សាលាក្រុងភ្នំពេញនឹងបើកយុទ្ធនាការប្រមូលក្មេងអនាថានៅតាមដងផ្លូវជាថ្មីនៅដើមខែក្រោយ
នៅដើមខែកក្កដា ខែក្រោយនេះ សាលារាជធានីភ្នំពេញនឹងបើកយុទ្ធនាការប្រមូលក្មេងអនាថានៅតាមបណ្តាដងផ្លូវនានានៅក្នុងរាជធានីភ្នំពេញ។ នេះបើតាមលោក ឡុង ឌីម៉ង់ អ្នកនាំពាក្យសាលារាជធានីភ្នំពេញដែលបានថ្លែងប្រាប់វិទ្យុបារាំងអន្តរជាតិ នៅព្រឹកថ្ងៃ អាទិត្យ ទី ២៩ មិថុនានេះ ។ ក្មេងអនាថា ដែលផ្ញើវាសនានៅលើដងផ្លូវតាមរយៈការសុំទាន និង លក់ផ្កាជាដើមនោះ គឺ នៅតែមានដដែល បើទោះបីសាលារាជធានីភ្នំពេញធ្លាប់បានប្រមូលម្តងរួចមកហើយក៏ដោយ។
ចុះផ្សាយនៅថ្ងៃ៖
ស្តាប់ - ០១:៤៧
ចាប់ពីខែកក្កដាខាងមុខនេះទៅ ក្មេងៗអនាថាដែលកំពុងលក់ផ្កា និង សុំទាននៅតាមដងផ្លូវនានាក្នុងរាជធានីភ្នំពេញ នឹងលែងមានវត្តមានទៀតហើយ។ លែងមាន ដោយសារសាលារាជធានីភ្នំពេញ កំពុងរៀបចំយុទ្ធនាការទ្រង់ទ្រាយធំ ដើម្បីប្រមូលក្មេងៗទាំងនោះ យកទៅបណ្តុះបណ្តាល និង អប់រំនៅតាមបណ្តាអង្គការកុមារមួយចំនួននៅក្នុងប្រទេសកម្ពុជា នៅសប្តាហ៍ក្រោយនេះ។
លោក ឡុង ឌីម៉ង់ អ្នកពាក្យសាលារាជធានីភ្នំពេញបានប្រាប់វិទ្យុបារាំងអន្តរជាតិRFI នៅថ្ងៃទី ២៩ មិថុនា ឆ្នាំ ២០១៤ ថា នេះគឺជាយុទ្ធនាការលើកទីពីរហើយរបស់សាលារាជធានីភ្នំពេញក្នុងការប្រមូលក្មេងអនាថានៅតាមដងផ្លូវ។ លោក បន្តថា សាលារាជធានីភ្នំពេញធ្វើការប្រមូលក្មេងៗអនាថាទាំងនោះ គឺ ទីមួយ ដើម្បីសុវត្ថិភាពរបស់ពួកគេ ទីពីរ ដើម្បីការពារមិនឲ្យមានការកេងប្រវ័ញ្ចកម្លាំងពលកម្មកុមារ និង ការជួញដូរ។ ទីបី ដើម្បីសោភ័ណ្ឌភាពទីក្រុងភ្នំពេញ ដោយមិនឲ្យមានក្មេងៗសុំទាន ឫ លក់ផ្កាជាដើម នៅតាមស្តុបនីមួយៗ ហើយទីបួន គឺដើម្បីឲ្យក្មេងៗទាំងនោះ បានចូលរៀន និង ទទួលការបណ្តុះបណ្តាលជំនាញ ដើម្បីជាទុនចិញ្ចឺមជីវិតនៅពេលអនាគតផងដែរ។
បើតាមលោក ឡុង ឌីម៉ង់ ក្មេងៗដែលប្រមូលបាន សាលារាជធានីភ្នំពេញនឹងបញ្ជូនទៅកាន់អង្គការសហការមួយចំនួនដូចជា អង្គការស្នាមញញឹមនៃកុមារ អង្គការមិត្តសំឡាញ់ អង្គការគ្រួសារថ្មី និង អង្គការអាសស្ពេកា ។ ហើយអង្គការទាំងនេះ នឹងចិញ្ចឹម និង បណ្តុះបណ្តាលជំនាញដល់ក្មេងៗទាំងនោះ។
សូមបញ្ជាក់ថា កាលពីដើមខែមិថុនានេះ សាលារាជធានីភ្នំពេញធ្លាប់បានប្រមូលក្មេងៗសុំទាន និង លក់ផ្កានៅតាមស្តុបនានានៅក្នុងរាជធានីភ្នំពេញបានចំនួន ជាង ១០ នាក់ ហើយបញ្ជូនក្មេងទាំងនោះទៅកាន់អង្គការធ្វើការពាក់ព័ន្ធខាងកុមារ ដើម្បីមើលថែ និង បណ្តុះបណ្តាលជំនាញដល់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ