សេចក្តីព្រាងច្បាប់ថ្មី បន្ថែមទម្ងន់ទោសនិងប្រាក់ពិន័យ ពិសេសលើអ្នកស្រវឹងនិងអ្នកបើកបរហួសល្បឿនកំណត់
អ្នកបើកបរក្នុងស្ថានភាពស្រវឹង និង អ្នកបើកបរលើសល្បឿនកំណត់នឹងទទួលទោស និងការផាកពិន័យធ្ងន់ធ្ងរជាងមុន។ រីឯអ្នកមិនពាក់មួកសុវត្ថិភាពក៏ត្រូវបង់ប្រាក់ពិន័យច្រើនជាងមុនផងដែរ។ នេះបើតាមអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោកដែលបានថ្លែងប្រាប់វិទ្យុបារាំងនៅព្រឹកថ្ងៃសៅរ៍នេះ ដោយយោងតាមសេចក្តីព្រាងច្បាប់ថ្មីស្តីពីចរាចរណ៍ផ្លូវគោក។
ចុះផ្សាយនៅថ្ងៃ៖
ស្តាប់ - ០២:១៤
តាមសេចក្តីព្រាងច្បាប់ចរាចរណ៍ផ្លូវគោកថ្មី ទោសសម្រាប់អ្នកបើកបរក្នុងស្ថានភាពស្រវឹងនិង បើកបរហួសល្បឿនកំណត់ មិនធូរស្រាលដូចច្បាប់ចាស់ឡើយ។
លោក ពៅ ម៉ាលី អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានបញ្ជាក់ថា អ្នកបើកបរក្នុងស្ថានភាពស្រវឹង បើតាមសេចក្តីព្រាងច្បាប់ថ្មី ជននោះនឹងត្រូវជាប់ពន្ធនាគារពី១ខែទៅ១ឆ្នាំ និង ផាកពិន័យ ពី ៨០ម៉ឺនរៀល ដល់ ៤លានរៀល។ ចំណែក អ្នកដែលបើកបរហួសល្បឿនកំណត់ ក្រៅតែពីការបង់ប្រាក់ពិន័យ ប៉ូលីសនឹងដកពិន្ទុប័ណ្ណបើកបររបស់ជននោះ ទៅតាមល្បឿនដែលបានបើកហួសកំណត់។
រីឯចំពោះ បញ្ហាពាក់មួកសុវត្ថិភាព តាមសេចក្តីព្រាងច្បាប់ថ្មី មិនត្រឹមតែអ្នកបើកបរនោះទេដែលត្រូវពាក់មួក ប៉ុន្តែអ្នករួមដំណើរក៏ត្រូវតែពាក់មួកដើម្បីការពារសុវត្ថិភាពខ្លួនឯងដែរ។
លោក ពៅ ម៉ាលី បានឲ្យដឹងទៀតថា បន្ទាប់ពីសេចក្តីព្រាងច្បាប់ថ្មីនេះត្រូវបានអនុម័តរួចរាល់ហើយ ពួកលោកនឹងពិភាក្សាអំពីអនុក្រឹត្យថ្មីមួយស្តីពីការបន្ថែមប្រាក់ពិន័យលើអ្នកបើកបរដែលមិនពាក់មូកសុវត្ថិភាព។
អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោករូបនេះ បានបង្ហាញក្តីជឿជាក់ថា សេចក្តីព្រាងច្បាប់ចរាចរណ៍ផ្លូវគោកថ្មី ដែលសង្កត់ធ្ងន់លើអ្នកបើកបរក្នុងស្ថានភាពស្រវឹង និងបើកបរហួសល្បឿនកំណត់ដែលជាមូលហេតុចំបងនៃគ្រោះថ្នាក់លើដងផ្លូវ នឹងធ្វើអោយកម្ពុជាសម្រេចបាននូវគោលដៅកាត់បន្ថយចំនួនអ្នកស្លាប់ដោយគ្រោះថ្នាក់ចរាចណ៍អោយបាន៥០% នៅបំណាច់ឆ្នាំ២០២០ ស្របតាមសេចក្តីសម្រេចរបស់អង្គការសហប្រជាជាតិស្តីពី ទស្សវត្សន៍នៃសកម្មភាពសុវត្ថិភាពចរាចរណ៍ផ្លូវគោក ២០១១-២០២០។
សូមបញ្ជាក់ថា គណៈរដ្ឋមន្ត្រីកម្ពុជាបានអនុម័តសេចក្តីព្រាងច្បាប់ថ្មីស្តីពីចរាចរណ៍ផ្លូវគោក នៅក្នុងកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី ១៥ សីហាម្សិលមិញ។ យោងតាមសេចក្តីប្រកាសពត៌មាន សេចក្តីព្រាងច្បាប់ថ្មីនេះ បានកែសម្រួលលើមាត្រាចំនួន៦៤មាត្រារក្សាខ្លឹមសារចាស់១៣មាត្រា បន្ថែមថ្មីចំនួន១៥មាត្រា និង លុបចោល១៨មាត្រា។
ដូច្នេះសេចក្តីព្រាងច្បាប់ថ្មីស្តីពីចរាចរផ្លូវគោកនេះ មាន ១២ជំពូក និង ៩២មាត្រា ហើយមានគោលដៅចម្បងគឺផ្តល់ការយល់ដឹងអំពីសុវត្ថិភាពផ្លូវគោក, គ្រប់គ្រងសុវត្ថិភាព និងរក្សាសណ្ដាប់ធ្នាប់ចរាចរណ៍ផ្លូវគោក ជាពិសេសទប់ស្កាត់បទល្មើសដែលបណ្ដាលមកពីការប្រើប្រាស់ផ្លូវថ្នល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ