អាជ្ញាធរ មិនអនុញ្ញាតឲ្យអង្គការមាតាធម្មជាតិធ្វើយុទ្ធនាការជិះកង់ផ្សព្វផ្សាយពីតំបន់អារ៉ែងនៅភ្នំពេញ
សាលារាជធានីភ្នំពេញមិនអនុញ្ញាតឲ្យអង្គការមាតាធម្មជាតិធ្វើយុទ្ធនាការជិះកង់ជុំវិញទីក្រុងភ្នំពេញនៅថ្ងៃអាទិត្យស្អែកនេះទេ ហើយថែមទាំងព្រមានថា នឹងចាត់វិធានការតាមផ្លូវច្បាប់ប្រសិនអង្គការនេះនៅតែចចេសធ្វើនោះ។ យ៉ាងណាក៏ដោយ លោក អេឡិច ចាន់ដ្រូ ប្រធានអង្គការមាតាធម្មជាតិនៅតែអះអាងថា អង្គការរបស់លោកនៅតែធ្វើយុទ្ធនាការនេះដូចការគ្រោងទុកដដែលបើទោះមានការព្រមានបែបនេះក្តី។
ចុះផ្សាយនៅថ្ងៃ៖
ស្តាប់ - ០១:២៩
សាលារាជធានីភ្នំពេញបានសម្រេចមិនអនុញ្ញាតឲ្យអង្គការមាតាធម្មជាតិធ្វើយុទ្ធនាការជិះកង់ជាក្រុមនៅរសៀលថ្ងៃអាទិត្យ ស្អែកនេះនោះទេ។ នេះបើតាមលោក ឡុង ឌីម៉ង់ អ្នកពាក្យសាលារាជធានីភ្នំពេញ ដែលបានបញ្ជាក់ប្រាប់វិទ្យុអន្តរជាតិនៅរសៀលថ្ងៃសៅរ៍ ទី ១៦ សីហានេះ។
លោក ឡុង ឌីម៉ង់ បានលើកហេតុផលថា ដោយសារតែអង្គការមាតាធម្មជាតិមិនបានដាក់ពាក្យស្នើសុំត្រឹមត្រូវមកកាន់សាលារាជធានីភ្នំពេញ។ ក៏ប៉ុន្តែ លោក អេឡិច ចាន់ដ្រូ ប្រធានមាតាធម្មជាតិបានបញ្ជាក់ប្រាប់វិទ្យុបារាំងអន្តរជាតិនៅរសៀលនេះដែរថា លោកបានដាក់លិខិតជូនដំណឹងទៅសាលារាជធានីភ្នំពេញតាំងពីថ្ងៃចន្ទ។ ទោះជាយ៉ាងនេះក្តី លោក ឡុង ឌីម៉ង់ បានអះអាងថា យុទ្ធនាការបែបនេះ អង្គការមាតាធម្មជាតិត្រូវដាក់ពាក្យស្នើសុំមកសាលារាជធានីភ្នំពេញ មិនមែនជូនដំណឹងនោះទេ។ ដូច្នេះហើយទើបសាលារាជធានីភ្នំពេញ មិនអនុញ្ញាតឲ្យធ្វើ។
លោក អេឡិច ចាន់ដ្រូ លើកឡើងថា ទោះបីអាជ្ញាធរមិនអនុញ្ញាតក៏ដោយ ក៏អង្គការមាតាធម្មជាតិនៅតែធ្វើយុទ្ធនាការនេះតាមការគ្រោងទុកដដែល។ ក៏ប៉ុន្តែ អ្នកនាំពាក្យសាលារាជធានីភ្នំពេញបានព្រមានថា អាជ្ញាធរនឹងចាត់វិធានការទៅតាមផ្លូវច្បាប់ចំពោះរឹងទទឹងនេះ។
សូមបញ្ជាក់ថា កាលពីថ្ងៃសុក្រ អង្គការមាតាធម្មជាតិបានចេញសេចក្តីជូនដំណឹងមួយស្តីពីការធ្វើយុទ្ធនាការជិះកង់ជាក្រុមជុំវិញរាជធានីភ្នំពេញនៅថ្ងៃទីអាទិត្យ ទី ១៧ សីហា វេលាម៉ោង ៣ រសៀល។ យុទ្ធនាការជិះកង់នេះ នឹងមានអ្នកចូលរួមប្រមាណ ៤០ នាក់ ក្នុងគោលបំណង ដើម្បីសុខភាព និង បរិស្ថាន និង ផ្សព្វផ្សាយអំពីទេសភាពតំបន់អារ៉ែង។ តំបន់អារ៉ែងនៅក្នុងខេត្តកោះកុង ដែលកំពុងរងការគម្រាមកំហែងពីគម្រោងសាងសង់ទំនប់វារីអគ្គិសនី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ