កម្ពុជានាំចេញអង្ករបានជាង៣៤ម៉ឺនតោន កើនជិត៥០ភាគរយក្នុងពេល៨ខែឆ្នាំ២០១៥
កម្ពុជានាំចេញអង្ករទៅកាន់ទីផ្សារអន្តរជាតិបាន ចំនួនជាង ៣៤ម៉ឺនតោន នៅក្នុងរយៈពេល៨ខែ ក្នុងឆ្នាំ២០១៥នេះ។ ចំនួននេះ កើនឡើង៤៦.៣០ភាគរយ បើធៀបនឹងរយៈពេលដូចគ្នាកាលពី ឆ្នាំ២០១៤ ដែលមានចំនួនជាង២៣ម៉ឺនតោន។ នេះបើយោងតាមរបាយការណ៍របស់សហព័ន្ធស្រូវអង្ករកម្ពុជា ដែលបានចេញផ្សាយនៅលើទំព័រហ្វេសប៊ុកផ្លូវការរបស់ខ្លួននៅថ្ងៃព្រហស្បតិ៍ ទី១០ កញ្ញានេះ។
ចុះផ្សាយនៅថ្ងៃ៖
ស្តាប់ - ០១:២៣
របាយការណ៍របស់សហព័ន្ធស្រូវអង្ករកម្ពុជា ឬ Cambodia Rice Federation (CRF) បានបង្ហាញថា ក្នុងរយៈពេល៨ខែ ឆ្នាំ២០១៥នេះ កម្ពុជានាំអង្ករចេញទៅកាន់ប្រទេសចិនបានច្រើនជាងគេ បន្ទាប់មកមានប្រទេសបារាំងស្ថិតក្នុងលំដាប់ទី២ និងប្រទេសប៉ូឡូញស្ថិតក្នុងលំដាប់ទី៣។ កម្ពុជាបាននាំអង្កររបស់ខ្លួនទៅកាន់ប្រទេសចំនួន ជាង៥០ នៅទូទាំងពិភពលោក។ អង្ករដែលកម្ពុជានាំចេញច្រើនជាងគេ មានអង្ករផ្កាម្លិះ អង្ករសែនក្រអូប និងអង្ករអ៊ីអែរជាដើម។
របាយការរបស់CRF ក៏បានបង្ហាញឲ្យដឹងដែរថា ក្រុមហ៊ុននាំចេញអង្ករកម្ពុជាមានចំនួនជាង ៧០ក្រុមហ៊ុន ហើយក្នុងនោះមានក្រុមហ៊ុនចំនួន ២០ ដែលនាំចេញអង្ករកម្ពុជាបានច្រើនជាងគេ ទៅកាន់បណ្តាប្រទេសនានា នៅក្នុងរយៈពេល៨ខែ ឆ្នាំ ២០១៥នេះ។ ក្រុមហ៊ុនទាំងនោះមានដូចជា AMRU Rice (Cambodia) ក្រុមហ៊ុនKhmer Foods Group និងក្រុមហ៊ុន Golden Rice (Cambodia) ជាដើម។
សូមរំលឹកជូនថា លោកនាយករដ្ឋមន្ត្រីហ៊ុន សែនធ្លាប់បានលើកឡើងថា កម្ពុជាត្រូវតែនាំអង្ករចេញឲ្យបាន១លានតោន ក្នុងឆ្នាំ ២០១៥នេះ ប៉ុន្តែគោលនយោបាយនេះ ហាក់ដូចជាមិនអាចទៅរួចនោះទេ ខណៈដែលអ្នកជំនាញខាងផ្នែកអង្ករនេះ ធ្លាប់បានអះអាងមកហើយថា កម្ពុជានៅមិនទាន់មានលទ្ធភាព ផលិតអង្ករនាំចេញឲ្យបាន១លានតោននៅក្នុងឆ្នាំនេះ នោះទេ ខណៈរយៈពេល៨ខែដើមឆ្នាំ ២០១៥នេះ កម្ពុជាទើបតែនាំអង្ករចេញទៅកាន់ទីផ្សារអន្តរជាតិបានត្រឹមតែជាង ៣៤ម៉ឺនតោនប៉ុណ្ណោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ