កម្មកររោងចក្រអូសេអង់តវ៉ាជាថ្មីនៅមុខក្រសួងការងារ
តំណាងសហជីពចំនួន១២នាក់បានចូលប្រជុំគ្នានៅក្រសួងការងារ ដើម្បីរកដំណោះស្រាយ ចំពោះការទាមទារប្រាក់ខែ១០០% ពីម្ចាស់ក្រុមហ៊ុនអូសេអង់ ដែលបានព្យួរការងារកម្មកររយៈពេលពេញ១ខែ។ មុខនឹងឈានដល់ការប្រជុំនេះ ក្រុមកម្មករបាននាំគ្នាបិទផ្លូវនៅមុខអាកាសយានដ្ឋានអន្តរជាតិ ចាប់ពីថ្ងៃទី១៥ មកម្ល៉េះ ។ យ៉ាងណាក៏ដោយ នៅមិនទាន់មានលទ្ធផលអ្វីនៅឡើយទេ។
ចុះផ្សាយនៅថ្ងៃ៖
ស្តាប់ - ០១:៤១
កម្មកររោងចក្រអូសេអង់ជាង២០០នាក់ បានជួបប្រជុំគ្នានៅមុខក្រសួងការងារ នៅព្រឹកថ្ងៃទី១៧កក្កដានេះ ដើម្បីរង់ចាំការសម្រេចរបស់ក្រុមហ៊ុននិងតំណាងសហជីពដែលបានចូលរួមដោះស្រាយបញ្ហាប្រាក់ខែឲ្យកម្មករ។
លោក ឆេង ស៊ីណន តំណាងសហជីពចលនាកម្មករ បានឲ្យដឹងថា៖ «កាលពីថ្ងៃពុធ ក្រសួងការងារបានកោះអញ្ជើញតំណាងកម្មករ និងតំណាងក្រុមហ៊ុនឲ្យជួបប្រជុំគ្នានៅថ្ងៃទី១៧កក្កដានេះ ប៉ុន្តែ ភាគីក្រុមហ៊ុនមិនបានចូលរួមទេ»។ លោក ស៊ីណន បានឲ្យដឹងទៀតថា ក្រុមហ៊ុនបាននៅតែរក្សាជំហរដដែលគឺផ្តល់ប្រាក់ខែត្រឹមតែ៥០%ប៉ុណ្ណោះទៅឲ្យកម្មករក្នុងអំឡុងពេលព្យួរការងារ ប៉ុន្តែ ភាគីកម្មករទាមទារប្រាក់ខែ ១០០ ភាគរយ។
អ្នកតំណាងសហជីព បាននិយាយទៀតថា កម្មករមានជម្រើសពីរដើម្បីដោះស្រាយបញ្ហានេះគឺទី១ ពួកគេអាចនឹងបន្តធ្វើកូដកម្ម ឬដង្ហែក្បួន រីឯជម្រើសទី២ គឺសហជីពនឹងដាក់ពាក្យបណ្តឹងទៅតុលាការដើម្បីឲ្យតុលាការចាត់វិធានការទៅតាមផ្លូវច្បាប់។
គូរបញ្ជាក់ថា ក្រុមហ៊ុនអូសេអង់បានព្យួរការងាររបស់កម្មកររយៈពេលមួយខែគឺចាប់ពីថ្ងៃទី ២៦ ខែឧសភាដល់ថ្ងៃទី ២៦ មិថុនា។ បើតាមក្រុមសហជីព គោលដៅរបស់ក្រុមហ៊ុនគឺចង់កាត់រំសាយចំនួនកម្មករ។ ប៉ុន្តែ ដោយសារតែបញ្ហាប្រាក់ខែក្នុងអំឡុងពេលព្យួរការងារនោះនៅមិនទាន់បានដោះស្រាយ កម្មករមិនព្រមចូលធ្វើការវិញនៅឡើយទេ។
កន្លងទៅក្រុមប្រឹក្សាអាជ្ញាកណ្តាលធ្លាប់បានសម្រេចឲ្យក្រុមហ៊ុនផ្តល់ប្រាក់ខែ ១០០ ភាគរយដល់កម្មករ ប៉ុន្តែ ក្រុមហ៊ុនមិនបានអនុវត្តតាមទេ។ ចុងក្រោយនេះ ការជួបប្រជុំគ្នារបស់កម្មករ ដែលបានធ្វើឡើងចាប់ពីថ្ងៃទី១៥ មកដល់ថ្ងៃទី១៧ កក្កដានេះ គឺមានគោលបំណងចង់ទាមទារឲ្យខាងក្រុមហ៊ុនគិតគូរលើប្រាក់ខែ១០០% ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ