង្គម។
ចុងក្រោយ លោកឧបនាយករដ្ឋមន្ត្រីបានថ្លែងថា ពាក្យ«រៀនគិត រៀបផែនការ និងអនុវត្តន៍» ដែលជាប្រធានបទនៃសន្និសីទអន្តរជាតិលើកទី៥ស្តីពីភាពជាអ្នកដឹកនាំនៃបញ្ញវន្តឆ្នើមឆ្នាំ២០១៤ គឺជាការជម្រុញទឹកចិត្តយុវជនឱ្យប៉ងប្រាថ្នាខ្ពស់។ ដោយបង្ហាញគំរូជាក់ស្តែងក្នុងការងាររដ្ឋាភិបាល លោក សុខ អាន បានផ្តល់គំនិតថា ដើម្បីសម្រេចឆន្ទៈធំ យុវជនត្រូវធ្វើកិច្ចការជាច្រើន តាមដំណាក់កាល ក្នុងនោះ ត្រូវប្តូរការៀនគិត ឬចក្ខុវិស័យ ឱ្យទៅជាការរៀបផែនការ ក្នុងទម្រង់ជាយុទ្ធសាស្ត្រ គោលនយោបាយ ផែនការមេ ផែនការសកម្មភាព និងកាលបរិច្ឆេទសម្រាប់ធ្វើសកម្មភាព មុននឹងអនុវត្តផែនការទាំងនោះ តាមរយៈច្បាប់ និងបទបញ្ញត្តិ។
ក្នុងពេលនោះដែរ លោកឧបនាយករដ្ឋមន្ត្រី សុខ អាន ក៏បានដាស់តឿនយុវជនឱ្យចងចាំថា សេចក្តីប្រាថ្នាទាំងឡាយនោះ ត្រូវតែផ្សារភ្ជាប់ទៅនឹងផលប្រយោជន៍ប្រជាពលរដ្ឋ សហគមន៍ និងបរិស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ