ប៉ូលិសបិទផ្លូវ និងទីលានប្រជាធិបតេយ្យ រីឯគណបក្សសង្គ្រោះជាតិ ហែក្បួនឃោសនា
ប៉ូលិសបង្ក្រាបបាតុកម្មរាប់រយនាក់ ប្រដាប់ដោយខែល ដំបង និងកាំភ្លើងបាញ់គ្រាប់ផ្សែង រួមទាំងឡានរបាំងដែក សម្រាប់ទប់បាតុកម្ម បានបន្តឈរជើង បិទទីលានប្រជាធិបតេយ្យ និងកំណាត់ផ្លូវនរោត្តម នៅស្ពាននាគ ខាងត្បូងវត្តភ្នំ ចាប់តាំងពីម៉ោង ៣ រសៀល ថ្ងៃទី២ឧសភានេះ។ ក្នុងពេលប៉ូលិសបិទផ្លូវ និងទីលានប្រជាធិបតេយ្យនៅរសៀលនេះ កងកម្លាំងសន្តិសុខ ដឹកនាំបញ្ជាផ្ទាល់ដោយលោក សុខ ពេញវុធ អភិបាលរងខណ្ឌដូនពេញ បានបន្តវ៉ៃប្រជាពលរដ្ឋ និងអ្នកកាសែត បែកក្បាលជាច្រើននាក់។ រីឯសកម្មជនគណបក្សសង្គ្រោះជាតិ ជាច្រើនក្រុម ជិះម៉ូតូ និងកង់បី មានមេក្រូ ទង់ជាតិ និងទង់គណបក្ស បានបំបែកគ្នា ហែក្បួនឃោសនាបោះឆ្នោត នៅរសៀលថ្ងៃទី២ឧសភានេះ នៅតាមផ្លូវជាច្រើន នៅភ្នំពេញ។ ក្បួនឃោសនាដឹកនាំដោយលោក សម រង្ស៊ី និងលោក កឹម សុខា នៅភ្នំពេញ នារសៀលនេះ មិនមានអំពើហិង្សា ឬការរារាំង នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
