រដ្ឋាភិបាលប្រកាសឲ្យប្រើប្រាស់យុទ្ធសាស្ត្រទប់ទល់ការប្រែប្រួលអាកាសធាតុ
រដ្ឋាភិបាលកម្ពុជាបានប្រកាសនៅថ្ងៃអង្គារទី ៥ វិច្ឆិកានេះ ដាក់ឲ្យប្រើប្រាស់ផែនការយុទ្ធសាស្ត្រដំបូងបង្អស់របស់ខ្លួនក្នុងការទប់ទល់នឹងការប្រែប្រួលអាកាសធាតុ។ ការប្រកាសឲ្យប្រើប្រាស់យុទ្ធសាស្ត្រថ្មីនេះបានធ្វើឡើងនាឱកាសវេទិកាជាតិលើកទី៣ស្តីពីការប្រែប្រួលអាកាសធាតុដែលបើកធ្វើនៅឯវិមានសន្តិភាព ទីស្តីការគណៈរដ្ឋមន្ត្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ផែនការយុទ្ធសាស្ត្រលើកដំបូងស្តីពីការទប់ទល់ជាមួយនឹងការប្រែប្រួលអាកាសធាតុត្រូវបានប្រកាសដាក់ឲ្យប្រើប្រាស់ជាផ្លូវការនៅថ្ងៃអង្គារទី ៥វិច្ឆិកានេះដោយលោកនាយករដ្ឋមន្ត្រី ហ៊ុន សែន។ ផែនការយុទ្ធសាស្ត្រនេះមានគោលដៅដោះស្រាយបញ្ហាប្រឈមដែលបង្កឡើងដោយគ្រោះមហន្តរាយធម្មជាតិដែលកើតឡើងដោយសារការប្រែប្រួលអាកាសធាតុ។
ផែនការយុទ្ធសាស្ត្រនេះនឹងត្រូវអនុវត្តចន្លោះពីឆ្នាំ ២០១៤ ដល់ ឆ្នាំ ២០២៣ ។ នេះបើយោងតាមសេចក្តីប្រកាសព័ត៌មានរបស់ក្រសួងបរិស្ថានដែលចេញផ្សាយនៅរសៀលថ្ងៃអង្គារនេះ។ លោកនាយករដ្ឋមន្ត្រី ហ៊ុន សែន បានថ្លែងថា ការប្រែប្រួលអាកាសធាតុបានក្លាយជាបញ្ហាប្រឈមជាយុទ្ធសាស្ត្រមួយសម្រាប់ការអភិវឌ្ឍដែលទាមទារឲ្យមានការយកចិត្តទុកដាក់រួមគ្នាដោះស្រាយជាបន្ទាន់។
វេទិកាជាតិលើកទី៣ស្ដីពីការប្រែប្រួលអាកាសធាតុ” បានប្រារព្ធធ្វើនៅព្រឹកថ្ងៃទី ៥ ខែ វិច្ឆិកា ឆ្នាំ ២០១៣ នៅវិមានសន្តិភាពទីស្តីការគណរដ្ឋមន្ត្រី។ លោកនាយករដ្ឋមន្ត្រី ហ៊ុន សែន បានថ្លែងក្នុងឱកាសបើកវេទិកានេះថា កម្ពុជាចាត់ទុកនិរន្ដរភាពបរិស្ថានជាអាទិភាពនាំផ្លូវដ៏ត្រឹមត្រូវសម្រាប់យុទ្ធសាស្ដ្រជាតិស្ដីពីការអភិវឌ្ឍប្រកបដោយចីរភាព និង ការលុបបំបាត់ភាពក្រីក្រ។
សូមបញ្ជាក់ថា វេទិកាជាតិលើកទី ៣ ស្ដីពីការប្រែប្រួលអាកាសធាតុនេះ នឹងបើកឱកាសឲ្យក្រុមអ្នកជំនាញជាតិ និងអន្តរជាតិពិភាក្សាគ្នាអំពីបញ្ហាជាច្រើនទាក់ទងនឹងការងារគ្រប់គ្រងការប្រែប្រួលអាកាសធាតុ។ អ្នកជំនាញជាង ៧០០ នាក់មកពីរដ្ឋាភិបាល ដៃគូអភិវឌ្ឍន៍ អង្គការសង្គមស៊ីវិល និងស្ថាប័នជាច្រើនទៀតបានចូលរួមពិភាក្សាក្នុងវេទិកានេះរហូតដល់ថ្ងៃទី ៧វិច្ឆិកា។ វេទិកានេះក៏បានបើកធ្វើឡើងចំពេលដែលប្រទេសកម្ពុជាទទួលរងគ្រោះដោយទឹកជំនន់យ៉ាងធ្ងន់ធ្ងរ។
អនុសាសន៍ទាំងឡាយដែលកើតចេញពីការពិភាក្សានេះនឹងបានជាប្រយោជន៍សម្រាប់គាំទ្រកម្ពុជាក្នុងការឆ្លើយតបនឹងការប្រែប្រួលអាកាសធាតុឆ្ពោះទៅការកសាងសង្គមបៃតងដែលបញ្ចេញឧស្ម័នកាបូនតិច,ធន់នឹងការប្រែប្រួលអាកាសធាតុ មានសមធម៌ និង មានភាពសុខដុមរវាងការរស់នៅរបស់មនុស្ស និង បរិស្ថាន។
លោកស្រី ក្លែរ វ៉ាន់ដ័រ វ៉ារ៉េន អ្នកសម្របសម្រួលអង្គការសហប្រជាជាតិប្រចាំកម្ពុជាបានគូសបញ្ជាក់ថា រាល់សកម្មភាពឆ្លើយតបនឹងអាកាសធាតុមិនគួរមើលរំលងបញ្ហាកង្វល់របស់ស្ត្រី ដែលជាក្រុមអ្នកងាយរងគ្រោះបំផុតពីការប្រែប្រួលអាកាសធាតុនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ