លោក ហ៊ុន សែន អំពាវនាវឲ្យអ្នកគាំទ្រត្រៀមប្រឆាំងតបតអ្នកចង់ទម្លាក់រដ្ឋាភិបាល
ថ្លែងពីខេត្តក្រចេះនៅព្រឹកថ្ងៃសៅរ៍នេះ លោកនាយករដ្ឋមន្ត្រី ហ៊ុន សែន បានអំពាវនាវឲ្យអ្នកគាំទ្រគណបក្សប្រជាជនកម្ពុជាទាំងអស់ត្រៀមខ្លួនក្រោកឈរឡើងប្រឆាំងជាមួយក្រុមអ្នកប៉ុនប៉ងធ្វើរដ្ឋប្រហារទម្លាក់រដ្ឋាភិបាល។ ដោយមិនបានសំដៅឲ្យចំៗទៅលើគណបក្សណា ប៉ុន្តែលោកនាយករដ្ឋមន្ត្រីបានហៅការប៉ុនប៉ងនោះថាជាទង្វើខុសច្បាប់ដែលមិនអាចបណ្តាយបាន។ ប៉ុន្តែ គណបក្សប្រឆាំងបដិសេធថា ខ្លួនមិនដែលប៉ុនប៉ងរំលំរដ្ឋាភិបាលទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៦
លោកនាយករដ្ឋមន្ត្រី ហ៊ុន សែន បានប្រកាសអំពាវនាវជាសាធារណៈនៅថ្ងៃសៅរ៍នេះដល់អ្នកដែលបានបោះឆ្នោតគាំទ្រគណបក្សប្រជាជនកម្ពុជាទាំងអស់ឲ្យត្រៀមខ្លួនប្រឆាំងតបតវិញចំពោះទង្វើខុសច្បាប់ទាំងឡាយណាដែលឈានទៅដល់ការធ្វើរដ្ឋប្រហារខុសច្បាប់ និងផ្ទុយពីរដ្ឋធម្មនុញ្ញ។ លោកបញ្ជាក់ថា គណបក្សប្រឆាំងក៏មិនអាចយកប្រទេសកម្ពុជាធ្វើជាចំណាប់ខ្មាំងបានដែរ។
ការថ្លែងបែបនេះបានធ្វើឡើងនៅក្នុងពិធីសម្ពោធដាក់ឲ្យប្រើប្រាស់ភូមិកុមារអន្តរជាតិ SOS ក្នុងខេត្តក្រចេះ។ វត្តមានរបស់លោកនាយករដ្ឋមន្ត្រីក្នុងខេត្តក្រចេះនៅពេលនេះអាចចាត់ទុកជាការបង្ហាញមុខដោយកម្រម្តងទៀតនៅតាមខេត្តចាប់តាំងពីក្រោយការបោះឆ្នោតកាលពីខែកក្កដាឆ្នាំ ២០១៣ មក។ ការបោះឆ្នោតដែលគណបក្សប្រជាជនកម្ពុជាបាត់បង់អស់ ២២ កៅអីពីក្នុងរដ្ឋសភា។ មិនតែប៉ុណ្ណោះ គណបក្សប្រឆាំងនៅតែមិនទទួលយកលទ្ធផល និងបានចោទគណបក្សកាន់អំណាចថាបានលួចបន្លំសន្លឹកឆ្នោត។
នេះក៏ជាលើកទី១ដែរដែលលោកនាយករដ្ឋមន្ត្រី ហ៊ុន សែន បានថ្លែងសារនយោបាយយ៉ាងធ្ងន់ៗទៅកាន់បក្សប្រឆាំងបន្ទាប់ពីស្ថិតនៅស្ងាត់ស្ងៀមជាច្រើនខែមក។ លោកបានព្រមានថា កម្ពុជាមិនមែនដូចនៅអេហ្ស៊ីប ទុយនេស៊ី និងលីប៊ី ដែលគេអាចធ្វើបដិវត្តន៍ផ្តួលរំលំបាននោះឡើយ។ បើទោះបីជាលោកនាយករដ្ឋមន្ត្រី ហ៊ុន សែន មិនបាននិយាយចំៗទៅលើក្រុមណា ប៉ុន្តែ គេអាចយល់បានថា លោកសំដៅទៅលើគណបក្សប្រឆាំងដែលកំពុងបន្តទាមទារឲ្យមានការបោះឆ្នោតឡើងវិញ និងឲ្យលោកចុះចេញពីមុខតំណែងតាមរយៈមហាបាតុកម្មជាបន្តបន្ទាប់។ លោកនាយករដ្ឋមន្ត្រីបានហៅការផ្តល់យោបល់ទាំងឡាយ ដូចជាស្នើសុំឲ្យព្រះមហាក្សត្រដាក់រាជនិងឲ្យធ្វើជានាយករដ្ឋមន្ត្រីនៃរដ្ឋាភិបាលបណ្តោះអាសន្នជាដើមនោះថាជាការញុះញង់។
យ៉ាងណាក៏ដោយ គណបក្សប្រឆាំងបានបដិសេធថាខ្លួនមិនដែលមានបំណងផ្តួលរំលំរដ្ឋាភិបាលទេ។ លោកយឹម សុវណ្ណ អ្នកនាំពាក្យគណបក្សសង្គ្រោះជាតិបានប្រាប់វិទ្យុបារាំងអន្តរជាតិថា គណបក្សសង្គ្រោះជាតិទាមទារឲ្យបោះឆ្នោតឡើងវិញដើម្បីរៀបចំឲ្យមានរដ្ឋាភិបាល និងរដ្ឋសភាស្របច្បាប់ ដែលជាការរកយុត្តិធម៌ជូនម្ចាស់ឆ្នោត។ ហើយការទាមទារទាំងនេះធ្វើឡើងតាមគោលការណ៍អហិង្សាតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ