អង្គការសង្គមស៊ីវិល ស្វែងរកមធ្យោបាយតាមដានការអនុវត្តន៍អនុសាសន៍ UPR របស់រដ្ឋាភិបាលកម្ពុជា
តំណាងអង្គការសង្គមស៊ីវិលប្រមាណជា៤០ទៅ៥០នាក់ បានចំណាយពេលពីរថ្ងៃ ចាប់ពីថ្ងៃទី១៧កក្កដាមក ដើម្បីជួបជុំគ្នាពិភាក្សា និងមធ្យោបាយផ្សេងៗ ដើម្បីតាមដានការអនុវត្តន៍ អនុសាសន៍ យូភីអ (UPR)របស់រដ្ឋាភិបាលកម្ពុជា។ ជាអនុសាសន៍របស់ក្រុមប្រឹក្សាសិទ្ធិមនុស្សអង្គការសហប្រជាជាតិ ដែលបានដាក់ជូនរដ្ឋាភិបាលកម្ពុជាអនុវត្តន៍កាលពីឆ្នាំ២០១៣។
ចុះផ្សាយនៅថ្ងៃ៖
ស្តាប់ - ០៥:៣២
កិច្ចពិគ្រោះយោបល់ថ្នាក់ជាតិដែលមានរយៈពេលពីរថ្ងៃ គឺចាប់ពីថ្ងៃទី១៧ដល់ថ្ងៃទី១៨កក្កដានេះ គឺដើម្បីលើកកម្ពស់ការយល់ដឹងអំពីដំណើរការក្នុងចំនោម អង្គការសង្គមស៊ីវិល និងដៃគូពាក់ព័ន្ធ ដើម្បីធានាអោយមានការតស៊ូមតិជាប្រព័ន្ធក្នុងការតាមដានទៅលើការអនុវត្តអនុសាសន៍របស់រដ្ឋាភិបាលកម្ពុជាស្តីពីស្ថានភាពសិទ្ធិមនុស្ស និងដើម្បីរកមធ្យោបាយក្នុងការតាមដានទៅលើ ការអនុវត្តអនុសាសន៍ យូភីអ (UPR) របស់រដ្ឋាភិបាល។ នេះបើតាមកញ្ញា សន រ៉ាមណា អ្នកសម្របសម្រួលគម្រោងនៃមជ្ឈមណ្ឌលសិទ្ធិមនុស្សកម្ពុជា CCHR។ កញ្ញា សន រ៉ាមណា បានថ្លែងថា ការចូលរួមតាមដានរាល់ការអនុវត្តន៍អនុសាសន៍របស់រដ្ឋាភិបាល គឺជាការចាំបាច់។
UPR គឺជាកិច្ចដំណើរការត្រួតពិនិត្យជាសកលតាមពេលវេលាកំណត់ ដែលជាយន្តការ របស់ក្រុមប្រឹក្សាសិទ្ធិមនុស្សអង្គការសហប្រជាជាតិបង្កើតឡើង ដើម្បីត្រួតពិនិត្យទៅលើស្ថានភាពសិទ្ធិមនុស្សនៅក្នុងប្រទេសជាសមាជិក ដោយប្រើយន្តការរដ្ឋជាសមាជិកវាយតម្លៃទៅលើរដ្ឋជាសមាជិកផ្សេងទៀត។ តួយ៉ាងដូចជាប្រទេសកម្ពុជា កាលពីខែមករាឆ្នាំ២០១៣ ត្រូវបានត្រួតពិនិត្យដោយប្រទេសចំនួន៧៦ ដោយផ្អែកទៅលើរបាយការណ៍មកពីប្រភពចំនួន៣ ទី១ជារបាយការណ៍ដែលផ្ញើរមកដោយរដ្ឋាភិបាល ទី២របាយការណ៍របស់អង្គការសង្គមស៊ីវិល និងទី៣ជារបាយការណ៍របស់ឧត្តមស្នងការអង្គការសហប្រជាជាតិស្ថិតនៅក្នុងប្រទេសកម្ពុជា។ កាលណោះ រាជរដ្ឋាភិបាលកម្ពុជា បានទទួលយកអនុសាសន៍ចំនួន៩១ ដែលផ្តល់ដោយប្រទេសជាសមាជិកជុំវិញកង្វះខាតនៃការអនុវត្តន៍សិទ្ធិមនុស្សនៅកម្ពុជា ប៉ុន្តែភាគច្រើននៃអនុសាសន៍ទាំងនោះ មិនត្រូវបានកែរលម្អរអោយប្រសើរឡើងនោះទេ។
យ៉ាងណាក៏ដោយ នៅក្នុងដំណាក់កាលទី២នៃការអនុវត្តន៍ UPR រឺកិច្ចដំណើរការត្រួតពិនិត្យជាសកលតាមពេលវេលាកំណត់ស្តីពីស្ថានភាពសិទ្ធិមនុស្សនៅកម្ពុជានេះ រដ្ឋាភិបាលកម្ពុជា បានសំរេចទទួលយកអនុសាសន៍ចំនួន១៦៣ និងកត់សំគាល់អនុសាសន៍ចំនួន៤២ តាមរយៈកិច្ចប្រជុំលើកទី២៦ កាលពីខែមិថុនាឆ្នាំ២០១៤ ដើម្បីកែរលម្អស្ថានភាពសិទ្ធិមនុស្សនៅកម្ពុជា។
ក្រុមអង្គការសង្គមស៊ីវិលកំពុងរងចាំមើលថាតើ រាល់អនុសាសន៍ទាក់ទងនឹងស្ថានភាពសិទ្ធិមនុស្សនេះ រដ្ឋាភិបាលបានកែរលម្អរអោយប្រសើរឡើងរឺទេ។ ការវាយតម្លៃនឹងធ្វើឡើងរយៈពេល២ឆ្នាំម្តង នៅឯទីស្នាក់ការអង្គការសហប្រជាជាតិ ស្ថិតនៅក្នុងទីក្រុងសឺណែវប្រទេសស្វីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ