រដ្ឋមន្រ្តីកសិកម្មសង្ឃឹមថាតម្លៃស្រូវនឹងកើនឡើងវិញក្រោយចូលឆ្នាំចិន
ខណៈតម្លៃស្រូវនៅប្រទេសកម្ពុជាបាននិងកំពុងតែធ្លាក់ថ្លៃស្របពេលសហភាពអឺរ៉ុបយកពន្ធលើការនាំអង្ករចេញពីកម្ពុជានោះ រដ្ឋមន្រ្តីក្រសួងកសិកម្ម បានសំដែងសុទិដ្ឋិនិយមថា តម្លៃស្រូវនៅកម្ពុជានឹងឡើងថ្លៃវិញក្រោយពេលបុណ្យចូលឆ្នាំចិនរួចរាល់។ ការលើកឡើងយ៉ាងដូច្នេះ គឺនៅពេលលោក វេង សាខុន រដ្ឋមន្រ្តីក្រសួងកសិកម្ម ចុះទៅជួបកសិករនៅខេត្តតាកែវ កាលពីម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
លោករដ្ឋមន្រ្តីកសិកម្ម បានអះអាងថាមូលហេតុដែលតម្លៃស្រូវធ្លាក់ថ្លៃនៅពេលនេះ គឺដោយសារតែក្នុងអំឡុងពេលចូលឆ្នាំចិន-វៀតណាម ហើយឈ្មួញវៀតណាម មិនបានចុះប្រមូលទិញស្រូវ ពីកសិករខ្មែរ។ ម្យ៉ាងទៀត លោកថា ដោយសារតែប្រជាកសិករខ្មែរខ្វះឃ្លាំងស្តុក ឡសម្ងួត និងចំពេលវេលាដែលចាំបាច់ត្រូវតែប្រមូលផលបានផ្តល់ឱកាសឱ្យឈ្មួញកណ្តាលទម្លាក់តម្លៃស្រូវតែម្តង។ បើតាមកសិករ តម្លៃស្រូវនាពេលនេះ បានធ្លាក់ថ្លៃនៅរង្វង់៧០០រៀលក្នុងមួយគីឡូក្រាម។
ទោះជាយ៉ាងណានៅចំពោះមុខកសិករក្នុងតាកែវ លោក វេង សាខុន រដ្ឋមន្រ្តីក្រសួងកសិកម្មបានសំដែងសុទិដ្ឋិនិយមថា តម្លៃស្រូវនៅកម្ពុជានឹងឡើងថ្លៃវិញក្រោយពេលបុណ្យចូលឆ្នាំចិនរួចរាល់។
កាលពីថ្ងៃទី៣១ខែមករា រដ្ឋមន្ដ្រីក្រសួងកសិកម្មកម្ពុជា បានស្នើទៅកាន់ភាគីវៀតណាម ឲ្យជួយទិញស្រូវអង្ករពីកម្ពុជា ខណៈកម្ពុជាកំពុងជួបប្រទះបញ្ហាស្រូវធ្លាក់ថ្លៃ និងចំពេលដែលកម្ពុជាត្រូវសហភាពអឺរ៉ុបតម្រូវឲ្យបង់ពន្ធលើការនាំចូលអង្ករទៅអឺរ៉ុប។
ជាការឆ្លើយតប លោក Vu Quang Minh ឯកអគ្គរដ្ឋទូតវៀតណាមប្រចាំនៅកម្ពុជា បានអះអាងថា វៀតណាមនឹងរៀបចំកិច្ចប្រជុំបន្ទាន់មួយជាមួយពាណិជ្ជករវៀតណាម មុនពេលធ្វើរបាយការណ៍លម្អិតជូននាយករដ្ឋមន្ដ្រីវៀតណាម ដើម្បីជំរុញឲ្យពាណិជ្ជករវៀតណាម ជួយប្រមូលទិញស្រូវពីកម្ពុជាក្នុងតម្លៃសមរម្យ។ ទន្ទឹមគ្នានេះ វៀតណាម នឹងជំរុញឲ្យមានការចុះអនុស្សរណៈនៃការយោគយល់គ្នា ស្ដីពីការធ្វើពាណិជ្ជកម្មរវាងកម្ពុជានិងវៀតណាម ជាពិសេសលើផលិតផលស្រូវអង្ករ និងថ្នាំជក់ ដោយអត្រាពន្ធសូន្យ ក្នុងរយៈពេលដ៏ខ្លីខាងមុខ ខណៈទូរទស្សន៍វៀតណាមនឹងចុះទៅកន្លែងប្រមូលផលស្រូវ ដើម្បីផ្សព្វផ្សាយដល់ពាណិជ្ជករវៀតណាម ឲ្យជួយទិញស្រូវពីកម្ពុជាក្នុងតម្លៃសមរម្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ