ប្រាក់មួយលានដុល្លារសម្រាប់មន្ទីរពេទ្យគន្ធបុប្ផាគឺស្មើនឹងការចំណាយ៨ថ្ងៃប៉ុណ្ណោះ
កាកបាទក្រហមកម្ពុជាបានប្រកាសផ្តល់ជំនួយ១លានដុល្លារដល់មន្ទីរពេទ្យគន្ធបុប្ផា ពេលប្រារព្ធទិវាពិភពលោកកាកបាទក្រហម អឌ្ឍចន្ទក្រហម លើកទី១៥១ នៅភ្នំពេញកាលម្សិលមិញ។ ដោយរៃអង្គាសប្រាក់បានច្រើនជាង១៤លានដុល្លារ ស្ថាប័នមនុស្សធម៌ជាតិនេះ បានសម្រេចរំលែក១លានដុល្លារសម្រាប់មន្ទីរពេទ្យគន្ធបុប្ផា ដែលកំពុងត្រូវការថវិកាដ៏សន្ធឹកសន្ធាប់ សម្រាប់ព្យាបាលប្រជាជនកម្ពុជា ដោយឥតគិតថ្លៃ។ ប៉ុន្តែ ជំនួយ១លានដុល្លារនេះ គឺស្មើនឹងការចំណាយរបស់មន្ទីរពេទ្យតែ៨ថ្ងៃប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
កាកបាទក្រហមកម្ពុជាបានប្រកាសផ្តល់ជំនួយឱ្យមន្ទីរពេទ្យគន្ធបុប្ផា ដែលត្រូវបានបង្កើតឡើង និងគ្រប់គ្រង ដោយលោកវេជ្ជបណ្ឌិតជនជាតិស្វីសឈ្មោះ Beat Richner ចំនួន១លានដុល្លារសម្រាប់ឆ្នាំ២០១៤នេះ។ កាលពីឆ្នាំ២០១២ និង២០១៣ កាកបាទក្រហមកម្ពុជា ដែលដឹកនាំដោយលោកស្រី ប៊ុន រ៉ានី ភរិយារបស់លោកនាយករដ្ឋមន្ត្រី ហ៊ុន សែន បានផ្តល់ថវិកា២លានដុល្លាររួចហើយ។
ចំពោះមន្ទីរពេទ្យគន្ធបុប្ផា ថវិកា១លានដុល្លារគឺស្មើនឹងការចំណាយតែ៨ថ្ងៃប៉ុណ្ណោះ។ នៅថ្ងៃទី១៧ ខែកញ្ញា ឆ្នាំ២០១៣ លោក Beat Richner ដែលបានអំពាវនាវរកជំនួយពីប្រជាពលរដ្ឋកម្ពុជាទូទៅ និងពីសប្បុរសជនអន្តរជាតិផង បានប្រាប់ឱ្យដឹងថា មន្ទីរពេទ្យគន្ធបុប្ផាចំណាយប្រាក់១សែន២ម៉ឺនដុល្លារជារៀងរាល់ថ្ងៃ ដើម្បីព្យាបាលជម្ងឺ និងផ្តល់ថ្នាំសង្កូវឱ្យរបស់ប្រជាជនកម្ពុជាដែលភាគច្រើនក្រីក្រ ដោយឥតគិតថ្លៃ។
បច្ចុប្បន្ន បើតាមលោកវេជ្ជបណ្ឌិតរូបនេះ មន្ទីរពេទ្យគន្ធបុប្ផា ដែលត្រូវបានសាងសង់ក្នុងឆ្នាំ១៩៩២ ព្យាបាលជម្ងឺរបស់កុមារកម្ពុជា៨៥% ហើយមន្ទីរពេទ្យនេះព្យាបាល៩២%នៃកុមារដែលកើតគ្រុនឈាម។ បើតាមរបាយការណ៍ឆ្នាំ២០១៣របស់មន្ទីរពេទ្យ ក្នុងចំណោមអ្នកជម្ងឺរាប់សែននាក់ កុមារច្រើនជាង៦សែន៨ម៉ឺន៧ពាន់នាក់ត្រូវបានព្យាបាល ហើយស្ត្រីមានផ្ទៃពោះច្រើនជាង១សែន១ម៉ឺននាក់ត្រូវបានពិនិត្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ