ពលរដ្ឋនិងព្រះសង្ឃវត្តកោះពោធិវង្សប្រើធម៌ក្តៅវាយទម្លុះរបងបុរីប៉េងហួតដើម្បីកាន់កាប់ដីដែលមានជម្លោះ
ប្រជាពលរដ្ឋ និងព្រះសង្ឃគង់នៅវត្តកោះពោធិវង្ស ក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ប្រមាណជាង ៥០០ នាក់ និង អង្គនៅព្រឹកថ្ងៃអាទិត្យ ទី ១៥ មិថុនានេះបានផ្ទុះការតវ៉ាទាមទារដីវត្តដែលបុរីប៉េងហួតកំពុងសាងសង់លើ។ ការតវ៉ានេះបានកើតឡើងក្រោយពីអាជ្ញាធរមិនបានដោះស្រាយ ហើយក៏ឈានដល់ការវាយទម្លុះរបងបុរី ដើម្បីកាន់កាប់ដី។ សាលាក្រុងភ្នំពេញបានថ្កោលចំពោះសកម្មភាពវាយបំផ្លាញទ្រព្យសម្បត្តិឯកជននេះ។ យ៉ាងណាក៏ដោយ ការតវ៉ានេះមិនមានការប៉ះទង្គិចគ្នា ឫ អំពើហិង្សាណាមួយកើតឡើងនោះទេ។
ចុះផ្សាយនៅថ្ងៃ៖
ស្តាប់ - ០២:៣៤
គឺនៅម៉ោងប្រមាណជិត ១០ ព្រឹក ក្រុមប្រជាពលរដ្ឋចំណុះជើងវត្ត និង ព្រះសង្ឃនៅវត្តកោះពោធិវង្សបានចាប់ផ្តើមវាយទម្លុះរបងបុរីប៉េងហួត។ ជាការវាយទម្លុះដើម្បីចូលទៅកំណត់ចំណាំទីតាំងដីវត្តដែលត្រូវបានអ្នកមានអំណាចរំលោភយកលក់ឲ្យបុរីប៉េងហួតទាំងមិនមានដំណោះស្រាយ។
ព្រះតេជគុណ ពឿយ មេត្តា ព្រះចៅអធិការវត្តកោះពោធិវង្ស ដែលដឹកនាំការតវ៉ា និង វាយរបងបុរីប៉េងហួតនេះបានមានសង្ឃដីកាថា ទំនាស់ដីធ្លីនេះបានកើតនៅក្នុងឆ្នាំ ២០១៣ ដោយ លោកឧកញ្ញ៉ា ឈាង ប៉ាក់សួរ និង លោក ជា ខេមា អភិបាលរងខណ្ឌសែនសុខបានរំលោភបំពានយកដីវត្តទៅលក់ឲ្យបុរីប៉េងហួត។ បើតាមព្រះចៅអធិការវត្តរូបនេះ ផ្ទៃដីវត្តដែលបានបាត់បង់មានទំហំ ៣០ ម៉ែត្រ គុណ ១៧០ ម៉ែត្រ និង ដីផ្លូវចាស់ចូលវត្តមានទទឹង១២ ម៉ែត្រ និង បណ្តោយ ២៤៨ ម៉ែត្រ ដែលបុរីប៉េងហួតកំពុងតែសាងសង់លើ។
ព្រះតេជគុណ ពឿយ មេត្តាបានបន្តថា ព្រះអង្គបានស្វែងរកដំណោះស្រាយជាមួយលោកឧកញ្ញ៉ា ឈាង ប៉ាក់សួរ លោក ជា ខេមា បុរីប៉េងហួត និង អាជ្ញាធរជាច្រើនលើកមកហើយ ក៏ប៉ុន្តែមិនទទួលបានលទ្ធផលនោះទេ គឺទទួលបានតែការគម្រាមកំហែង និង ការព្រងើយកន្តើយទៅវិញ។ ព្រះអង្គបានលើកឡើងបន្ថែមថា ព្រះសង្ឃ និង ពុទ្ធបរិស័ទ មិនមានជម្រើសអ្វីក្រៅពីការវាយទម្លុះរបងកាន់កាប់ដី ដើម្បីជាថ្នូរទៅនឹងការស្វែងរកដំណោះស្រាយនោះឡើយ។
ការផ្ទុះការតវ៉ារបស់ព្រះសង្ឃ និង ប្រជាពលរដ្ឋនៅថ្ងៃនេះក៏វត្តមាន លោក លី សាវេត អភិបាលខណ្ឌសែនសុខផងដែរ ក៏ប៉ុន្តែលោក មិនបានធ្វើអន្តរាគមន៍អ្វីនោះទេ ដោយ គ្រាន់តែស្នើដល់ព្រះសង្ឃ និង ប្រជាពលរដ្ឋឲ្យធ្វើអ្វីស្របតាមច្បាប់ និង កុំឲ្យប៉ះពាល់ដល់ទ្រព្យសម្បត្តិអ្នកដទៃតែប៉ុណ្ណោះ។
ដោកឡែក លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានថ្កោលទោសសកម្មភាពរបស់ព្រះសង្ឃ និង ប្រជាពលរដ្ឋដែលបានវាយទម្លុះរបងបុរីប៉េងហួត ដើម្បីកាន់កាប់ដី។លោក លើកឡើងថា ព្រះសង្ឃគឺជាអ្នកអប់រំមនុស្ស តែមិនគួរដឹកនាំប្រជាពលរដ្ឋប្រព្រឹត្តិអំពើខុសច្បាប់បែបនេះឡើយ។ អ្នកនាំពាក្យរូបនេះបានបញ្ជាក់ថា សាលារាជធានីភ្នំពេញធ្លាប់បានចុះទៅសម្របសម្រួលជាមួយព្រះសង្ឃចំពោះបញ្ហាដីវត្តនេះដែរ ក៏ប៉ុន្តែព្រះសង្ឃហាក់មិនមានឆន្ទៈក្នុងការដោះស្រាយទេ ហើយថែមទាំងនៅតែទាមទារនូវអ្វីដែលមិនអាចទៅរួចថែមទៀត។
យ៉ាងណាក៏ដោយ ព្រះចៅអធិការ ពឿយ មេត្តា នៅថ្ងៃអាទិត្យនេះដែរ បានសសេរពាក្យបណ្តឹងមួយច្បាប់ តែមិនមែនសម្រាប់ដាក់ទៅកាន់តុលាការនោះទេ គឺដាក់ទៅកាន់លោក នាយករដ្ឋមន្ត្រី ហ៊ុន សែន ដើម្បីឲ្យជួយពិនិត្យ និង ដោះស្រាយយកដីដែលបាត់បង់នោះ មកប្រគល់ឲ្យវត្តកោះពោធិវង្សវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ