គណបក្សប្រឆាំងកំពុងមមាញឹកធ្វើរបាយការណ៍ស្តីពីការបោះបង្គោលព្រំដែន
រហូតមកទល់នឹងថ្ងៃនេះ គណបក្សសម រង្ស៊ីនៅមិនទាន់បញ្ចប់របាយការណ៍ស្តីពីការបោះបង្គោលព្រំដែនដែលខ្លួនគ្រោងនឹងផ្ញើទៅរដ្ឋាភិបាលនៅឡើយទេ។ ក្រោយពីចុះទៅពិនិត្យបង្គោលព្រំដែនក្នុងស្រុកមេមត់ខេត្តកំពង់ចាមកាលពីពាក់កណ្តាលខែធ្នូ តំណាងរាស្រ្តបក្សប្រឆាំងបានប្រកាសពីការបាត់បង់ភូមិខ្មែរចំនួន១៤ចូលទឹកដីវៀតណាម។ គណបក្សសម រង្ស៊ីកំពុងតាក់តែងរបាយការណ៍នេះឲ្យបានហ្មត់ចត់ដើម្បីទាក់ទាញចំណាប់អារម្មណ៍របស់រដ្ឋាភិបាល។ ប៉ុន្តែ មន្ត្រីរដ្ឋាភិបាលអះអាងថាពួកគេនឹងមិនឈឺក្បាលចំពោះរបាយការណ៍របស់បក្សប្រឆាំងឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ប៉ែន បូណាពីទីក្រុងភ្នំពេញ
គណបក្សសម រង្ស៊ី ដែលបានប្រកាសថានឹងដាក់របាយការណ៍ស្តីពីបញ្ហាព្រំដែនជូនរដ្ឋាភិបាលនៅចុងសប្តាហ៍នេះ នៅមិនទាន់បញ្ចប់របាយការណ៍របស់ខ្លួននៅឡើយទេ រហូតមកទល់នឹងថ្ងៃអាទិត្យនេះ។ លោកយឹម សុវណ្ណ អ្នកនាំពាក្យគណបក្សសម រង្ស៊ី បានឲ្យដឹងនៅថ្ងៃនេះថា ក្រុមអ្នកតំណាងរាស្ត្រគណបក្សរបស់លោកកំពុងធ្វើកិច្ចការនេះយ៉ាងសកម្មនិងសុំមិនទាន់ធ្វើអត្ថាធិប្បាយអំពីខ្លឹមសារនៃរបាយការណ៍នេះទេ។
តំណាងរាស្ត្រគណបក្សសម រង្ស៊ីចំនួន១៨នាក់បានចុះទៅពិនិត្យមើលបង្គោលព្រំដែននៅក្នុងស្រុកមេមត់ខេត្តកំពង់ចាមកាលពីថ្ងៃទី១៤ធ្នូ។ បន្ទាប់ពីការត្រឡប់ពីទីនោះវិញ ពួកគេបានប្រកាសថាមានភូមិខ្មែរយ៉ាងហោចណាស់១៤ដែលបានបាត់បង់ចូលទៅក្នុងទឹកដីវៀតណាមដោយសារការបោះបង្គោលព្រំដែន។ ពួកគេសន្យាថានឹងធ្វើរបាយការណ៍ជាក់លាក់មួយស្តីពីបញ្ហានេះដាក់ជូនរដ្ឋាភិបាល។
ក្រុមប្រឹក្សាឃ្លាំមើលកម្ពុជាដែលដឹកនាំដោយលោករ៉ុង ឈុនបានដាក់របាយការណ៍មួយរួចហើយកាលពីដើមខែធ្នូជូនលោកនាយករដ្ឋមន្ត្រីហ៊ុន សែន ស្តីពីការបាត់បង់ទឹកដីនៅស្រុកមេមត់នេះដែរ។ ប៉ុន្តែ នៅមិនទាន់មានចម្លើយពីរដ្ឋាភិបាលនៅឡើយទេ។ លោករ៉ុង ឈុនបានអះអាងនៅថ្ងៃនេះថា ក្រុមរបស់លោកគ្រោងនឹងចុះទៅពិនិត្យបង្គោលព្រំដែនលេខ១០៨ និង១០៩ក្នុងស្រុកកំចាយមា ខេត្តព្រៃវែងទៀត នៅដើមឆ្នាំ២០១១។
ការបោះបង្គោលព្រំដែនជាមួយប្រទេសវៀតណាមបាននិងកំពុងតែក្លាយជាកម្មវត្ថុនៃការប្រឆាំងយ៉ាងខ្លាំងក្លាពីសំណាក់បក្សប្រឆាំងនិងក្រុមសង្គមស៊ីវិលមួយចំនួន។ បន្ទាប់ពីការប្រទាំងប្រទើសគ្នាមួយឈុតដែលធ្វើឲ្យលោកសម រង្ស៊ីមេដឹកនាំបក្សប្រឆាំងត្រូវនិរទេសខ្លួនឯងទៅក្រៅប្រទេស ដើម្បីគេចផុតពីការចាប់ដាក់ពន្ធនាគារមក គណបក្សសម រង្ស៊ីងាកមកធ្វើរបាយការណ៍ដើម្បីតវ៉ាតាមផ្លូវច្បាប់វិញម្តងនៅពេលនេះ។
ប៉ុន្តែ របាយការណ៍របស់គណបក្សសម រង្ស៊ីក៏ដូចជារបស់ក្រុមលោករ៉ុង ឈុនដែរទំនងជាគ្មានឥទ្ធិពលអ្វីទៅលើរដ្ឋាភិបាលឡើយ។ លោកវ៉ា គឹមហុងមន្ត្រីទទួលបន្ទុកកិច្ចការព្រំដែនរបស់រដ្ឋាភិបាលបានបញ្ជាក់ទុកជាមុនរួចហើយថារដ្ឋាភិបាលនឹងមិនឈឺក្បាលចំពោះការរិះគន់របស់ក្រុមប្រឆាំងឡើយ ពីព្រោះតែរដ្ឋាភិបាលបានធ្វើកិច្ចការនេះយ៉ាងត្រឹមត្រូវទៅតាមផែនទីខ្នាត១/១០០ ០០០ របស់ក្រុមភូមិសាស្ត្រឥណ្ឌូចិន ដែលមានការទទួលស្គាល់ជាលក្ខណៈអន្តរជាតិ។ លោកអះអាងថា មានតែក្រុមប្រឆាំងតែប៉ុណ្ណោះដែលមិនសប្បាយចិត្តចំពោះការងារនេះដោយសារហេតុផលនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ